早幾日有單網上傳聞話，美斯因尼馬轉會而與兄弟反目，刪除哂IG上有尼馬的合照.....云云。
咁爆？不過一聽呢單野有齊「都市傳說」所有"too good to be true"嘅特徵，最初在球迷世界某post看到時，一click條參考連結，發覺係假link，入面篇報道根本唔係講呢件事，再用一分鐘「孤高」一下，完全搵唔到有報紙講呢單野，連最鍾意吹水嘅小報都無，只得球迷討論區及個別網媒。
故事說到這裡，大家都明白是什麼一回事，再看上述裝假link篇文，99%留言的人都信咗係真，只有幾名回應者提出疑問，話美斯好少玩IG，好少po相咁。
其實呢條料一睇都知又係「智力測試」，唔係話美斯同尼馬唔會反面，而係呢種行為根本唔似佢性格，就算佢真嬲，都唔會用呢種方法表達，而且睇佢之前一日場比賽，係咁質波俾尼馬埋門。再睇返美斯官方IG，根本佢同尼馬的合照一直都係度，無刪過。
美斯之前都曾為假新聞發火過一次，就係國家隊隊友拿維斯被屈有服用軟性毒品習慣，結果美斯帶全隊開了個記者會，好罕有咁嚴詞斥責。上季國家打吡美斯被馬些路撞到流牙血，佢就扭過幾個對手射入靚波，美斯堅嬲嘅時候，就係咁樣作回應，唔係做埋啲小學雞行為。
有人追查到呢次謠言源頭，指始作俑者是一名外國C朗球迷，過去早有前科，今次佢出嘅post因為有註明「資料來源」，令人信以為真，但同樣係假link，而絕大部分網民係唔會click來睇，所以玩到好多人。
不過，最估唔到係fail智力測試仲包括足球評述員，ViuTV某評述員今日在直播巴塞場波時，不但將呢單舊聞當新聞講，仲將假新聞當真事講，令人不禁慨嘆，網上流言永遠係假事傳千里，到澄清事實就唔會有人share。
咁多疑點嘅假新聞竟然無人質疑，睇嚟球迷大部分都係伏爾泰後人——伏已中。
大大幅合照一直都在美斯IG，冇delete過 :http://diski365.co.za/messi-delete-photos-neymar-instagram/
請按此登錄後留言。未成為會員? 立即註冊