盧卡古咩都好,只有一個弱點?

曼聯專區 於 10/07/2017 發表 收藏文章
交換人質遊戲接近完結,你畀朗尼我、我畀盧卡古你,睇嚟大家都攞到大家所需。睇返盧卡古,數據上好似真係咩都唔錯咁,可能只係比哈利卡尼弱少少,但佢都唔係絕對無敵,都有一個問題。

唔好講衰嘢先,先講盧卡古的好,過去4年來拖肥入波都係靠哂佢,可以一季入夠25球嘅愛華頓球員,對上一個已經係30年前出現。上季拖肥有4成入波都係來自盧卡古,又難怪佢哋企得咁硬、價又咁貴,試諗下人哋買走你入波嘅穩定來源,之後幾季搵唔返個入波責任者都幾大鑊。
技術上,雖然偏重左腳但右腳一樣識識哋入波,再加上頭槌唔差,上季英超得基奧特同埋荷西朗頓入頭槌波多過佢,即係話頭槌入波佢係2016/17英超第3人。身位呢?佢自己講過:「我拎到波同開始跑,你最好避埋一邊喇,唔避開下一秒你就瞓喺地上面架喇。」而佢仲有一樣殺著,就係:速度。時速35公里,英超只有沙恩朗、拉舒福特同埋「華dee」快得過佢,你都咪話唔得人驚。

只係令人好驚訝嘅係,佢大份、跑得唔慢,但偏偏係…懶。佢平均一場波都跑唔夠9公里,15/16球季入面係全英超跑得最少嘅球員;上季好啲無包尾,不過作為前鋒的話,都係英超第一,由尾數上嚟。可能佢真係比較重身,跑步好辛苦啦…
如果真係要分析,跑動少嘅球員對於全場壓迫性打法嘅球隊嚟講係好不利嘅,人人逼搶先可以做到逼甩對手的效果,你一個跑得少,意味其他隊友跑埋你嗰份都未必有同樣果效,所以畀利物浦的話,佢哋多多錢都唔會買盧卡古,因為佢哋信奉「人人盲搶球」戰術。但係曼聯自雲帥開始已經唔打壓逼,反而係打控球在腳、節奏行先,有空位先會作出一口氣突擊;又或者打防反,以消弭對手攻勢為第一要務。所以單打獨鬥嘅target man 對曼聯嚟講先重要,佢吸引咗對手目光,仲可以拉空空位畀其他球員打快速突擊。

只不過,懶始終都唔係一件好事,如果下季場場波都見到盧卡古等波到,我諗球迷都一定激死。所以呢,嚟到曼聯拜託你要跑多少少喇!
標籤: 盧卡古  

留言


請按此登錄後留言。未成為會員? 立即註冊
  • tinchi3721 於 10/07/2017 評論 NO. 1

    跑得小 跑得小又點 係供應小既情況下都入到20球以上 呢d前鋒先勁 我念佢入到20球以上仲邊個理你跑左幾多公里

  • 閒雲野鶴 於 10/07/2017 評論 NO. 2

    當年摩連奴唔鍾意出馬達,喺皇馬又𨳒9過奧斯爾係咩一回事,就懶都可大可少😏

  • Marjill 於 11/07/2017 評論 NO. 3

    水貨🤣

  • Estyip 於 12/07/2017 評論 NO. 4

    跑得少係因為戰術問題,打防守反擊點會跑得多?

快捷鍵:←
快捷鍵:→