【特稿】我們的盧華──盧卡斯利華精選推薦

由港紅講利於 20/09/2015 發表收藏文章

盧卡斯利華──盧華喺零七年加盟利物浦。

二十歲嘅暑假，佢首次為紅軍喺非正式嘅比賽上陣，八十一分鐘喺香港大球場入替毛毛斯素高，一踢就八年。佢有著一縷飄逸嘅金色長髮，口頭禪係「unlucky」。

圖：盧卡斯（左三）喺香港第一次著利記衫上場

佢嘅職業生涯都有些少「unlucky」。作為巴西金球獎最後生嘅得獎者（19歲），佢個朵好響，不過初到步面對好大競爭，要做住謝拉特、沙比阿朗素同馬斯查蘭奴嘅後備。但係佢學得好快，十月利物浦對愛華頓嘅打毗戰，佢首次喺英超上陣，下半場入替謝隊長。臨完場時，盧華殺入禁區起腳，準備射入奠勝一球。呢個時候，菲臘利維尼以手臂做延伸，喺白界線前擋走咗必入波。最尾古治射入十二碼，利物浦贏二比一。

按此觀看圖片

圖：盧卡斯英超處子戰，搏得十二碼

後來佢剪短咗頭髮。

零九年嘅歐聯八強次回合，紅軍作客車路士。盧華喺比賽末段遠射省中人，成三比三；古治其後再入一球，總比數追至五比六，只係紅軍仍未能晉級。一零年嘅歐霸四強次回合，紅軍主場對馬體會。比賽進入加時，盧華助攻俾藥師班拿約射成二比一，但科蘭臨完場嘅入波，幫馬體會以作客入球優惠淘汰紅軍。一一年三月，紅軍作客新特蘭。古治射入一比零，然後拉大隊叫埋阿蘇、莊臣、梅利斯等人一齊同盧華抱Ｂ慶祝，慶祝佢嘅仔仔柏度出世。果季紅軍表現反覆，不過盧華喺沙比、馬查離隊後坐穩中場正選，拎咗利記全季最佳球員。呢一年，佢廿四歲。

按此觀看圖片

圖：盧卡斯生咗仔仔；抱ＢＢ；10／11球季利物浦最佳球員

其後嘅冬天，佢喺聯賽盃對車路士嘅八強整傷十字韌帶。三個月後，紅軍贏得聯賽盃。除此之外，盧華喺利物浦時期只得到過兩次聯賽第二，以及代表巴西喺零八年嘅北京，以隊長身份贏過一面銅牌。呢個冬天好長，盧華嘅受傷斷斷續續接近一年，回歸後不如前。一三年尾，利物浦作客車路士，奧斯卡喺比賽末段鉸剪腳踢中盧華，佢將奧斯卡推喺地，兩個嘈咗一陣，然後和好。有人話，佢好怕再傷。

按此觀看圖片

圖：盧卡斯於一一年十二月受傷

坊間球迷對盧卡斯嘅評價好壞參半。鍾意佢嘅會話，作為一個中場，佢傳波好穩陣；討厭佢嘅會話，佢傳波好穩陣。有一場，利記踢得唔好，盧卡斯俾人噓，前任領隊肥賓就話：「啲人唔知盧卡斯有幾好，我當佢係寶。」[1]盧卡斯話：「我遇到困難果時，肥賓會埋黎同我講野。佢唔會次次都話『做得好』，佢會話『你需要進步，人人都會進步，你要再比心機啲』。佢當我係寶，我會感覺到。」[2]

呢幾年，佢又生咗個女，平時最鐘意玩IG。傳說話，佢囝囝同蘇亞雷斯嘅囡囡好恩愛，不過依家阿蘇去咗巴塞，盧華去咗......

乜話？盧華未走？

二零一五年嘅夏天，比鍚達斯提出收購，希望將盧華帶去土耳其。八月二十四日，盧華喺作客阿仙奴一役中被換出，同客隊球迷揮手，感謝球迷八年以黎嘅支持（好似係）。二十六日，比鍚達斯主席表示：「利物浦唔想賣盧華，我地都無能為力了。」就係咁樣，盧華踏入佢喺利記嘅第九個球季，接連對韋斯咸及曼聯正選上陣。不知不覺，佢已經係隊中資歷最深嘅球員了。
https://www.youtube.com/watch?v=ebGxngMOZI4片：這些年，我們的盧華

盧華，之後唔好再咁unlucky喇。

編譯：元朗謝四＠文學部