賽後筆記:四球贏老撾,咁對大馬呢? 文字

場邊筆記於 05/10/2017 發表 收藏文章
首先做下期望管理
對香港之前,老撾作客澳門反輸1-3;大軍以22歲以下球員為主。呢場贏四球,同兩年前主場炒緬甸五球真係冇乜分別。

評價幾位首次踢大港腳嘅球員
1. 佐迪嘅作用不止於有波入,前場嘅駁腳,入楔嘅意識同樣唔錯,比起上半場另外兩位箭頭真係出眾好多。
2. 丹尼鎮守左翼衛嘅位置,今場面臨嘅考驗唔大,都有唔少助攻嘅機會。下場對馬來西亞應該都係踢正選。
3. 列斯奧踢中堅,同樣有好多助攻嘅空間,用波嘅能力幫到港隊唔少右路嘅攻勢,比起基藍馬踢嘅效果更佳。
4. 胡晉銘年紀輕輕但係都冇怯場,中場攔截、用波嘅表現都唔差,日後有力同陳俊樂一齊撐起港隊中場。
5. 夏志明有速度、有身形,比起踢冠忠南區嘅時候似乎更加活躍,不過喺前場嘅把握力同埋傳送都係有待改善。

整體表現
其實上半場兩球都係受惠於對手嘅防守鬆散,利用右路嘅傳中連續兩次得手。但係除此之外,港隊嘅進攻都仲有改善空間,過咗中場之後好快就長傳分去兩邊傳中,用波組織嘅時間並唔多;反擊同樣創造出唔少嘅機會,不過都浪費咗唔少,羅港威同夏志明踢前線嘅表現都乏善足陳,尤其係羅港威同丹尼喺左路嘅配合效果不彰。

下半場港隊出返辛祖、伊達等進攻主力,但係進攻嘅套路反而更加唔清晰,前線嘅走位同組織睇落都係冇乜默契。即使創造到機會,把握力都係麻麻,只係靠高梵一球近門頭鎚同埋辛祖嘅十二碼擴大比數。以咁樣嘅進攻表現,對住實力相若嘅馬來西亞,仲可唔可以咁樣攻,其實真係有啲疑問。

下場期望
1. 踢唔到3-4-3就唔好勉強,不過金判坤應該都係咁排。
2. 唔好放黃威 (或者辛祖) 落中場中,俾到直線唔代表就要踢中場派牌。
3. 出返列斯奧帶住艾里奧踢中堅,後者失起魂上嚟真係會出事。
4. 如果仲係丹尼同徐德帥踢翼衛,祝大家好運。

留言

會員
我要評論
請按此登錄後留言。未成為會員? 立即註冊
  • Zeroau Au
    Zeroau Au 於 06/10/2017 評論 NO. 1

    下場醒醒定定呀 試多啲控球在腳 體力連 大馬嗰班好癲

    同埋 球迷都幫幫手 唔想俾位亞洲足協入

  • Lui Wai 達仔
    Lui Wai 達仔 於 06/10/2017 評論 NO. 2

    其實下半場初段攻得幾亂,但後半段組織開始似樣,後半段我覺得比上半場更好,雖然好多人不理性地批評辛祖,但佢用波能力同短傳,加上身高優勢,仍然是前鋒第一選擇。

  • Edward Chan Wai Chun
    Edward Chan Wai Chun 於 06/10/2017 評論 NO. 3

    好心踢多d組織配合啦,一味想靠身高優勢去贏人

  • Danny Ho
    Danny Ho 於 06/10/2017 評論 NO. 4

    金sir踢法拍得住莫耶子
    九九八十一斬 高Q大棍咁多年都係咁

  • Gary.C
    Gary.C 於 06/10/2017 評論 NO. 5

    作為老球迷 ,贏40比0都冇感覺,香港隊可能是最多入籍兵的代表隊,何有榮焉?只有那些狂熱黃絲才會盲撐
    個人感受,黃絲不喜勿插

快捷鍵:←
快捷鍵:→