摩帥「shopping list」目標又係4個人!

曼聯專區 於 26/05/2017 發表 收藏文章
唔計足總盃呀、歐聯,球季其實都完得七七八八,又係重整旗鼓、預備下一季嘅時候喇!咁預備要做啲咩架?就梗係買人啦!摩連奴都講到明,個清單已經畀咗艾活華架喇:「佢有我張shopping list喇,我想要咩、喜歡啲咩,接下來2個月想買到邊個,佢都知。所以以家個波交畀佢同埋曼聯嘅班主喇。我希望艾活華可以交到功課啦,因為我呢一刻要休息下,真係好攰。返到曼市,我就會揸車去倫敦,買機票返葡萄牙。呢一刻我唔掂足球架喇,要放假,自私都係咁話,國際賽唔好預我睇,因為夠哂皮喇。最後呢幾個月真係好辛苦,人腳越來越少,不過拎到3個盃、入到歐聯,呢季都算係辛苦年入面比較開心嘅一年。」

多個英國傳媒都表示,曼聯官方已經釋出少少「shopping list」內容,話摩連奴今季同上季一樣,只要4個!資料就係咁多,大家當然要估估下,邊個係目標啦!《ESPN》就話,呢幾個人可能係一個中堅,一個中場,一個攻擊球員,再加一位前鋒咁話。後衛人選入面,首選「回歸派」球員米高堅尼,11年到15年都仲係曼聯青訓嘅佢轉投般尼之後打出身價,佢會唔會係摩帥口中「我一早嚟就唔會賣」嘅其中一人呢?如果佢真係返嚟,隨時身價去到2500萬鎊架!不過買唔到佢,都仲有個華基爾雲迪積克可以揀,不過ESPN就話,回購堅尼嘅機會好似幾大!

中場就麻煩少少,因為目標人物係熱刺嘅艾歷迪亞,在情在理都好難叫熱刺放人;而車路士嘅韋利安情況都係一樣,係摩帥心儀嘅人物,但係好難買到!

比起呢2個選擇,反而前鋒就易搞,因為最大可能性就係要買基沙文!要買佢,最大難關一定係佢個「買斷價」,1億歐元先有得諗噃?你出得1億歐元馬體會都唔駛點諗啦?再加上佢自己又同普巴、馬迪爾熟,早幾日又講到明自己唔排除去曼聯,所以只要紅魔高層肯用呢筆錢,基沙文成魔?唔難!

而另一個英國權威傳媒《skysports》都大同小異,話曼聯最想要嘅都係前鋒同後衛,基沙文唔在講,後衛都係米高堅尼、華基爾雲迪積克揀,再加一個22歲超新星,賓菲加嘅連迪路夫。呢個球員都「傳曼聯」咗好耐,因為摩帥好喜歡佢咁話。

同樣都係4個球員,同上季一樣,筆者就認為最最重要都係前鋒。始終上季曼聯防守力已經有一定保證,失球29球排聯賽第二,只係入波唔夠、贏得唔夠,連般尼茅夫入波都多過我哋就知前鋒先係最重要一環。要知道伊巴傷重,加上唔知留唔留喺曼聯,再再加上佢都算係英超失機王之一,搵一個畀到穩定入波曼聯嘅球員都係好重要嘅。而另一個要點就係,張List好似無提過龍門...咁即係代表,迪基亞走嘅機會已經因為有歐聯打而減少?定係摩帥已經認定羅美路成為曼聯下一任正選門將,連個後備龍都唔諗呢?呢一切真係要睇多幾個星期先知喇...

據稱,摩連奴會放假到7月,歸隊之後會同大隊一齊出發去美國,而佢好希望去美國時已經買齊「所需物品」。咁啱,基沙文傳聞剛剛秘婚,而3個星期之後就會去蜜月旅行,佢都好想3個星期內決定自己未來。係唔係咁早就買到「新曼聯7號仔」?真係要睇實啲啦!

source:
http://www.espnfc.com/manchester-united/story/3133871/manchester-united-arent-planning-first-team-overhaul-this-summer-sources
http://www.mirror.co.uk/sport/football/transfer-news/manchester-united-poised-trigger-antoine-10501527






標籤: 基沙文  米高堅尼  

留言


請按此登錄後留言。未成為會員? 立即註冊
  • 閒雲野鶴 於 26/05/2017 評論 NO. 1

    想搵個人同基沙文開路?曼迷已經忘記咗自己有個費蘭尼

  • rickytct 於 27/05/2017 評論 NO. 2

    如果有睇今拿既馬體會,就會知道基沙文既防守意識高左好多。其實我覺得假如買到山齊山加基沙文,咁下年既曼聯應該真係變態

  • 閒雲野鶴 於 27/05/2017 評論 NO. 3

    以前嗰個基士文喺PSV就勁,去到車仔就同軍刀差不同,摩連奴都唔撈多咗十季領隊啦,我估再有新人嚟佢都有方案幫佢適應英超嘅。米希達利恩都開始多咗貢獻啦。

快捷鍵:←
快捷鍵:→