由曼聯到皇馬!世界第一變第二!C朗你會懷念曼聯時嗎?

曼聯新聞 於 21/12/2012 發表 收藏文章
曼聯歐聯16強將會對住皇馬,而C朗就時隔4年,再度重返奧脫福球場,係曼聯的6年,佢由一個黃毛小子變成一個世界足球先生,完成個人同球會的「大滿貫」。穿上曼聯的C朗係足球界的一哥,皇馬的C朗就次次都係世界足球先生同金球獎評選中不敵美斯,由第一跌落第二。《獨立報》就回顧返C朗的曼聯生涯,佢由03年8月係曼聯完成處子戰,到08年奪得英超、歐聯,幫助曼聯成為「雙冠王」,並成為世界足球先生,而到09年6月就以世界紀錄的8000萬鎊加盟皇馬。
03年8月16日,曼聯「新7號」C朗係主場對保頓的聯賽中完成處子戰,佢係下半場後備上陣,佢用非常出色的腳法令世人識得呢名黃毛小子,並幫助曼聯以4-0大勝保頓。
04年5月22日,佢係曼聯對米禾爾的英足盃決賽中先開紀錄,而呢次係佢第一次係英格蘭取得的第一個殊榮。
06年2月26日,佢係英聯盃決賽中入波,幫助曼聯4-0大勝韋根,取得佢係曼聯第二個殊榮。
06年7月,佢係德國世界杯同朗尼打交的事件,令佢差點返唔到去曼聯,但係費Sir就親自飛去葡萄牙,說服佢,並令佢回心轉意。
07年5月,C朗射入係曼聯的第50球,並且幫助曼聯作客擊敗曼城,奪得加盟以來第一座的英超冠軍。而佢係呢個球季當選PFA年度最佳球員。
08年12月2日,奪得金球獎,之後仲當選埋世界足球先生,完成個人、球會的大滿貫。
09年7月11日,曼聯接受皇馬的8000萬鎊報價,C朗從此就離開曼聯。
據統計,C朗效力曼聯6年裡面,上陣292次,攻入118球。奪得3個英超冠軍,1個歐聯冠軍、1個英足盃冠軍、2個英聯盃冠軍、1個世冠盃冠軍,取得曬球會獎項。另外,佢自己亦奪得1次英超金靴獎、1次PFA年度最佳球員、PFA年度最佳新人、1次金球獎同1次世界足球先生,完成個人榮譽大湖貫。
07-08球季,C朗係公認的足球界一哥,奪得英超、歐聯冠軍,英超奪得金靴獎,歐聯四強淘汰有美斯坐陣的巴塞隆拿,佢至今的金球獎同世界足球先生都係效力曼聯。係皇馬的C朗就連續三年的金球獎同世界足球先生不敵美斯,係西甲三年裡面,C朗要直到上季先拎到第一個聯賽冠軍。係銀河鑑隊的C朗從未打入歐聯決賽,佢生涯中的2次決賽亦都係曼聯過。奧脫福,係C朗的開始,回顧過去,佢由世界第一變成第二,C朗會唔會懷念係曼聯的日子呢?

留言


請按此登錄後留言。未成為會員? 立即註冊
  • 爹域 於 22/12/2012 評論 NO. 1

    c朗返曼聯啦!

  • 爹域 於 22/12/2012 評論 NO. 2

    test

快捷鍵:←
快捷鍵:→