曼聯專區小評:狂攻吧!紅魔鬼! 文字

曼聯專區於 28/08/2017 發表 收藏文章
今季第三場比賽要到下半場先開到紀錄,可以話係唔算順利。呢一場比賽我哋可以見到啲咩?同之前比又有咩唔同?無錯,最大嘅分別一定係銳利度。好似上年對般尼茅夫,同樣都係對比較弱嘅對手,同樣都有球員射失12碼(係伊巴射失);而且對手仲打少一個10人應戰。最終呢場比賽曼聯1:1和波收場痛失2分,而呢種「無2分」的痛楚整季都影響緊球隊。如果用同樣嘅精神面貌,剛剛過去對李城嘅比賽最終慘食光蛋都絕不奇怪。但係今場曼聯做到咗,正選球員打唔破嘅僵局,有後備球員去幫幫手,成就一個開心嘅晚上。

唔係話曼聯今季實力脫胎換骨,而係講緊一種「升級版」嘅精神面貌。上年好多時都有一種差啲啲、差啲啲,但硬係上唔到力嘅感覺,明知差一腳就可以拎走3分,偏偏嗰腳硬係唔中。筆者上季不厭其煩、重複指出嘅「伊巴依賴症」,好可能就係原因。上年完全控制戰局,但對手防守出色、專心泊大巴之時,唔單止球迷,連球員都旨意伊巴一個人以竟全功,所以當獅子入唔到波,最後就真係入唔到波。

另一方面就係唔止精神上,就連身體上都幫唔到球隊入波。喺未能完全掌控中場嘅情況之下,好多時普巴、靴里拉都要退到好後做防守,唔係唔想幫伊巴,而係連防務都未做到安心,係唔放心去助攻、去幫手。變相中前場連繫弱咗,攻擊點又收窄咗,令曼聯上季攻力不強,難以捉到鹿兼脫到角。

而今季單係講心理上,已經有更多人去分擔前鋒嘅工作。盧卡古係勁,但未至於係神級前鋒,馬迪爾、福仔心理上壓力無對住伊巴咁大,放手放心去進攻、去發揮,幾線進攻之下,信心自然非上季可比。再加上身體上亦有更多空間去參與,因為今屆有馬迪來投,令中場控制力、搶截能力都大大增強,解放咗普巴去連繫中前場。大家應該都感覺到今季普巴助攻時間增加唔少,單係上場比賽已經有7腳攻門,直接攻門之外亦連繫咗唔少其他攻勢。呢到已經唔提太多盧卡古身體超強抗性、步大力雄為對手帶來幾多麻煩、為隊友帶來幾多空間。

曼聯贏過唔少英超冠軍,我哋大可以由勝利當中找出「冠軍相」。好似96/97球季,曼聯成季失44球,同期的布力般失波更少,但係佢哋都只可以排第13;曼聯呢?拎冠軍。由此可見,防守係好重要,但係要勝利的話你先要有入波。98/99球季、99/00球季、12/13球季,曼聯都係入波冠絕英超列強,最終亦拎走聯賽冠軍。簡單講,就係失波多少少唔緊要,最緊要入返夠多,分數自然夠力壓對手。唔好忘記,11/12球季之所以失落聯賽冠軍,正正因為得失球唔夠好,畀同分的曼城擊敗,間接亦令爵爺決心引入尖刀雲佩斯,以免重蹈覆轍。而上季問題就係唔夠銳利、應該全取3分的比賽最終和波收場,入球數字唔夠多,最終飲恨。講到尾,足球都係有波入先有得贏嘅運動嘛。

所以今季呢個開局無疑為球員進攻嘅信心打咗支強心針,往後嘅比賽會更夠膽去攻,呢個就係同上年唔同嘅精神面貌。依家話曼聯好勁好有機會?絕對言之尚早,地獄賽程、4線作賽都未開始,又未面對強隊挑戰,真係咩都有可能。只不過早早出現連勝、大勝,為分數、為得失球打個底先,對於球隊靈活佈陣都有好大幫助,面對要歐聯、聯賽取捨嘅情況下,都有得放軟少少手腳,有啲空間去和波、輸波。所以你話後防今年幾好,筆者當然都好認同啦,不過筆者更想嘅就係可以延續季初攻擊強勢,喺球隊有咁嘅銳利度時入多啲波、贏多啲比賽,早著先機!
標籤: 曼聯專區小評  

留言

會員
我要評論
請按此登錄後留言。未成為會員? 立即註冊
  • Isaac Lee
    Isaac Lee 於 28/08/2017 評論 NO. 1

    狂攻 好過 猜猜猜

  • TseMing Samuel
    TseMing Samuel 於 28/08/2017 評論 NO. 2

    真係好欣慰 佢地而家係未4線作賽,有傷兵既情況下,做到應該要做既野

  • Cheung Pak Ho
    Cheung Pak Ho 於 28/08/2017 評論 NO. 3

    呢篇文。 廢到嘔

  • Tat Kay
    Tat Kay 於 28/08/2017 評論 NO. 4

    似啲學生作文

  • Zhemo  Chan
    Zhemo Chan 於 28/08/2017 評論 NO. 5

    昔日的红魔返嚟啦!

  • Mo Moming
    Mo Moming 於 28/08/2017 評論 NO. 6

    期待,紅魔戰利記

  • Marvin Wong
    Marvin Wong 於 28/08/2017 評論 NO. 7

    盡力打就可以,輸贏是其次,打得落力,fanz最開心

  • Rex Wong
    Rex Wong 於 28/08/2017 評論 NO. 8

    從前紅魔鬼應贏必取,勢均時坐和望贏,當然夠分時又會出現怪賽果...揾次真銀😅

  • Chiho Chan
    Chiho Chan 於 29/08/2017 評論 NO. 9

    對返隊強隊先見真章

  • Marco Leung
    Marco Leung 於 29/08/2017 評論 NO. 10

    利物浦都係打快
    相對利物浦
    曼聯兩翼唔夠人快

  • Donald Choi
    Donald Choi 於 29/08/2017 評論 NO. 11

    搶攻攻到對面冇氣,6x分鐘即換前鋒+爆炸頭

    斬斬斬!

  • Zhing Yi Cheung
    Zhing Yi Cheung 於 29/08/2017 評論 NO. 12

    其實如果有睇利記同車仔d波,你會發現曼聯傳波配合同進攻節奏比較慢,難以撕破對手防守
    不過今季死球處理同反擊都進步左

  • Toni Tse
    Toni Tse 於 29/08/2017 評論 NO. 13

    ,二

快捷鍵:←
快捷鍵:→