摩帥的孫子兵法

曼聯專區 於 16/10/2017 發表 收藏文章
雙紅會戰和利物浦,曼聯好明顯係用摩帥最擅長嘅大巴戰術。當筆者喺facebook講話曼聯防守至上,表現唔差嘅時候,好多專頁粉絲都有回應,對於愛隊疑似「無哂野心」感到心疼。而呢到,我哋就聽下2位主帥點解話先?

高普當然對曼聯的大巴不以為然:「好似曼聯咁頂級嘅球隊打防守,你仲點打入去?佢哋以1分為目標,我哋要3分;佢哋成功,我哋失敗。利物浦係主宰比賽的一方,而作為主隊亦應該做到。球隊表現我滿意嘅,只係唔到我去評論曼聯的表現。」摩帥呢?佢就話,自己唔係唔想攻,但係無理由無啦啦同你對攻噃:「我等緊高普轉陣,我想對手再主動啲,但佢哋始終都係保持3中場陣式。咁嘅情況下,中場佢贏哂,我方亦只有靴里拉同馬迪。換入福仔同連加特之後,我等緊對方換入史杜列治同蘇蘭基,但佢無咁做,反而位置換位置。所以由始至終佢哋中場比我哋強。」

無錯,足球去到摩帥的手上,就係一場博奕,亦即是孫子兵法的「先為不可勝,以待敵之可勝。」要自己立於不敗,先可以考慮點擊敗對手,一個唔小心搶攻反而被攻入的話,輸嘅係6分波。而考慮到中場有費蘭尼、普巴等人受傷,中場被對手力壓,再配以利物浦的逼搶打法,唔佈重兵的話,輸多幾球都絕對唔係奇事,如此戰術絕對可以理解。如果唔係預計中場會輸,摩帥唔會專心防守;同一道理,如果高普決定搶攻製造空間,摩帥亦會派遣福仔、連加特高速防反,到時比賽面貌就會完全唔同。

一直以來,對英超的分析都是「穩定勝於一切」,聯賽冠軍想當然要有霸氣,不過適時去轉攻為守都係好重要,好似車路士咁唔小心被水晶宮拎走3分,長遠而言對於爭標一定有影響。利物浦都有戰和屈福特、紐卡素;熱刺對車路士輸波而回,又喺般尼身上拎唔哂3分。唯一對手係場場大勝嘅曼城,實力上、氣勢上未必有對方咁好,要應付佢哋可以點?其實都係一句「先為不可勝,以待敵之可勝」,對弱旅一定要全取3分之餘,好似呢場雙紅會咁,對手秤先嘅比賽亦應該以不敗為優先諗法。唔通明知自己對攻輸硬,都要將勝負付託運氣之上?

標籤: 利物浦  曼聯  雙紅會  

留言


請按此登錄後留言。未成為會員? 立即註冊
  • Gary.C 於 16/10/2017 評論 NO. 1

    對利記保守可以說得過去,歐霸決賽對Ajax又如何解話,在普巴在陣下只取得3成多控球率,摩佬格言:為了捧盃,我唔介意醜陋踢法,華麗足球,娛樂球迷,留給雲加,高普,哥迪奧拿這些儍佬吧,足球歷史只會紀錄結果,唔紀錄過程㗎!傻仔!
    最後大膽說一句,摩佬是一個重視個人名譽大於球隊利益的人,你看他不斷游走於豪門班霸之間,領軍兩三年捧兩三個盃便走人,有報導他放風對執教PSG有興趣,個人估計是曼聯未能滿足他的捧盃慾望,醒下啦,曼迷別再神化美化摩佬了.個人意見,不喜勿插.

  • aczephyr 於 16/10/2017 評論 NO. 2

    泊大巴泊到好似榜尾球隊咁,冇晒紅魔鬼一向崇尚進攻既傳統同氣勢。咁泊法,搵郭家明教都得啦

  • Yan Jez 於 16/10/2017 評論 NO. 3

    人地有自己一套專業想法,為球隊好同有波睇就得啦

  • 單身狗 於 17/10/2017 評論 NO. 4

    #29內地球迷像你咁文明就好了,不會有黑哨,打球証等事情,人家不是要看進球,是要看悅目足球,踢得悅目有球味,0比0也是可觀賽事,這個你懂嗎?

  • 單身狗 於 17/10/2017 評論 NO. 5

    功利球迷,踢到一pet屎捧盃冇問題

  • tinchi3721 於 17/10/2017 評論 NO. 6

    “對強隊 贏唔到緊要但一定唔好輸 但對中下遊就一定要贏” 費格遜講既

  • AAL 於 17/10/2017 評論 NO. 7

    摩佬既曼聯, 每1次對利物浦都泊大巴, 唔通次次都傷中場?

  • Peter Pen 於 18/10/2017 評論 NO. 8

    孫子兵法乜加左死守到完場咩
    唔通係"敵不入,我不入"

快捷鍵:←
快捷鍵:→