紅藍對碰 球員「對對」碰!

曼聯專區 於 02/11/2017 發表 收藏文章
車曼大戰,焦點除咗喺摩帥點樣迎戰舊東家之外,亦係幾位新球員嘅角力,好似曼聯有馬迪倒戈,亦有摩連奴口中比莫拉達更佳的盧卡古要爭表現。車仔方面,莫拉達要證明自己比盧卡古更好,同時又有巴卡約高要證明自己比馬迪更強。究竟呢場大戰會唔會係呢兩對競爭對手一決雌雄嘅時間呢?

先講盧卡古,表面上佢稍稍秤先,以7個聯賽入球壓住6球嘅莫拉達;助攻數就各有3個,打和。但係計返英超經驗,盧卡古比起莫拉達多唔少,之前話「唔知莫拉達適唔適應英超」、「盧卡古有保證」嘅講法,都可以講係煙消雲散。平手對碰,睇嚟要分勝負就要睇呢場紅藍大戰邊個有波入喇。只係再睇數據的話,盧卡古都咪話唔令人擔心,好似每場比賽盤球次數,馬迪爾一場平均有成4.3次,但「小魔獸」只有0.6次;盧卡古每場比賽製造的機會只有1.4次,再次比馬迪爾的每場3次壓倒。傳送準度呢?佢只有67.8%,馬迪爾有84.2%.......雖然摩帥話,「唔可以以入波定球員的貢獻與價值」、「人人都要尊重盧卡古」、「佢為球隊打出百二分的努力」,但如果佢仲係搵唔返入球觸覺,打破呢幾場嘅英超入球荒,睇嚟唔單止球迷會繼續噓佢,就連莫拉達都可以狠狠諷刺佢同摩帥……

但另一個戰場,馬迪好似比巴卡約高表現得好,呢個中場對碰贏返少少。米希達利恩就講過:「馬迪在中場責任重大,佢要負責重奪控球權。對防守而言呢個好重要。」而事實係,至今佢英超比賽中已經為球隊重奪控球90次,比起利物浦軒達臣83次、拖肥伊祖沙古爾86次都多!喺車路士嘅日子,大家都認為佢同簡迪拍檔無懈可擊,因為簡迪係攔截型球員,分擔馬迪嘅攔截工夫,畀佢再分波、轉守為攻。而家曼聯可能無簡迪呢種球員在陣,但馬迪明顯同靴里拉合作得幾好,因為後者都開始改變自己防中嘅角色,參與多咗攔截。至於巴卡約高,其實佢都已經開始適應英超,英超經驗老到的柏祖就認為佢有比起馬迪更優勝的地方:「2個人都幾唔同,巴卡約高力量同體能更好,只係佢未有出色嘅閱讀球賽能力。只要佢帶波跑動,已經足夠嚇死對手,對於突破重圍好有效果。只係今時今日的足球比賽,要好似馬迪咁控制中場節奏,喺後衛失位時適當補位,巴卡約高仲要好好學習。」

去到呢到,大家係唔係好期待呢場大戰有咩火花呢?最好就梗係馬迪、盧卡古、摩連奴齊齊爭返口氣啦!

標籤: 盧卡古  馬迪  

留言


請按此登錄後留言。未成為會員? 立即註冊
  • chango 於 03/11/2017 評論 NO. 1

    曼聯係C朗之後,終於有高大靚仔😂馬迪,吾好話Pogba 靚仔呀😅

快捷鍵:←
快捷鍵:→