港超轉會市場重開,各隊增兵簡介

場邊筆記 於 04/07/2017 發表 收藏文章
7月4號係港超轉會窗正式開啟嘅日子,各隊亦喺呢段時間開始宣佈組軍嘅消息。喺唔同球隊密密增兵嘅時候,小弟都同大家重溫一下幾隊球隊嘅增兵消息,同各位球迷簡介一下呢啲新球員:

冠忠南區
喺南華自降港甲,傑志又未公佈組軍詳情嘅時候,目前增兵最多嘅球隊應該就係上年港超季軍球隊冠忠南區。上年喺聯賽交出令人驚喜嘅表現之後,南區留用大部份本地球員骨幹,並且更換部份外援人選:前鋒馬高斯、翼鋒蘇沙同埋後衛加拉度繼續留隊,至於巴西後衛杜馬思、中場老將迪基圖同埋季中加盟嘅日本中場內田智也都將會離開。

取而代之嘅就係一位曾經來港嘅亞援同埋兩位西班牙援將:首先宣佈加盟嘅係曾經踢過傑志嘅後衛列文。現年33歲嘅佢喺2012年初加盟傑志,稱得上係近年表現最好嘅亞援之一。效力一年之後,列文轉戰馬來西亞,加盟馬超嘅彭亨,並且為球隊上陣近100場,直到今年初先回歸英格蘭,幫英甲基寧咸護級。列文第一次來港嘅時候正值盛年,如今南區邀得33歲嘅佢重返香港,睇下佢又可唔可以拍住謝德謙同埋加拉度,鎮守南區嘅銅牆鐵壁啦。

至於另外兩位西班牙兵,分別係29歲嘅翼鋒加洛斯同埋29歲嘅防守中場馬天尼斯。上季效力西丙球隊Mérida AD,上陣29場並攻入3球嘅加洛斯,將會為球隊提供加強側擊力嘅人選,為中鋒馬高斯提供更多嘅支援。至於今日宣佈加盟嘅馬天尼斯就係華倫西亞嘅青訓產品,除咗喺西乙同西丙打滾之外,亦一度外流波蘭聯賽。除咗擔任防中之外,馬天尼斯亦可以擔任中堅,等南區喺後場有更多嘅選擇。

走返西班牙路線嘅南區,來屆應該會被視為挑戰東方同傑志嘅球隊之一,睇下呢班狂牛兵可唔可以搭住蘇沙同列文,撐起南區嘅脊骨,成為來季港超嘅黑馬啦。

東方龍獅
未能衛冕港超嘅東方龍獅,喺季後賽結束之後,已經公佈咗部份組軍消息:「牛丸」陳婉婷將會離任主教練,由司徒文俊接棒;本地球員亦將會加入由中甲回流嘅李志豪同埋南華前鋒林學曦。不過隨後嘅轉會消息都係對東方不利居多,尤其係前鋒基奧雲尼同埋歸化後場球員羅拔圖先後被R&F富力挖角,對於來季會出戰亞冠盃外圍賽嘅東方嚟講絕對係一個打擊。

https://www.youtube.com/watch?v=XnTMPgg9AWE不過嚟到今日,東方終於有外援消息:荷乙球會幸運薛達宣佈,26歲嘅巴西中場域陀沙巴將會轉會至東方。如果睇域陀沙巴嘅CV,其實都幾出色:2012至2014年間踢過意乙嘅布雷西亞,其後加盟澳職西悉尼流浪者,亦係球隊贏得亞冠盃嘅成員之一,近年就先後到意大利、希臘、巴林同荷蘭外流。

https://www.youtube.com/watch?v=oYZZ-m2nJMs
CV睇落幾靚,睇精華嘅個人技術亦都唔差,不過域陀沙巴同樣係一個惹火人物:除咗喺2014年嘅亞冠盃對廣州恆大嘅時候,搞到郜林被逐 (見 1:40) 之外,佢場外嘅紀律問題亦需要值得留意。有傳當年佢離開澳職,就係因為同教練普波域鬧不和所致,睇下嚟到香港之後,一班本地薑教練團同佢合作成點啦。

標準流浪
上屆由理文贊助同埋主理嘅流浪,今屆變返做李輝立領軍嘅標準流浪。雖然完整嘅組軍名單未出爐,不過當中有部份球員加盟嘅消息已經獲確認。除咗有上季效力標準灝天嘅鄭兆均同徐宏傑之外,流浪亦都已經羅致黎洛賢、卓耀國、劉卓軒同張國明等年輕球員。至於外援方面,除咗要曾經效力飛馬,上季中途回港踢標準灝天嘅摩域治之外,曾經效力公民嘅31歲塞爾維亞中場卡錫亦再度來港。

對上一次聽到卡錫嘅消息,已經係佢2016年再度去印尼落班,短暫效力萬隆嘅時候。不過當時佢表現唔算突出,好快就宣告離隊。當年效力公民嘅時候,卡錫嘅表現都相當亮眼,亦都係球隊贏賀歲盃嘅功臣之一。今次再度來港,佢都會同喺印尼合作過嘅狄恩再度共事,希望佢喺狄恩執教之下,都可以踢返出之前嘅水準,證明自己寶刀未老啦。

留言


請按此登錄後留言。未成為會員? 立即註冊
  • 史杜 於 07/07/2017 評論 NO. 1

    其實東方陣容仍然係過於龐大,借走部分球員對大家都好。

快捷鍵:←
快捷鍵:→