【比啲掙扎我!】賓斯馬努力減肥,體脂率首次低於10%

有皇氣 於 09/04/2017 發表 收藏文章
莫拉達今季回歸皇馬後,賓斯馬再唔係球隊嘅必然主力前鋒。雖然佢現時仍然穩佔正選之位,不過莫拉達持續交出好表現,再加上一直有傳皇馬會再買一名世界級前鋒,賓斯馬都係時候要表現一下自己。所以,賓斯馬最近就加緊操練,開始佢嘅減肥大計。

賓斯馬喺季初曾經因為表現一度下滑而飽受傳媒同球迷批評,更被指因為愈黎愈肥而速度下降。據報導指,賓斯馬因而喺今年年頭決心開始減磅,最近兩個月由 85 公斤減至現時嘅 79 公斤,體脂率更加減至低於 10%,係佢自 04 年喺里昂以黎最低嘅一次。除此之外,努力嘅操練亦都為賓斯馬喺肌肉量同體力方面得到改善,仲增加左大約 30% 嘅速度。

▲ 賓斯馬近日的脫衣照。「嗱,大家睇下!呢位學員只係黎左減磅幾個月,你睇下佢啲肌肉宜家幾 firm!」

自賓斯馬決心減肥之後,其實場上嘅態度亦都積極左好多。最近六場比賽,賓斯馬更加交出 4 入球 1 助攻嘅表現,絕對有明顯改善。早前佩雷斯曾經講過賓斯馬係世界上最佳嘅 9 號,更加係施丹同朗拿度嘅混合體,球技上筆者就唔評論喇,唯一係希望賓斯馬唔好變到朗拿度個身形加埋施丹嘅光頭就得架喇!

古語有云﹕「成功需掙扎」,比啲掙扎我呀賓斯馬!

▲ 除咗勤力操練之外,賓斯馬亦都用左套價值約 10,000 英磅嘅電刺激裝甲去減磅,睇黎非常認真!




Source:
http://www.marca.com/en/football/real-madrid/2017/04/05/58e3e97346163fb2188b45db.html

標籤: 賓斯馬  皇馬  

留言


請按此登錄後留言。未成為會員? 立即註冊
    快捷鍵:←
    快捷鍵:→