曼聯專區小評：你哋放過莫帥啦！佢夠慘架喇！ 精選

你可以當我哋幸災樂禍，可以當我哋貓哭老鼠，不過曼聯專區的兩位主編其實都認為莫耶斯真係好慘。佢盡哂力，大家有眼見；佢唔係唔想做得好，而係佢嗰套唔啱曼聯用。最慘嘅，係傳媒知道佢被炒嘅消息仲早過佢自己。喺英國呢個紳士之國，呢個係最大嘅侮辱。

22歲已經取得教練執照，莫帥細細個已經決定要將一生奉獻俾足球。睇返佢去到奧脫福嘅照片，佢有火、有希望，個人好似後生咗10年，佢真係想做好曼聯嘅教頭，嗰一刻想，呢一刻我估佢仍然想。不過，呢份工可能同戴上魔戒一樣沉重、會腐蝕人心。當年接手畢士比爵士嘅麥根尼斯（Wilf McGuinness）被呢份工吸乾吸淨，成個頭啲頭髮甩哂。莫帥無甩頭髮，不過佢蒼老咗好多、眼神亦疲憊咗好多。最難過嘅，係佢嘅嘢心同夢想就喺呢一刻支離破碎…

回望之前，呢個曾經係一位可以在場邊同文仙尼對罵、準備戰鬥嘅真男人，不過呢一刻佢甚至連傳媒都避見，點會唔令人心傷？1990年由卜比笠臣手上接過英格蘭國家隊教鞭嘅格拉咸泰萊（Graham Taylor）因為1993年時進軍世盃決賽周失敗，佢直情變成一位隱士，完全對外間不聞不問，甚至話自己「我一世人都會背負晉級世界盃失敗」呢個罪名。佢嘅下屬彭美（Carlton Palmer）去探佢時，直情同佢講你根本無做錯啲咩，又唔係殺人，佢應該好好做返自己。唔通大家都想莫帥好似格拉咸泰萊咁，一世背負曼聯罪人之名？

筆者認為，依家嘅莫帥應該好好抖一抖，不過唔代表佢嘅能力有問題，只係去曼聯對佢而言實在太大責任了。中型班背負嘅壓力較少，佢可以發揮得更好。就好似曼徹斯特晚報所講，紐卡素對柏祖越來越不耐煩，正考慮羅致莫耶斯。而如果與曼聯爭輸雲高爾，熱刺亦有傳會邀莫帥過檔，證明佢嘅優點仲有人識欣賞。呢啲都係俾佢放低身段，好好證明自己嘅地方。與其要為過去一年嘅失敗而收埋自己，不如用行動話俾大家知，呢一季只係時不我予，莫帥總有一日會返嚟，好似兩年前咁逼和曼聯、證明自己。