一搔四年之癢:港隊省港盃簡評 (上)

場邊筆記 於 09/01/2018 發表 收藏文章
踏入2018年,港隊第一擊就係以B隊迎戰嘅省港盃。由青年梯隊教練郭嘉諾領軍之下,港隊有個好開始,首回合先喺大球場以2-0擊敗廣東隊。雖然次回合作客被對手追和,但港隊互射十二碼以4-2擊敗對手,重奪失落四年嘅省港盃桂冠。

呢隊俗稱「港B」嘅香港隊,主要由本地嘅年輕球員同港隊嘅非常規成員組成。而過去幾年由廖俊輝帶隊嘅「港B」,都係因用波組織而引人注目。今屆人腳洗牌 (陳俊樂已經升格做大港腳;曾文輝、林學曦等球員未有入選),加上換帥領軍之下,港隊表現最好嘅,反而係有紀律嘅防守,唔單止後防表現穩健,前場黎洛賢、袁振昇、羅港威等球員嘅緊迫防守亦相當出色;不過傳送同組織嘅質素就有啲不如以往,所以喺進攻方面,呢支港隊都係比較依靠死球同反擊去製造威脅,首回合嘅兩個入球都係咁樣取得。

次回合作客,面對廣東全力進攻,港隊大部份時間都受壓,不過防線嘅表現都尚算有紀律,可惜兩次嘅犯錯,令港隊喪失首回合嘅領先優勢。雖然其後大部份時間繼續捱打,不過港隊有血肉長城同埋袁皓俊嘅神勇表現,將比賽帶到互射十二碼並且奪冠而回,都值得大家嘅掌聲。

──────────────────
強行賣廣告
Facebook專頁: https://www.facebook.com/kh.sportsworld/
Instagram帳戶: https://www.instagram.com/kh.sports/
──────────────────

跟住落嚟就要講下個別球員嘅表現,呢篇先講後場:

袁皓俊
https://www.youtube.com/watch?v=UcdEZqnpZN8
年齡:22歲
效力球隊:香港飛馬

開季嘅時候仲係後備門將,袁皓俊喺對東方龍獅一役因為梁興傑受傷而擔任正選,其後一直穩坐球隊嘅正選位置。今屆省港盃佢力壓謝家榮同陳嘉豪兩名門將,取得正選席位,亦都冇辜負郭嘉諾對佢嘅期望。首回合主場表現穩健,力保不失;次回合更加屢救險球,係港隊能夠力戰至互射十二碼嘅最大功臣。喺互射十二碼階段,袁皓俊救出兩球十二碼,協助港隊取勝。雖然喺處理高空波,部份臨場嘅決定上仲有進步嘅空間,不過佢今屆省港盃嘅表現,亦證明咗自己有力喺港隊嘅梯隊中更上一層樓。

張志勇
https://www.youtube.com/watch?v=FO3iMrUge-c&feature=youtu.be
年齡:28歲
效力球隊:香港飛馬

如果大家對上屆省港盃仲有印象嘅話,應該記得廣州富力嘅中國國腳肖智對住張志勇可以話係睇定嚟食;不過今屆張志勇嘅表現可以話係脫胎換骨。擔任隊長嘅佢,喺後場包位、處理高空波、以至指揮防線,都做得相當稱職,港隊防線表現穩健,佢可謂功勞不少;進攻方面,佢首回合死球後上助攻亦有斬獲。兩回合計,港隊嘅最佳球員應該都係呢名28歲嘅中堅,而今屆省港盃嘅表現亦向大家說明,點解佢可以喺球會力壓另一位後起之秀梁諾恆,同羅斯擔任正選中堅。

徐宏傑
https://www.youtube.com/watch?v=CQeHTgAVtJ4
年齡:21歲
效力球隊:標準流浪

去年8月底晉身大港腳嘅徐宏傑,今次省港盃嘅表現比起首次踢A級國際賽可謂愈踢愈好。汲取過港隊比賽經驗之後,返到省港盃夥拍張志勇穩守防線,應付對方國腳級前鋒肖智亦未見輸蝕 (仲有手榴彈賣!)。比較可惜嘅係佢喺次回合下半場腰傷復發,需要退下火線。雖然如此,呢位年僅21歲嘅小將相信前途依然無可限量,有力成為港隊下一代嘅防線人選。

方栢倫
年齡:24歲
效力球隊:香港飛馬

上屆省港盃,大家對方栢倫嘅印象應該係直線盤球推波出界。不過今季喺香港飛馬表現持續進步嘅佢,嚟到省港盃亦繼續交出表現。喺左翼黃梓浩發揮一般下,擔任左閘嘅方栢倫覆蓋左路嘅範圍甚廣,雖然缺乏機會展示佢今季大有進步嘅傳中,不過佢都憑住良好嘅身體質素,守住港隊嘅左路防線。以左閘球員而言,本來覺得喺中國重新開放內援名額之後,方栢倫可以藉住省港盃嘅表現,再度進軍中國,不過經歷過次回合憤怒的中指之後,就有少少保留啦......

翟廷峯
年齡:28歲
效力球隊:和富大埔

今屆省港盃嘅最不幸球員,應該就係翟廷峯啦。首回合表現穩穩陣陣,次回合就馬上嚟料:先係上半場一次同黎洛賢包夾盧琳嘅時候,出腳被對手博得十二碼;到咗下半場就喺對手一次傳中嘅時候,情急之下擺烏龍,間接幫對手扭轉落後2-0嘅局勢。當然不幸還不幸,翟廷峯如果要更進一步,重返大港腳嘅位置,喺防守上嘅決定 (尤其係出腳嘅時機) 都需要繼續改進。

留言


請按此登錄後留言。未成為會員? 立即註冊
  • wombat 於 10/01/2018 評論 NO. 1

    其實係咪真係值得咁高興? 成場比人撳住嚟打,最後只係12碼贏。
    海軍鬥水兵

快捷鍵:←
快捷鍵:→