巴塞之誘!靴里拉點揀?

曼聯專區 於 31/05/2017 發表 收藏文章
又到夏天,當然又係買人嘅時候喇!不過曼聯想快刀斬亂麻嘅同時,都有球隊吼實曼聯嘅戰將!就好似華維迪接棒巴塞,第一件事就係想帶曼聯中場核心之一嘅靴里拉返西班牙!其實華維迪同靴里拉關係真係幾好,因為佢哋喺畢爾包合作過,曼聯出價時亦曾想留效靴里拉。如今時移世易,華維迪貴為巴塞主帥,而作為西班牙人,可以返去祖國發展對靴里拉而言絕對係吸引嘅。但係,靴里拉會點揀呢?

當曼聯贏到歐霸之後,其實有記者問過靴里拉有無長留曼聯嘅打算。當時佢就咁講:「有可能。不過要喺呢隊波留好長時間,你要每季都交出表現,其實唔容易。有好多球員都有能力去打一季兩季好波,不過我更為睇重穩定性。我依家只係27歲,希望有朝一日你會將我同曼聯一眾名宿相提並論啦。不過依家呢一刻一定未得住,我要喺英國最大型、最偉大嘅球隊表現自己,唔係易事。」

頭先一番言論係歐霸之後,即係華維迪未做巴塞教頭,家下唔同咗情況,靴里拉走唔走呢?會唔會因為同華維迪嘅關係就「入塞」呢?貴為2016/17年度曼聯最佳球員得主嘅靴里拉,佢個約其實仲剩返一年,雖然有條款曼聯可以優先加多一年,但係如果真係有大offer到,情況會點呢?其呢啲問題有必要問,但答案只有一個:就係畀份新約靴里拉啦!因為無論係skysports又好、ESPN又好,佢哋都收到風,理得你係巴塞定皇馬,靴里拉都唔會過檔!

其實靴里拉有幾喜歡曼聯,真係好明顯。好似聯賽盃曼聯擊敗曼城之後,佢就咁講:「當你係曼聯球員,你又深明球會歷史,你就會知道,為咗球迷你要尊重每場比賽。我知我唔係英國人,亦唔係來自曼市,不過我真係好愛好愛呢個球會。」要知道,佢喺雲高爾嘅年代,平均一年只得36個上陣機會,唔係人人都可以堅持到,所以真係有愛先得!守得雲開見月明,最終今年佢上陣50場比賽,成為陣中不可或缺嘅球員之一。難怪佢對摩帥心懷感激之情:「我真係好感激摩連奴,第一日佢嚟到就畀我好大信心,佢話我會成為佢一個好重要嘅球員。」

比起其他曼聯球員,佢真係無必要咁愛球隊。好似拉舒福特呢啲青年軍由細到大都效力曼聯,可以講係飲曼聯嘅奶水長大,佢哋對球會忠誠、一心一意,大家似乎都已經視為理所當然;再加上有傑斯、史高斯等人珠玉在前,亦令不少曼聯青訓球員自動成為曼聯忠粉。但係之前無連繫、無接觸曼聯嘅球員,嚟到之後一樣忠心之極的話,確係更易得到球迷愛戴,而靴里拉呢一種百分百愛球會、百分百付出、甚至唔介意百分百犧牲自己去成就球會嘅姿態,正正令佢極速成為曼聯球迷寵兒。

所以呢一刻,無論係球迷、球會、定係球員本身嘅情況,都反映出靴里拉留隊直情係唔需要諗。當獎勵下佢又好,當表達一下球隊留人嘅姿態又好,一份新約又係唔係有需要呢?

(PS:當靴里拉表明唔走之後,其實曼聯官方都有消息指好有信心留效迪基亞,因為佢放假之前無表示過任何去意,7月8日開操好可能可以見到佢歸隊。唔走點解?私心啲諗,馬達同靴里拉呢啲西班牙幫喺摩帥麾下都得到重用同埋信任,佢哋幫手說迪基亞留隊絕唔係奇事!)

標籤: 靴里拉  

留言


請按此登錄後留言。未成為會員? 立即註冊
  • chango 於 31/05/2017 評論 NO. 1

    我係摩佬,一定場場岀佢好過岀普巴

  • kinfung 於 31/05/2017 評論 NO. 2

    走啦靴里拉,一隊西甲第二歐聯八強,一隊英超第六歐霸冠軍,識揀啦,

  • howardyhy 於 01/06/2017 評論 NO. 3

    法比加斯真係前車可鑒,喺度係必然正選兼隊長人選又有歐聯有高薪,冇理由去

  • wahdee1115 於 01/06/2017 評論 NO. 4

    講到真一樣😂😂摩佬一陣話,拎尼馬加錢喇

快捷鍵:←
快捷鍵:→