英超轉會死線日有人唔聲唔聲簽咗好嘢~

《越位陷阱》 於 01/09/2016 發表 收藏文章
英超轉會死線日, 勁過大時代個大奇蹟日, 一眾媒體都大事報道, 詳盡分析, 不過由於交投太活躍, 人人都係
集中環繞一些大額買賣或者有名氣球星, 不過細心翻閱, 發覺有些唔起眼的英超下游球會, 簽咗啲唔起眼但其實有啲料到的新兵, 事前無咩先兆, 事後又無咩人留意, 見識過上季既馬列斯, 簡迪, 就知呢類唔起眼的漏網之魚, 其實先係最值得講最值得留意的寶物 !

笠臣簡奴 Hal Robson-Kanu
大家已經歐國盃見識過佢, 賽事期間佢同雷丁合約完咗, 俾老主顧抛棄, 變成好聽叫做自由身既失業球員, 當然無人留意, 點知呢個威記前鋒, 在八強竟用告魯夫式轉身玩低幾件比利時後衛, 淘汰呢支當時世界排名第一既球隊出局, 呢球仲被祖家BBC選為最佳金球, 事後出哂位, 傳過半打英超球隊想簽佢, 之外仲有西甲同意甲都聞風而至, 不過一直只見出口唔見出手, 直到最後一日, 竟然係俾成個轉會期都靜英英既西布朗簽咗, 當然仲係費用全免! 你話值唔值得講先?


馬古斯軒力臣 Markus Henriksen
呢位咩軒力臣, 本身係挪威國腳, 都只係個國名威, 隊波好多年無踢大賽, 而家係講都講冰島, 邊有人理佢地, 仲要加上佢效力既係荷甲二線阿爾克馬爾, 更加被人當佢透明, 所以當佢俾得13個人既侯城簽咗, 傳媒都當佢係臨時拉伕去湊數, 最多只係俾面講吓賴恩美臣同麥保卡尼, 提都唔提佢!
其實呢個軒力臣, 唔單只高大, 上季仲入咗19球, 而佢主要係打中場唔係箭頭, 你話去英超爭標球隊可能未夠班, 但護級份子就好駛好用, 隨時係秘密武器, 成為另一個馬列斯! 仲有佢張約報道話係借用, 其實係先借後買既有條件買賣合同黎!


大衛馬素爾 David Marshall
呢件又係筍嘢嚟, 又係俾侯city唔聲唔聲簽咗, 呢道蘇格蘭國門無論國際賽同英超經驗都不俗, 仲打過些路迪, 即係有埋歐戰添, 佢19歲已經試過零封巴塞, 睇佢波路, 你話神救就唔係, 但勝在穩穩陣陣, 無咩大缺點, 弱隊就係最需要呢類龍!
仲有侯城而家個替工教頭都算鬼馬, 而家隊中用開既龍門麥基格, 本身亦係蘇格蘭國門, 最近幾年就係同大衛馬素爾爭緊正選, 而家連球會都要爭埋一份, 仲有, 遠在佢地既蘇超年代, 兩人分別係做些路迪同格流正選龍門, 呢兩隊出哂名係全世界其中一對對立最勁既球隊, 真係有心玩嘢。

(圖: 球會官網)

留言


請按此登錄後留言。未成為會員? 立即註冊
    快捷鍵:←
    快捷鍵:→