香港城迷在澳洲第七回:赤子之心講港波

事隔半年,終於有時間出文啦。呢半年都忙於學業少左踢波同睇波,不過當然身為一個足球迷就緊係點忙都會睇下了解下足球啦。好開心曼城終於攞到今年嘅英超冠軍,可惜就係歐聯輸左比利物浦,八強止步。

破格少少講下香港本地波。小弟睇波嘅年資真係唔多,大約由2011-2012年開始先睇波,而香港足球都係因為國足海報事件先開始睇嘅。身邊嘅朋友啱啱好係一個傑志球迷叫左我去睇2014年傑志對巴黎聖日耳門嘅友誼賽而開始留意下香港本地波。之後就慢慢多左入場睇下本地波成為傑志嘅球迷。或者你會問(係咪傑志攞冠軍你先睇做勝利球迷炸) 我會用我嘅母語回答你(我唔答d錦無聊嘅問題) 其實無他嘅都係睇得多就自然中意啦,加上球會有心搞足球又有石門基地又收購到好似華道斯同科蘭嘅前國級數球員所以都覺得有小小曼城嘅影子而中意上傑志。

留學係澳洲雖然冇係香港時踢錦多波,但都有跟過下當地嘅球會跟過下操,又代表過自己校隊同現效力嘅史雲斯韓籍球員寄誠容( ki sung yueng )嘅母校:John Paul College 對碰過下 (該校是當地重點足球培訓學校),不過當然係輸波而回啦。雖然只係見識過澳洲嘅業餘足球,不過都覺非常專業。球員,球會,家長,政府都支持住運動發展,當地政府同傳媒大力支持運動,不單係比錢同宣傳,更加指發展運動可以減少政府未來億計嘅醫療開支所以大力投資。而當地球會又可以營運酒店,餐廳,酒吧等等去增加球會收入令球會財政收入健康,所以訓練設備同教練上平比香港高得多。而當地家長支持自己仔女透過運動得到快樂,健康同美好回憶而積極比佢哋參與,加上當地家長又享受同仔女週末去戶外活動一下所以又有好多嘅陪伴同參與。球員方面因爲有好多嘅支持,自然就會有自覺性知道自己要努力唔可以浪費屋企人,球會同政府嘅心機。就係呢個循環令到當地嘅業餘足球都發展得唔差。

對比香港,香港真係要努力去追。香港甚少球會有自己嘅場地,好多時都係租借康文署嘅運動場同球場,當book唔到場嘅時候,球員又會失去一次練習嘅機會。鳳凰計劃嘅2千萬,不單球圈外嘅我覺得冇用之外,好多球圈中人都話2千萬中落到球會同地區發展足球真係少之有少。
小弟年紀重細啱啱先18,未見識過社會,都唔了解足總嘅運作。不過以小朋友嘅角度睇,只係覺得足總可以做得更好! 老生常談:如果加呢批人長期做得唔好,有冇得換曬佢地呢?讓年輕有活力有膽識嘅有能之士去改革呢? 有時候我會好愚昧咁諗有一日香港,以至中國足球會有成功嘅一日,由全華班嘅團隊得至世界級嘅成就,而嘗試就係成就小弟呢個愚昧夢想開始。好細個開始屋企人就比我去試唔同嘅事同活動,從中我學到嘅係只要有膽識,勇於嘗試同承擔,就一定有會有得著,不論成功與否,有得著學到野先會比成功過得有意義。

本文我只係以一個小朋友嘅諗法去講,希望不論係大人物定小朋友睇緊我呢篇好似週記嘅文章時,做人做事都要赤子之心,勇於嘗試同承擔,唔好比-社會-影響到自己嘅初心同夢想,唔好理結果有心就去做,做嘅過程一定比結果來得重要。香港,中國嘅足球發展都一樣,要勇於嘗試同承擔,發展嘅道路比外國係難但難行都努力行嘅一定會有得著同學到野。

係道帶返個頭盔先,文章係小弟內心世界嘅想法,如果有得罪到嘅小弟講聲對唔住先,不過就希望大家可以虛心聆聽下其他人嘅意見啦。今期就係錦多啦,遲d香港見!

文:瘟神 - 2018年5月 (澳洲:布里斯本)
圖片:網上資源

文章僅代表文者個人意見,不代表本會立場。
【世界盃 ng sick ball 街訪 — 第二集】

留言

會員
我要評論
請按此登錄後留言。未成為會員? 立即註冊
快捷鍵:←
快捷鍵:→