曼聯專區小評:清道夫與百夫長

曼聯專區 於 02/08/2017 發表 收藏文章
馬迪成為最新加盟曼聯的球員,而摩連奴有幾喜歡佢睇嚟大家都有眼睇。不過「愛」係唔係有時而盡呢?有咗馬迪,咁同樣好得佢歡心嘅費蘭尼又會點呢?接受訪問時摩連奴講過,佢對費蘭尼嘅信任係唔會變:「加拉塔沙雷買我會易過買費蘭尼。」究竟曼聯陣中,係唔係需要咁多個高大中場?答案係,2位球員其實都有佢哋位置同工作,因為一個係清道夫,一個係百夫長,責任各不相同。

清道夫呢個位置真係唔易做,亦唔係人人想做,因為下三濫嘅工作、做丑人都係畀哂你。然而呢個位置一定要有人做,而摩連奴教過嘅每一隊波入面都一定有個清道夫,做最唔討喜但必要嘅工作。國米時代嘅迪亞高莫達、皇馬嘅比比、車路士嘅迪亞高哥斯達,個個都以小動作聞名於世,而每一個都深得摩連奴嘅支持。去到曼聯,呢個球員就係費蘭尼喇。佢多手多腳又多小動作,得閒陰一踭、有時撳人頂波,有必要時仲可以惹到對方犯規拎牌。所以唔少大賽摩連奴都喜用費蘭尼,因為呢啲比賽唔一定係鬥技術,有時都要鬥陰招。仲記唔記得4月曼市打吡?費蘭尼頭槌頂阿古路,摩連奴賽後係批評阿古路扮嘢,無穿無爛,而非講費蘭尼嘅不是。可見,一隊總要有一個咁嘅角色存在。

而百夫長,即係軍中指揮官都係好重要。自朗尼、伊巴離隊之後,一定要搵個鎮得住軍心,維持球隊爭勝決意嘅球員先得。呢個情況下,普巴太後生太輕挑;靴里拉太公子太文質彬彬;卡域克一來唔可以場場出,二來都係太溫文。熱血球員,可以邊到搵呢?馬迪身上就可以搵到呢種特質,2015年英聯盃決賽,佢即使被停賽無得出場都照舊喺車路士更衣室入面主持team talk,係唔係有啲朗尼嘅影子呢?再加上佢係摩連奴最信任的球員之一,伊巴不在嘅情況下馬迪可以代替摩連奴在場上指揮,「見馬迪如見摩」,對於球隊的穩定性、對於摩連奴戰術嘅交待,都有莫大嘅好處。

而更重要嘅係,兩個人都好適合依家嘅曼聯戰術,以身高去力壓對手,贏在起跑線之上。面對幾路戰線多一個中場其實唔多。曼聯依家在市場上買一個球員要幾貴大家都知,費蘭尼啱用之餘又同球隊夾到,正正就好似辣招之下嘅二手樓一樣「賣咗買唔返」,試問點會輕易放走呢?而馬迪可以提供到幾方面嘅支援,都係好重要嘅戰力。而佢嘅加盟令曼聯的平均身高又高咗!制空力、頭槌攻勢又強咗喇。所以,清道夫與百夫長,都係曼聯所需要嘅。


同場加映:馬達交波畀馬迪,再畀返個波馬達XD
標籤: 曼聯專區小評  費蘭尼  馬迪  

留言


請按此登錄後留言。未成為會員? 立即註冊
  • tinchi3721 於 02/08/2017 評論 NO. 1

    講得非常好有個專dirty work既人其他人犯規冇咁易罰

快捷鍵:←
快捷鍵:→