熱刺對阿仙奴 賽後短評 文字

足球理性分析於 10/02/2018 發表 收藏文章

熱刺迎來魔鬼賽程最後一場,繼2比0擊敗曼聯,2比2賽和利物浦後,今仗對阿仙奴小勝1比0,三場不敗先為前四爭奪戰佔據有利位置。

今場熱刺主場出擊,當然會係主動既一方,同上兩場英超一樣以4-2-3-1迎戰,正選陣容無變代表普捷天奴認為已經係最強陣。果然上半場熱刺佔盡優勢,整個上半場都圍攻阿仙奴。特別係左路攻勢特別勁,基本上所有熱刺球員都圍係左路進攻,因為Son長期係左路發難,Alli又會走黎左邊配合,Eriksen就順勢移到中路,當阿仙奴球員都集中一邊防時,右路既Trippier就會空晒,不過熱刺唔多搵到機會轉邊,因為阿仙奴既防守做得唔錯。

阿仙奴對比上場大勝愛華頓,作出左一個調動,用Elneny代替Iwobi,加強番中路既防守,呢個舉動非常合理,作客熱刺唔需要鬥攻,追求穩健先係明智。阿仙奴防守時4-1-2-3,Elneny防守中場位置,Xhaka同Wilshere前一格,Ozil右邊Mkhitaryan左邊,最前Aubameyang。呢個倒三角既中場組合對番熱刺既正三角組合,剛剛好1個對1個。加上Ozil同Mkhitaryan既回防,基本上熱刺強攻左路都只係呈圍攻之勢,入肉既攻勢根本唔多。

阿仙奴進攻時就係將Wilshere推上一格到進攻中場,Xhaka同Elneny平排,形成4-2-3-1。Wilshere真係好勁,佢既控球充分利用佢既身高同低重心。佢留意到後而有追兵時會故事拖慢,但敵人去到佢身後先坐低個人變速轉向擺脫,
萬試萬靈。加埋佢既視野同傳送,如果無傷無痛下絕對有力係世界盃打正選。

不過一切就係下半場開波無耐改變,熱刺仍然係左路進攻,不過今次前場回防不及,Bellerín突然要1個對Son同Davies,就俾到機會Davies一個early cross搵到Kane,頭鎚破網。事後Monreal立即投訴Kane撳人,雲加亦有投訴,但Kane起跳一刻Koscielny並未係Kane底下,Kane起跳時並無借Koscielny力跳起,係Kane跳起後Koscielny向後退時退到Kane腳下,形成錯覺。

Anyway,熱刺領先後反而無急於追多球,反而拖番慢個節奏,有波都唔會亂咁斬上前俾Son或者Kane哨,呢一點值得一讚。因為如果係呢個時候加快速度追多球,就正正落入阿仙奴最鍾意既節奏,快上快落,突然之間幾腳one touch已經可以入波。熱刺並未有因為領先而失去節奏,減低左阿仙奴急於追番球既氣焰。

所以係呢個死局情況下雲加一定要變,收起Elneny同表現麻麻既Mkhitaryan,換入Lacazette同Iwobi加強攻力都非常正路。不過我認為Lacazette做正前鋒而將Aubameyang移向左路係非常不智,Aubameyang去左左路之後幾乎隱形,見到佢既時候就係傳中傳到底線既時候。Aubameyang最強之處就係係中堅身後,突然衝前轉向突破越位,擺佢係左邊要佢推幾步就減低左威力。寧願Lacazette同Aubameyang雙箭頭,Iwobi同Ozil左右中場打番個442。

普捷天奴有見及此換走Son換入Lamela,不過換入Lamela除左打反擊之外,最主要功用係用黎防守。Lamela剛出場打右邊時會跟Bellerín落到自己後場底線,但打反擊時又會爆上去。

熱刺係中後段打穩守突擊係非常成功,有幾球機會係可以拉開比數,不過Cech上身救左好多球,阿仙奴先可以保持追平既機會。

最後普捷天奴換埋Wanyama入黎擺明要死守最後幾分鐘,雲加亦最後一搏換埋Welbeck打三箭頭,不過要Ozil落到防中位,反而令到個波運唔到上去。最最後熱刺雖然話死守但條防守都推得幾高,Lacazette把握到Sánchez犯錯單刀,但個腳竟然斜出...就注定阿仙奴要全失3分。

呢場雖然1比0,但其實都幾好睇。
標籤: 熱刺  阿仙奴  英超  
【球迷世界 X Futbol Trend 睇波之夜 — 曼車大戰】

留言

會員
我要評論
請按此登錄後留言。未成為會員? 立即註冊
快捷鍵:←
快捷鍵:→