香港城迷在澳洲第五回：佢都係我同鄉喎! 精選

又係我瘟神啊，大家呢排過成點啊？希望大家都過得幾好啦。相信對於曼城同埋我地呢d曼城球迷來講，開季到而加都過得好好。

阿古路(Aguero)追平左前曼城射手 Eric Brook 創下嘅177球入球紀錄，我係呢道都恭喜下阿古路(Aguero) 希望佢可以為球隊帶來更多嘅入球。

至於成隊整體方面，比賽成績亦都非常出色開季至今11埋不敗，亦都追平2015年由柏歷堅尼(Manuel Pellegrini)帶領下創下嘅所有比賽11場不敗記錄。記錄嘅嘢創出嚟就係要俾人破，希望嗰啲係記錄可以喺未來嘅時間有更加係多嘅突破，令到球隊有輝煌嘅歷史，唔知陣間有無機會延續勝仗呢?
今次嘅呢篇文就想寫下隻身喺香港嚟到澳洲踢女子足球聯賽嘅張煒琪。咁啱小弟身處嘅地方亦都係布里斯班，喜歡嘅本地球亦都係布里斯班獅吼，加上咁特別有香港首位喺澳洲登陸頂級聯賽嘅女子球員，梗係要借機會講下佢啦。
身為前鋒嘅 張煒琪 今年26歲，係球員當打嘅年齡，今年7月份來過布里斯班同埋坎培拉試腳，佢亦都係9月份香港女子隊比完賽後宣加盟布里斯班獅吼女子隊。張煒琪係兩年前亦都試過聯同兩位香港女子足球員陳詠詩同埋劉夢瓊去到日本參加日本乙組足球隊，日本女子足球學校嘅訓練，分別獲得有關球隊賞識，開出三個月嘅合約。
而家難得獲得職業聯賽球隊開出一年嘅合約，張煒琪都把握今次機會嚟到澳洲追尋自己嘅夢想。澳洲女子職業足球聯賽 W-League 將會喺10月27號開始，而陳煒琪踢緊嘅布里斯班獅吼女子隊將會迎戰悉尼F C女子隊。好可惜呢一場比賽係作客小弟無緣入場觀戰，但係喺11月5號將會係布里斯班獅吼女子女今季首場主場比賽，對手就係珀斯光輝女子隊。
網媒：香港01就係10月份派出記者到布里斯班訪問張煒琪喺澳洲踢波嘅生活。睇完佢喺YouTube嘅報導片段之後，我自己都有好深嘅共鳴，離開自己嘅家人，舒適圈，朋友，隻身去到異地追求自己嘅夢想真係一件唔容易嘅事。既然決定咗就要好好把握機會，希望張煒琪可以達成到自己嘅目標，突破自己嘅框框，克服一切困難。如果張煒琪你有睇到呢篇文嘅話，11月5號布里斯班獅吼女子隊比賽時候睇吓有冇緣份見面啦。