羅馬對利物浦 賽後短評

足球理性分析 於 03/05/2018 發表 收藏文章

羅馬次回合要追3球談何容易?轉番做4後衛以433出戰,戰術亦非常簡單直接,不斷傳中轟炸製造混亂。

利物浦亦繼續以最強陣容應戰,不過就唔玩前場迫搶,俾羅馬係後場組織,乖乖從中場起建立防線,穩守突擊。呢個做法非常合理,手執3球何需同你搏拳?

果然9分鐘Naunggolan一個傳球失誤,羅馬自己申請將難度升級。雖然幾分鐘後Lovren解圍散中Milner彈入烏龍,但整個上半場羅馬空有攻門,但一球中目標都無,原因係傳中準繩度欠奉,經常俾Karius沒收。攻唔入之餘利物浦既反擊好有威脅,Mane直情踢到識飛,多次引球推進帶領反擊,不過羅馬對Salah既防守明顯比上回合好,好多時放俾Salah哨既波羅馬防守球員都包到。

羅馬係防守一角球攻勢時俾Wijnaldum頂入,半場以1比2完結。

講真半場完都諗住唔洗睇,但估唔到Dzeko係50分鐘追番一球,呢球源於Arnold既自爆,即刻醒一醒睇埋落去。

黎到呢個時候,羅馬都無乜可以變,只可以咬實牙關繼續攻,繼續傳中,羅馬亦都愈谷愈上,基本三個前鋒就係禁區等輸送。相對利物浦愈縮愈後,後防俾人既感覺愈打愈騰雞,Arnold多次係右路自爆令人睇到一額汗,其中個下手球球證睇唔到真係好好彩...

羅馬以Gonalons換走無力既Rossi,再換走一個中場Pellegrini,換入Ünder,直情轉打424繼續攻。呢個時候唔攻等幾時?羅馬機會唔係無,但偏偏每個機會都差d。去到80分鐘,好明顯見到兩隊都無力,仲有10分鐘羅馬仲要追3球先可以進入加時,羅馬球員係有d半放棄狀態,而利物浦只係希望捱埋落去。
不過Nainggolan一下世界波遠射,係86分鐘掀起反高潮,相信所有利迷都拎起救心藥。到最後補時3分鐘再輸12碼,呢下手球咁唔明顯反而吹...真係奇怪...
羅馬入完呢球球證正式吹雞完場,利物浦有驚無險入決賽。

其實呢場既戰術非常大路,簡單直接,羅馬瘋狂傳中,利物浦頂住再反擊,90分鐘不斷你來我往,正面搏拳,搏到後段大家都無力,羅馬只差致命一擊。

但係,球證今場既判決真係好差,我好少賽後特登討論球證既誤判,但今場真係有d離譜。兩邊旁證多次睇錯越位,不論得益係邊一隊,都試過被誤判越位,有d平排,有d差成半個身位都可以睇錯...仲要唔只一次

最明顯係上半場一開始Karius撲跌Dezko一球,Dezko明顯無越位,都唔係話差個膊頭腳尾個d程度。連防守佢既v.Dijk都無投訴,因為v.Dijk當時係背對旁證面對Dezko,傳球一刻佢知道自己包左越位...

然後Arnold球手球都好明顯,佢飛埋去擋射門時雙手明顯處於不自然位置,刻意擴大身體範圍去阻擋射門。雖然距離近但Arnold係知道波既去勢,唔係突然其來改變方向,同Klavan手球既十二碼道理相同。反而呢球Klavan手部垂低唔太明顯就吹到...真係百思不得其解

當然利物浦有幾球反擊明明無越位都被吹,只不過未去到門前爭議性無咁大...

講真連續兩晚都走漏手球,仲有乜藉口唔推VAR?
標籤: 歐聯  利物浦  羅馬  

留言


請按此登錄後留言。未成為會員? 立即註冊
  • Peter Pen 於 03/05/2018 評論 NO. 1

    冇錢冇名,唯有認命把
    輸比442-4, 有乜好講

  • wombat 於 04/05/2018 評論 NO. 2

    球證嘅執法係有啲爭議,但兩隊明顯係兩班波,賽果好似好驚險,利記根本係睇住嚟食

  • kinfung 於 04/05/2018 評論 NO. 3

    卡拉雲個球12碼咪又系黑左比你地,仲未計首回合個球12碼呀,仲講4424,羅馬撚知吾知醜呀

  • heungheung112 於 04/05/2018 評論 NO. 4

    James Milner 好慘, 無 la la 食球烏龍

快捷鍵:←
快捷鍵:→