曼聯專區小評:歐戰「殺死」曼聯!誰可救紅魔?

曼聯專區於 30/11/2016 發表 收藏文章
曼聯今季成績仍然麻麻,好多評論、好多抽秤,唔少人都試圖去分析原因,而其中一個就係話歐霸之戰對曼聯影響頗大,而曼聯的對手好似車路士、利物浦之所以可以排次席同第三,同佢哋唔駛參戰歐賽亦好有關係。呢個講法有幾真呢?不妨又睇睇實情。

要睇梗係睇今年出戰完歐霸之後,聯賽成績係點。先係9月5號對飛燕諾,曼聯最終輸一球,不過摩連奴其實已經無咩點用主力,好似伊巴、朗尼、梳爾都無出過嘅。結果呢?結果係之後嗰場波輸咗畀屈福特3:1,聯賽連敗3場。第2場歐霸比賽9月29日上演,呢場波曼聯係贏嘅,1球小勝索爾亞。不過呢場就有幾多主力在陣,伊巴、普巴、連格特、朗尼都有上場。2日後對史篤城,曼聯就係飲恨以1:1戰和對手。第三仗,對費倫巴治終於都大勝一場4:1,不過3日之後對車仔就大敗一場4:0,完全見唔到有振軍心的作用……然後就係2:1輸返畀費倫巴治,陷入歐霸的絕地危機當中,偏偏3日之後對史雲斯曼聯就贏返場3:1。之後4:0大勝飛燕諾,幾日後對韋斯咸又和波失分而回。

無錯,今季曼聯嘅比賽入面,係無試過嬴完歐霸嬴聯賽架!而且歐霸比賽之後嘅聯賽戰果真係慘不忍睹,5場比賽入面只得1勝2和2負,5場比賽得5分…更重要嘅係,睇得出摩帥試過衡量輕重,輪換球員去應付歐霸比賽,不過效果其實麻麻,有啲兩頭唔到岸。有時真係無計,好似對費倫巴治輸波嘅一場,摩帥無起用到伊巴、馬達等人做正選,反而重用馬迪爾、拉舒福特、靴里拉等人,人腳嚟講筆者其實認為幾討好,不過結果係無辦法取得勝果……

即係話,依家呢個時候對摩連奴嚟講,其實仲捉緊路點去輪換同最優化各戰線嘅成績,不過好似一直都未有一個好有效嘅方式…最慘係,戰線真係唔等人,好似嚟緊又有聯賽盃喇。對住上仗好鬼硬嘅韋斯咸,曼聯又有無方法可以好好突破到呢?外媒就收到風,摩帥決定今晚放手一搏試新嘢!

試咩新嘢?skysports話可靠消息指,喺普巴同費蘭尼因為領黃次數「達標」需要停賽嘅重要時刻,上一場入選後備名單嘅小豬好可能臨危受命,今季第一次為曼聯披甲上陣。早前筆者都有寫過一篇有關小豬嘅文章(曼聯專區小評:我們都需要小豬),講到佢嘅正面態度對於激發隊中士氣、鎮一鎮小將軍心有莫大的作用。如果真係誠如skysports所講,只要小豬夠fit摩帥就唔會排除畀佢打正選嘅機會,咁就係一個好機會去試一個對應歐戰的新方法。以小豬嘅大戰經驗,世界盃又打過、歐聯又打過,同埋喺德軍佢嘅領導能力,佢隨時可以組織到一隊主力應付盃賽嘅「曼聯別動隊」。一眾無咩機會嘅小將同邊緣人組織起上嚟打出成績,又可以分擔到曼聯聯賽的壓力,點睇都係利多於弊。所以話,筆者真係好希望今仗見到小豬之餘,仲見到佢可以發揮指揮官能力,畀一個新選擇摩連奴!


標籤: 曼聯專區小評  
【新Monday X 球迷世界呈獻-足球街場N件事】

留言

會員
我要評論
請按此登錄後留言。未成為會員? 立即註冊
  • 牛火
    牛火 於 30/11/2016 評論 NO. 1

    我都希望見到🙏🙏🙏

  • Nelson Tang
    Nelson Tang 於 30/11/2016 評論 NO. 2

    理智啲啦。 鏝城、阿奴都要打歐聯啦,重要出埋線呀。

  • 評 · 曼聯
    評 · 曼聯 於 30/11/2016 評論 NO. 3

    事實證明, Carrick還是不可取代, 一日唔出Carrick/搵唔到同佢同level的球員, 一日都唔會有穩定成績

    小豬係呢一刻的唯一希望, 佢同Carrick輪換, 每場賽事都要出佢地是但一個, 係目前最好辦法

  • Cheuk Hang Law
    Cheuk Hang Law 於 30/11/2016 評論 NO. 4

    點解係歐戰殺死曼聯 唔計歐聯果幾隊 同係打歐霸 修咸頓都冇曼聯咁差啦

  • Kenny Ho
    Kenny Ho 於 30/11/2016 評論 NO. 5

    根本唔關事,曼聯大把人,輪換咪得囉

  • Wing Chuen Kwok
    Wing Chuen Kwok 於 01/12/2016 評論 NO. 6

    小豬其實仲踢得嘅,佢在中場做分波唔差

快捷鍵:←
快捷鍵:→