[歐聯] 4年內贏左3次歐聯冠軍 皇家馬德里皇朝之奧秘

今朝嘅歐聯決賽，皇馬用極巨說服力嘅表現將祖雲達斯擊敗，成為第一支改制後嘅歐聯冠軍衛冕球隊。皇馬以往一慣嘅1年1星計劃，曾經為皇馬帶嚟左出名嘅6條煙，但從昨晚嘅正選名單上睇，皇馬好似已經改變左佢地嘅買人方針。除左少左大手筆嘅轟動交易之外，仲有識得高價賣走唔啱用嘅球員。唔通皇馬轉左洗錢方式?

後防:
拿華斯 2014年 / 1,000萬歐元
拉莫斯 2005年 / 2,700萬歐元
馬些路 2006年 / 700萬歐元
卡華積 2013年 / 650萬歐元
華拉尼 2011年 / 1,000萬歐元

中場:
摩迪 2012年 / 3,500萬歐元
卻奧斯 2014年 / 3,000萬歐元
伊斯高 2013年 / 3,000萬歐元
卡斯美路 2013年 / 600萬歐元

前鋒:賓斯馬 2009年 / 3,500萬歐元
C. 朗拿度 2009年 / 9,400萬歐元

睇番4個骨幹球員嘅加盟年期，包括隊長拉莫斯，兩位副隊長馬些路、C. 朗拿度同埋前鋒賓斯馬，佢地都已經為皇馬效力超過8年，而且係呢8年內為皇馬奪冠無數，表現穩定地出色，性價比極高。

另外，睇番琴晚嘅4人中場線，加盟日子雖然唔夠上面4位球員耐，但係從價錢上嚟睇就覺得絕對超值。筆者唔係話佢地好平，但係以同級嘅豪門球隊同皇馬以往嘅豪洗歷史嚟講就絕對超值。起碼呢啲價錢，都唔會及得上普巴轉會去曼聯咁樣嘅大手交易。但係，價錢唔算好高，但係就有著極高嘅效率同默契，表現亦都非常穩定。

最後嘅三位球員包括拿華斯、卡華積同華拉尼，無論係國家隊定係球會都有著極穩定嘅表現。其中，華拉尼與年齡不乎嘅表現已經同其他豪門傳左好多年緋聞，呢啲傳聞都係對華拉尼嘅表現作出左肯定。

講到以低買高賣方式賣走唔啱用嘅球員，奧斯爾同迪馬利亞就係低買高賣嘅表表者。將奧斯爾以1500萬歐元買入並以接近5000萬歐元賣俾阿仙奴。而迪馬利亞則以2500萬歐元由賓菲加帶嚟皇馬，最後以5970萬英鎊賣俾曼聯。呢兩宗嘅交易為皇馬帶嚟左接近1億歐元嘅收入。
另外，皇馬都開始有想行重用自家青訓嘅跡象。除左拿祖同馬里安奴係由青訓踢到上一隊之外，皇馬都有出動舊將回收計劃，將卡斯利亞(600萬歐元)、巴斯基斯(100萬歐元)、卡華積(650萬歐元)同埋莫拉達(3,500萬歐元)以低價買番返嚟用。

呢個歐聯冠軍除左係對施丹嘅工作給予肯定之外，其實亦都對皇馬改變買人方針成效嘅一個鼓勵。呢一種球員買賣轉會方式亦為皇馬嚟緊幾年嘅皇朝打下左「穩定發展」嘅基礎。嚟緊夏天轉會又準備開始喇，幾位傳聞會離隊嘅球員包括哈美斯、巴爾同莫拉達嘅結果會係點? 皇馬又會買入咩人嚟加強番各個位置上面嘅需要? 我地拭目以待。
鐘意睇就入嚟我地facebook俾個like啦
https://www.facebook.com/mcdogsports/