曼聯專區小評:最傷球隊就係「傷」 文字

曼聯專區於 19/10/2017 發表 收藏文章
歐聯險勝賓菲加,賽後摩連奴咁講:「我永遠都唔會談論傷患。比起其他領隊會哭喪球員受傷,我係唔會咁做。我哋要做嘅係忘記受傷唔出得嘅球員,畀啲信心可以上陣嘅。我可以喺接下來5分鐘為伊巴、普巴、費蘭尼、盧祖喊出嚟,但我唔會。就等我哋用手頭上可用嘅牌繼續比賽。」

口講唔會受傷患影響,實情係曼聯嘅表現好明顯同受傷球員掛鉤。相比起季初入球停不了,呢兩場曼聯攻力明顯啞火,某程度上同陣中2個重要球員有關:普巴同費蘭尼。先講普巴,如果話摩連奴組軍係圍繞佢而做其實絕不誇張,引入馬迪就係要分擔普巴的防守工作,解放佢攻擊中場嘅特質。未傷之前佢喺聯賽入2球、助攻2球,每場射門4.3次、關鍵傳送達2.3次,自已作為威脅之餘亦加強了身邊隊友的威脅,福仔、馬迪爾嘅高水準表現同普巴的支援不無關係。身型高、身體對抗性高,對於摩連奴壓制式戰術好啱用,無論係中途攔截、打亂對手部署,定係拉開空位進攻,都有莫大功效。所以佢一傷,曼聯的攻勢絕對受到影響。

呢個時候,就到費蘭尼出場。雖然佢無普巴咁具威脅,打法亦唔算係細膩獨到,但佢「繞口巉手」嘅打法某程度上補足咗曼聯中場控制能力。防守不在講,一時踭頭行先、一時多手多腳,件頭又大,對手中場要舒舒服服拎到波真係唔易。而身高優勢令頭槌二傳、攻門俱佳;心口控波亦係佢擅長一環,作為hold 波中場佢嘅表現絕對唔算差,普巴「打亂對手部署」、佔領中場的任務其實費蘭尼都做得到。於是,即使9月中左右普巴已經受傷,曼聯都仲可以打出大勝水晶宮嘅比賽。
無錯,之後就到國際賽期費蘭尼都傷埋,中場危危乎唔夠人,令雙紅會一直受制於對手三中場打法,逼不得已盡打守勢,求仁得仁拎一分走。去到對賓菲加,明顯地馬達、靴里拉嘅比賽方式未同攻擊線嘅球員擦出火花,曼聯最終都只得10次攻門。

而另一個數字亦反映出問題出在中前場,因為今仗防守力依然強大,對手11次攻門一次都無中龍,可見後防逼搶做得依然唔錯,只係問題去返「入唔到波」。睇睇盧卡古,成場比賽掂波37次,係龍門之外掂波最少嘅outfield player,攻門次數亦都捉襟見肘,可見前場供應係何其不足。
不過依家最大嘅問題,係入唔到波已經去另一個層次,因為一位今季為曼聯貢獻過6個入球、4次助攻嘅球員又受傷,其實今場波贏到都係靠佢:拉舒福特。就連BBC Sports編輯都稱他為「真正的打破僵局者」,可以化負為和;將和變贏,甚至認為盧卡古對於戰勝強隊未必有入球,要打敗曼城阿仙奴要靠福仔。

依家我哋只可以希望福仔真係有福,因為佢長唞的話曼聯前線會再進一步無力化,但呢一刻連摩帥都講唔到佢有幾傷:「原本我以為只係抽筋,佢太落力跑,可能太攰了。但佢同我講係膝頭,佢感覺到佢有事。我希望唔係好大嘅問題啦。」呢一刻,阻礙曼聯嘅可能真係傷患問題,最理想當然係已經復操嘅費蘭尼快啲重回賽場,而福仔又無事啦!當然,仲有個傳聞已經同一隊一齊操嘅伊巴!


標籤: 曼聯專區小評  

留言

會員
我要評論
請按此登錄後留言。未成為會員? 立即註冊
  • Shaco Chau
    Shaco Chau 於 19/10/2017 評論 NO. 1

    個個都傷 唔通個個都想傷咩...

  • Jose Ho
    Jose Ho 於 19/10/2017 評論 NO. 2

    伊布就翻来啦。

  • Larry Yik
    Larry Yik 於 19/10/2017 評論 NO. 3

    國際賽後也影響很大。

  • 張志成
    張志成 於 19/10/2017 評論 NO. 4

    收得咁高的週薪,吾搏比你摩佬插,搏就做容易受傷的男人.

  • Raymond Cheung
    Raymond Cheung 於 19/10/2017 評論 NO. 5

    希望福仔膝傷是小事,休息一星期康復。

  • Ni Ng
    Ni Ng 於 19/10/2017 評論 NO. 6

  • Thomas Li
    Thomas Li 於 19/10/2017 評論 NO. 7

    幾時到迪布尼。。。咁曼聯就有機會了。

  • 翟兆基
    翟兆基 於 19/10/2017 評論 NO. 8

    有冇消息傷幾耐..

  • Willis Hsueh
    Willis Hsueh 於 19/10/2017 評論 NO. 9

    其實費蘭尼普巴一個月內可以回歸......傷兵係多,但只要捱過呢兩個星期就ok.

  • 巴克萊
    巴克萊 於 20/10/2017 評論 NO. 10

    p仔返來啦

  • Lai Wing Fai
    Lai Wing Fai 於 20/10/2017 評論 NO. 11

    摩佬就邊個勁就出死邊個,仲要場場出,雖然70分鐘會換馬仔入黎,但對個小朋友黎講,太多場次要佢打啦

  • 朱昌強
    朱昌強 於 20/10/2017 評論 NO. 12

    年年都有人傷I有冇提升番几个年青球員入一隊!好似當年費蛇提升七小福

  • Nicky Chan
    Nicky Chan 於 20/10/2017 評論 NO. 13

    福仔無事呀-.-

快捷鍵:←
快捷鍵:→