【英超首戰】作客的第一分 文字

港紅講利於 15/08/2017 發表 收藏文章
文如其題,作客踢波本身就不易。望望對手屈福特首發 Line up,高美斯、真馬特、奧卡卡,全部當年都係top fit球員,要作客輕勝不易,雖然往績係利物浦完全佔優。所以,有如過山車的戰況,令利物浦取得作客的第一分勉強算合理。網上圖片

文:蘇恩圖@利物浦球迷會文學部

話入正題,今屆英超用風起雲湧嚟形容最合適不過,大有大搞,細有細搞。傳統 BIG 6 大肆擴軍,中游球隊亦多以破球隊轉會費紀錄簽入實力球員,往年下游及新升班球隊也稍稍起革命。首輪 BIG 6 開局,熱剌、藍月亮、紅魔、阿記順利跑出靚開局。利記雖和,但更令英超迷驚訝的是,衛冕冠軍車仔繼社區盾脫腳後,英超首戰主場不敵般尼,失3球兼兩張紅。嘩,干地搞乜?嚟緊半個月轉會窗市場,落足眼力喺紅軍同車仔啦。

比賽技術分析,今場除賽前已確認因傷不能上陣的佳尼、拉蘭拿,及背傷兼聲稱提出TR的古天奴無上陣外,基本夫添。正選 line up 一如所料:米勞正選,大閘位馬迪爾拍老虎暈,右閘位係小將阿諾,有點驚喜係摩18正選而非米拿;中場都係由韋拿杜姆、簡23及隊長軒達臣鎮守,三名攻堅係費明奴、文尼加沙拿。齋睇個陣絶對強,攻守兼備的。

紅軍慣常開局,又係早段先失球。角球攻勢,放大至小禁區睇,紅色衫係人多,但無追釘man mark,又無聯防保護米撈,結果比奧卡卡搶點輕鬆頂入,開波僅8分鐘落後0:1。不過紅軍亦喺29分鐘,由一次美妙組織撞牆入禁區,由文尼射入紅軍今季第一球,1:1。但3分鐘後,屈福特憑藉一次邊路突破傳中,在門前混亂未能解圍下,被對方快腳射入。如果要挑剔,都係摩18無啦啦迫搶下跌倒,再喺佢左路位崩左被入攝傳中,1:2亦是上半場賽果。

下半場10分鐘,利博得12碼,費明奴射入追平2:2。2分鐘後紅軍中路突破,趁門將出迎之際,將皮球逗至門前,沙拿撞射領先3:2。及後其實紅軍都有機會拉開比分,但未能成功,及至81、86、90分鐘先換人,其實係咪保守左少少?終至補時階段,被對手一次死球攻勢,門前被頂入,3:3。秋後算帳睇,係有越位同阻門將之嫌,不過都係自己唔集中,又係死球,又係無人幫米撈,怪得邊個?等下季英超採用VAR再投訴啦。作客順利獲取第一分。

總結今場,三個前線有波入,有默契。無咗古天奴有影響。左右閘不穩,用阿諾開角球係戰術?但完場前贏波換後防又係咩玩法?進攻角球死球只用馬仔、老虎做落點,對方會唔會易mark?但慶幸係士氣夠硬淨。

今晚深夜,去德國的歐聯外圍賽,預咗無古天奴(上一篇已講主因),集中攞作客入球優勢更緊要。

今季英超,定必一番新景象,希望紅軍有收成!Let's fight for the Reds!網上圖片
標籤: 利物浦  紅軍  歐聯  

留言

會員
我要評論
請按此登錄後留言。未成為會員? 立即註冊
  • Jakeip
    Jakeip 於 15/08/2017 評論 NO. 1

    ..

  • Chun Sing Lam
    Chun Sing Lam 於 15/08/2017 評論 NO. 2

    有🐟🦐🦀賣😹

  • Marco Ma
    Marco Ma 於 16/08/2017 評論 NO. 3

    今場輸唔都偷笑😅

  • William Wu
    William Wu 於 16/08/2017 評論 NO. 4

    對方個奧卡卡大大隻但好好波

快捷鍵:←
快捷鍵:→