F組分組賽 德國對瑞典賽後短評 天堂與地獄

足球理性分析 於 24/06/2018 發表 收藏文章
F組分組賽 德國對瑞典賽後短評


天堂與地獄只係一步之距,為德國興奮之餘同時又為瑞典難過,足球就是這樣的。

路維果然為中場加強防守,將Khedira換成防守性較重嘅Rudy,同時將上場表現普通嘅Ozil收起換成Reus,呢兩個都係合理嘅調動。落到場嘅打法亦已求穩為先,參考左三中堅嘅做法,控球時Kroos會退到左中堅位置,Rudy就長期留喺防線前面,唔會好似Khedira經常插上,明顯係驚好似上場咁被打反擊而部署。

戰術係成功嘅,面對瑞典442兩排防線雖然進攻上未取得明顯甜頭,但係攻勢穩步上揚,加上瑞典球員速度無墨西哥咁高,瑞典有幾次反擊德國都有足夠人手應付,成件事係平衡嘅。可惜人算不如天算,Rudy爆缸止唔到血之下被迫退下火線,換入Gündogan。Rudy係呢套戰術嘅重點,有佢喺中場逗住令德國前場,特別係兩閘可以放心進攻,而且Rudy被換出前德國嘅攻勢比上場對墨西哥流暢同快。

點知一換就出事,Kroos突然喺中場揀條高難度嘅傳球路線,想話係兩名瑞典球員中間傳俾Gündogan,點知被截之後連隨反擊,Tolvonen一逗破網。

領先後瑞典更加緊密防守,防線中場線平排守喺禁區附近,人馬疊雜加上身高優勢,德國好難攻得入。

所以路維果斷半場換入,雖然早早用左一個換人名額但仍然換入Gomez加強禁區內支配力,轉變戰術不斷用低空傳中塞入禁區搏亂。果然開波無耐就收到成效,Reus撞射得手追成1比1。

其後德國都有好多機會,不斷低掃傳中球入禁區,但瑞典嘅血肉高牆真係用身體去頂住,直至Boateng兩黃一紅被逐,德國都無慢落黎,成個形勢反而會擔心瑞典因為打多個心雄而放棄防守上前搶攻。

打少個後路維換埋Brandt入黎只打兩個防守球員,瑞典就愈縮愈後,令10個打11個嘅德國仍然主導比賽,瑞典幾次曝露禁區頂被起腳遠射,門柱同Oisen力挽狂瀾。去到最後30秒,Durmaz竟然喺禁區邊落腳犯規,雙手奉送最後黃金機會俾德國。

然後Kroos一腳救全家,將功補過,將德國由地獄拯救上黎天堂。

瑞典亦由天堂,瞬間跌落地獄。

而整個F組形勢變得非常混亂,下場德國對南韓基本三分穩袋,問題係瑞典下場非贏不可下,墨西哥其實一分都夠晉級。如果德國同瑞典都贏1比0,三隊同分兼得失球一樣,計入球墨西哥仍然佔優,德國同瑞典就連得失球都一樣...媽好複雜呀!!

標籤: 世界盃  德國  瑞典  
【世界盃 ng sick ball 街訪 — 第三集】

留言

會員
我要評論
請按此登錄後留言。未成為會員? 立即註冊
  • loklok14351
    loklok14351 於 24/06/2018 評論 NO. 1

    之後睇對賽成績
    再分唔到就會以攞黃,紅牌嘅數目嚟計分分數少d就排前d

快捷鍵:←
快捷鍵:→