朗尼唔俾喺復活蛋上寫自己名！ 精選

邊個咁夠膽唔俾朗尼在復活蛋上寫名！其實，拒絕朗尼嘅只係一個普通嘅朱古力店店員，而被拒絕嘅亦唔係曼聯嘅朗尼，而一位係3歲嘅小朋友，只係同樣都叫朗尼啫。不過提到呢位小朗尼，就要用多啲篇幅講下喇！

小朗尼今年3歲，全名朗尼史高斯(Rooney Scholes)，大家無睇錯，佢本人已經包括哂曼聯的兩大傳奇喇！(不過佢同史高斯應該無血緣關係…)佢媽媽祖安妮史高斯(Jo-anne Scholes)係曼聯忠實粉絲，唔單止身上有簡東拿紋身，仲因為紅魔朗尼的關係幫個細仔改名做朗尼！唔單止，祖安妮可能仲有預知能力，因為朗尼史高斯有個阿哥叫安達臣史高斯(Anderson Scholes)，不過佢今年已經16歲，安達臣都只係來投7年，所以佢真係有先見之明！更爆嘅係，佢哋屋企有兩隻狗，一隻叫簡東拿、一隻叫貝碧托夫！你話喇，點可以唔服呢一家人！

事緣送復活節彩蛋俾自己囝囝係好幸福嘅一件事，於是祖安妮就要求朱古力公司幫佢寫囝囝個名落隻蛋到，點知員工竟然因為怕侵權，唔敢！祖安妮就話：「好可悲囉，因為怕大朗尼唔開心，因而唔俾寫我囝囝個名落蛋到。我想像唔到朗尼會因為有人寫佢個名落蛋到會唔開心！」不過筆者諗呢次都無季初咁驚險，因為朗尼傳要加盟車仔時，佢真係嚇到傻！而今次嘅事件，就以另一個方式完結，因為朱古力公司最後肯寫囝囝全名落去隻蛋到，佢唔肯嘅只係淨寫朗尼一個英文字啫。話唔定因禍得福，大朗尼睇新聞知道有呢個小朋友存在，親自去見個面呢？

來源：manchestereveningnews