曼聯專區小評:太慢的刀「鋒」利都無用

曼聯專區於 12/04/2017 發表 收藏文章
入正題前,睇睇傑斯早排點講曼聯:「應該去學下利物浦。佢哋無一個前鋒可以入夠20球,不過佢哋嘅入波來自球場的每一個位置,好多個都在神手榜前列榜上有名。曼聯一定要做得到,伊巴離隊又好留隊都好都無所謂,因為球隊中每個人都識入波嘅話伊巴走唔走根本就唔重要。所以伊巴依賴症真係唔要得,大家都要努力先得。唔可以依靠一個人,因為佢總有不在陣的時候。上年李城有華迪入好多波,都有馬列斯入好多波。我以前?我自己一季入7、8球,碧咸都有7、8球,史高斯都有7、8球。不過同時4個正前鋒都係一人7、8球,就連後衛都識入波。」

其實睇人腳,季初大家真係以為曼聯係可以好多波入,因為新買返嚟嘅伊巴、普巴、MK仔,可以話係集德意法三大聯賽嘅助攻達人於一隊當中,佢哋入唔到波,其他人都入到卦?實情就係,普巴+MK仔都只得7個聯賽入球,其他人亦唔係幾見到受惠於呢3個球員嘅助攻,今季助攻王仲要係朗尼。問題,出喺邊?

一字記之曰:慢。無錯,比起雲高爾時代,曼聯的攻擊係多咗好多,不過節奏上算唔算得上係快呢?應該唔算喇。講嘅唔係前鋒慢唔慢,歷代魔鋒其實鮮有以速度見稱,講嘅係轉守為攻嘅速度。英超嚟講,人人體能都咁高咁大,唔少中下游球隊都有體能非常好嘅球員。有時呢一邊攻完,「咋」一聲20個球員幾秒就跑返哂去另外半場,呢啲就係英超特色,亦係點解可以咁多變數嘅原因。但係,呢個亦係曼聯呢一季攻極唔入嘅原因。普巴上腳?慢。費蘭尼上腳?慢。馬達上腳?慢。米希達利恩上腳?佢個人係快,亦喜歡向前推進,但係一個人跑得幾遠?如果對方攻擊完,成班球員留喺曼聯半場,MK仔策動反擊帶波跑足40碼去到門前,仲有無力攻門呢?

無錯,曼聯依家嘅慢在於太小心翼翼、在於轉守為攻都步步為營,對手好多時都有時間同空間空群回防,迎接曼聯的攻勢。如此一來,要打開缺口好多時就要靠個人資素,靠伊巴的強大攻門能力、靠米仔福仔嘅速度。要靠節奏上加快,做得最好一定係卡域克,佢一推一擺腳就大腳送出致命傳送,喺對手回防之前就造成曼聯快馬1對2甚至係1對1嘅有利情況,不過隊中又有幾多人可以好似佢咁?而實情同數據話我哋知,有卡域克的話曼聯的入球率同勝率都係高啲嘅。

老老實實,曼聯今季的數字其實我哋應該好好稱讚,至今只得24球失球,榜前6只得一隊熱刺失波少過我哋,利物浦、阿仙奴甚至失40球前後,差唔多失波多過我哋一倍。不敗?大家都聽唔少,21場不敗真係唔係咁易做到。不過呢個好明顯就係「雲高爾系」嘅常態,佢同摩連奴都係以防守強大見稱,偏偏攻擊方面始終都係未搵到門路,偏偏我哋嘅入球數只得46球,比起前6隊隊都有60球以上,攻擊真係需要改善嘅一環。

咁如果下季真係要改,買咩球員好呢?第二前鋒其實係要嘅,學傑斯講,有華迪都要有馬列斯;有沙迪奧文尼都要法明奴、古天奴;哥斯達都要有夏薩特啦。不過加強版卡域克都係另一個必要目標,喺對方空位最多嘅時候,放出致命傳送畀福仔哨、畀馬迪爾扭、畀伊巴怪腳射門、畀普巴中距離爆射。筆者不厭其煩,要搵請搵摩迪、小白、卻奧斯。仲用費蘭尼駁腳?算吧啦。
標籤: 曼聯專區小評  
【新Monday X 球迷世界呈獻-足球街場N件事】

留言

會員
我要評論
請按此登錄後留言。未成為會員? 立即註冊
  • Dung Derek
    Dung Derek 於 12/04/2017 評論 NO. 1

    呢樣其一,最主要係每個球員個心態係不求有功但求無過,每個人回傳多過食飯!個個都唔敢放直線或者吊d過頭波,係得mk同普巴敢做下。但其他球員,又懶無球走位小!如果多d球員有連加特個種勤力走位,根本唔會踢到依家咁!one touch pass極小!每個人都要上下腳,普巴最嚴重!今季最靚個下one touch 都係馬達對李城入個球叫做最好!

  • 梁嘉樂
    梁嘉樂 於 12/04/2017 評論 NO. 2

    佢呢幾場其實都不在狀態,頂盡得6乘。。。。

  • Scottie Shiu
    Scottie Shiu 於 12/04/2017 評論 NO. 3

    睇返對羅馬場7個1皮,佢真係冇得頂

  • Kinming Fung
    Kinming Fung 於 12/04/2017 評論 NO. 4

    有摩佬曼聯都變不了乜嘢花樣

  • Kim Pan
    Kim Pan 於 12/04/2017 評論 NO. 5

    其實慢係一個問題靠i9都是問題,但近幾季曼聯都有一個通病進攻慾望小同往往入左第一球之後球員啲心態即刻改變

  • 巴克萊
    巴克萊 於 12/04/2017 評論 NO. 6

    當年買靴里拉係想佢做呢個位好似魔迪咁 控制節奏 可惜都係工兵一個

  • TseMing Samuel
    TseMing Samuel 於 12/04/2017 評論 NO. 7

    都話改造自己隊既blind ,

  • Yan Ting Lam
    Yan Ting Lam 於 13/04/2017 評論 NO. 8

    人老左 狀態當然唔會成日都係到既 但今季表現確實係好好 起馬由摩奴用佢開始 差唔多場場有貨交

  • 謝顥源
    謝顥源 於 13/04/2017 評論 NO. 9

    巴塞都係慢.......唔怪得知攻極都唔入......唔好話長傳......連傳波都少......利巴

  • Hang Lau
    Hang Lau 於 13/04/2017 評論 NO. 10

    明明有小豬 舒利達連,結果重用廢蘭尼,買咩人都冇用啦

  • Yiu Wong
    Yiu Wong 於 13/04/2017 評論 NO. 11

    曼最大問題係d人既心態,v92教到隊波唔敢進攻,控球勝過入球,輸緊一比零仲不斷回傳,橫傳,唔知以為贏緊三比零tim,一時三刻都唔係咁易改善,因為人腳上分別唔大

  • Jimmy Lee
    Jimmy Lee 於 13/04/2017 評論 NO. 12

    好掛住史高斯式長傳

  • Meo Lai
    Meo Lai 於 13/04/2017 評論 NO. 13

    史高斯最後幾年就是移後去控制節奏,如朗尼真的願意改變做這角色,或者不用買人回來!

  • Squall Tsui
    Squall Tsui 於 13/04/2017 評論 NO. 14

    佢短途衝刺唔快但跑速唔係慢更仲要嘅係佢踢法唔洗好快已經好有表現同優點. 睇下呢腳追Aguero啊.. https://youtu.be/t2u1f3GGRZ0?t=160

  • 朱昌強
    朱昌強 於 13/04/2017 評論 NO. 15

    下年買番個史高斯式中場球員吧!一定要23歳以下

  • Roger Ho Chi Chung
    Roger Ho Chi Chung 於 13/04/2017 評論 NO. 16

    以前史高斯[尤其老咗]咁快, 淨係攞腳波再調整身體, 已經快咗半秒再拉弓放出去又快半秒。 一秒鐘嘅空間已經有好幾米。
    而家嘅戰術主要係球員交錯走位拉空對手,但始終射得少,把握力唔夠。

  • Estyip
    Estyip 於 13/04/2017 評論 NO. 17

    小豬都識做快反波,點都好過費蘭尼!同埋依家曼聯既小組推進接近零!又冇K角長傳換邊!

  • Gerund Cheung
    Gerund Cheung 於 13/04/2017 評論 NO. 18

    我覺得費蘭尼先係問題,每次出佢就好係打少個咁,唔明點解佢會出現喺我隊曼聯

  • Ryan Leung
    Ryan Leung 於 13/04/2017 評論 NO. 19

    如果計「奔跑速度」、「最高速度」、「盤球速度」.....佢當然唔快,老實講佢好早期係熱刺時都唔係以「腳下速度」見稱,但佢能夠穩住中場既節奏,「判斷速度」同「閱讀速度」成為左佢最鋒利既武器。

  • kinfung
    kinfung 於 13/04/2017 評論 NO. 20

    伊巴真系慘,比獌聯搞臭份履歷

快捷鍵:←
快捷鍵:→