靴里拉、摩帥:將勝利獻給死難者

曼聯專區 於 25/05/2017 發表 收藏文章
大家有無睇波呀?辛苦咗64場比賽,聯賽成績雖然麻麻,不過歐霸終於叫有個交待,而且直入下季歐聯小組賽!賽後當然大家都有話兒啦,首先當然係4次入歐洲賽決賽都勝利而回、勝率達百分百嘅摩連奴,佢話今季真係好大壓力:「喺一個表現唔好嘅球季,有時我真係以為自己隊波係世上最差、我自己係世上最差領隊。但最終我哋贏咗3個盃,以贏歐霸嚟取得歐聯資格,而唔係以聯賽第3、第4嘅位置,更得到同歐聯冠軍打歐洲冠軍盃嘅資格,所以到最後我會認為今個球季係成功嘅。」

至於球員表現,大家有睇波都知,摩帥的「實用主義」、贏波就係最大目標嘅戰術表露無遺。而佢自己都直認不諱:「今晚係實用主義嘅勝利,係謙厚球員嘅勝利。今場波曼聯球員尊重對手,盡力去阻擋對手發揮質素、盡力去找尋對手嘅弱點。當然勝利要歸功一隊出色球隊,一隊基於實用主義同埋謙虛嘅球隊。我哋唔係史詩式隊伍,我哋只係謙厚嘅人。」

阿積士教練保沙同大家演繹一次咩叫做「實用主義」:「我從未見過咁嘅阿積士,佢哋應該係打優秀足球、力逼對手,採取主動嘅球隊。而今仗無辦法高位逼搶的原因,係曼聯只打長傳急攻,組織攻勢時一啲冒險精神都無。我認為呢場係一場悶仗,雙方都無咩出色機會。」無錯,所謂「實用主義」就係有啲以結果行先嘅味道,既然無必要冒險,就唔會畀機會你。老老實實,就算係費爵爺退休前幾年,都係用同樣嘅方式,因為去到決賽要諗嘅唔係點去保持球隊傳統風格,而係諗點去取得最後勝利。

而今場表現都非常出色嘅靴里拉,就認為勝利係應該獻畀曼市恐襲嘅死難者:「我哋真係好傷心好傷心,要生命定要足球?其實答案好明顯。昨天的訓練課真係好難過,但係摩帥同我哋講,我哋唯一可以做嘅就係為死難者贏個盃返嚟。我哋做到咗,雖然只係足球,雖然只係一個獎盃,不過如果我哋可以幫到手、畀到死難者家人1個巴仙嘅支持,對我哋嚟講已經係做到咗。」而摩帥都認為,如果人命同盃,佢揀前者:「個盃對我、對球會、對球員、對支持者都係好重要。但係如果盃可以換返死難者嘅性命,我哋會即換,唔駛諗。個盃會唔會令曼市開心返少少?可能,我哋已經盡咗力。昨天我哋取消了記者會,就係要好好調整自己,希望可以暫時忘記呢個悲劇,一個比起比賽重要好多嘅事件。」

逝者已矣,希望呢個盃真係可以令曼市有返少少開心,多返啲正能量,喺呢個時間,互相支持同埋加油真係好重要!

留言


請按此登錄後留言。未成為會員? 立即註冊
  • 閒雲野鶴 於 25/05/2017 評論 NO. 1

    如果呢場波係雲高爾甚至莫耶斯帶曼聯,真係分分鐘會睇少你阿積士,起勢叫啲人壓前啲去助攻。不過呢個係摩連奴,你想佢喺場決賽搶攻,除非班球員作反啦。

快捷鍵:←
快捷鍵:→