【譯】後衛話當年:人嘜人定係區域聯防?

港紅講利 於 18/08/2017 發表 收藏文章
按:本文寫於去年秋天,當時史篤城接連失波,死球防守戰術為一熱話;無獨有偶,今夏利記首戰失利,作客「老屈」,被老屈了兩個角球,未能全取三分,利迷近日群起攻之,批判區域防守,正是溫故舊文的好時候。

譯:元朗謝四

文:Danny Higginbotham

*****

最近,上頭指示球證多加留意球員防守角球拉衫之事,史篤城兩次被罰十二碼,令時任領隊曉士考慮轉用區域防守,引起討論。事實上,今季各隊死球失波為最近五年之冠。到底有何破解之法?

前史篤城後衛希堅保咸現在係天空衛視體育台的戰術專家。他認為劍無兩頭利,區域聯防及人嘜人各有千秋,必需各取長處,揉合兩家之長。然而,取中庸之道,往往最難也。

他講:「領隊最怕三樣野:球員扯人衫、俾人單擋、或對手亂入危險區域。」

「我地見到有啲球隊用區域防守,出現咗唔少問題。問題在於球員一字排開:落到場,你通常叫你隔離果位伸手出黎,拖下手仔,希望收窄空隙,望對手聽到嘟嘟聲,停低佢至精。只是我地今季見到幾隊,包括史篤城甚或李斯特城(用人嘜人),眼見對手橫衝直撞,均束手無策。」

圖:原文用了利物浦對史雲斯的圖,令人神傷

「我踢後衛,用到區域聯防時,通常都係企定定係度,得正正係度。呢個時侯,對手就會衝埋黎,兩虎必有一傷。」

希認為人嘜人有助分清責任,避免後衛互相推卸,抱住「唔做又三十六」的心態防守:

「(用人嘜人嘅話)賽前更衣室內,你已經會知你要嘜邊個,如果你嘜漏人,俾佢入波,半場返去時你就知味道。相反,踢區域聯防嘅話,球員失咗波,半場、完場入返去,只會話『咁佢離開咗我個區嘛』。」

圖:作者本人
不過他亦同意區域聯防有其優點:

「但區域聯防就避免咗球員拉衫出招,亦唔怕俾人單擋。」

故此,希堅保咸認為融會貫通,才是上策。他效力史篤城期間,一一/一二球季只失十六個死球。今季,他們六場已失七球。

「果時我地喺史篤城時守得幾好,失波唔多。普利士會有三個人守區,前柱、中間兩位『要保護門將,叫對手唔好掂掂』,產生物體抗體,另一位守後柱。其他球員嘜人。

圖:踢過愉園的普利仕,防守有計,今夏也來香港

「如果你隊波有球員鐘意扯衫,咁就啱喇,叫佢守區,企後少少,助跑頂波解圍。咁樣集兩家大成,就算不能全其美,亦唔會混淆球員。」

*****

原文按此

作者執筆時英超仍屬開季階段,他憑當時平均數推演該季死球入波總數為244球。實際結果為242球,相當準確,亦比前四年高。從2012/13球季依次為,227、225、217及226球。

留言


請按此登錄後留言。未成為會員? 立即註冊
    快捷鍵:←
    快捷鍵:→