曼聯最後希望:曉士復仇記

曼聯專區 於 08/05/2012 發表 收藏文章
領隊曉士將會在英超最後一周帶領昆士柏流浪對抗曼城,而呢場唔單止係曼市雙雄榮辱的關鍵,亦係曉士自己榮辱的關鍵,因為2009年曼城的領隊正正係佢!爵爺對曉士的復仇心寄與厚望:「我真係好想曉士仲係場上面對曼城!佢之前教藍月亮,被炒時其實曼城高層都幾唔念舊情,我知道曉士一定會記住呢個仇!我預期昆士柏流浪一定會全力以赴!」
爵爺:靠你喇!

其實昆士柏流浪戰意一定無問題,佢哋既有曉士嘅怒火,仲有護級嘅決心!坐擁37分的昆士柏流浪雖然排尾四,不過尾三嘅保頓只係落後2分,如果萬一保頓擊敗史篤城,就會將流浪逼入降班區!反之,只要和到波流浪就護級成功喇。當然,呢個戰果對曼聯都好有利,因為只要紅魔於同日擊敗新特蘭,就可以反壓曼城奪冠!
其實對上一次的對賽曼城只係贏QPR 2:3,唔一定輸梗架

當然,筆者對此期望不大,當紅魔對韋根、愛華頓同曼城三仗,將8分的優勢全部嘔返出來的時候,已經知道冠軍離曼聯越來越遠…不過一眾球迷都唔好太傷心,今年的曼聯表現其實絕不失色,拋離第3的阿仙奴達19分之遙,如果唔係面對猶如打遊戲機一樣坐擁無限金錢金手指的曼城,冠軍一早已經手到拿來。只要下年適度擴軍,加上一眾小紅魔的成長,必定可以更上一層樓!
標籤: 昆士柏流浪  曼城  曉士  

留言


請按此登錄後留言。未成為會員? 立即註冊
    快捷鍵:←
    快捷鍵:→