曼聯專區小評:談爭霸?先要稱霸歐霸!

曼聯專區 於 24/05/2017 發表 收藏文章
有人講過摩連奴有大賽命,入到歐戰決賽的勝率為100%。老老實實,今晚的大戰真係好需要實力加埋摩帥呢個運氣,因為萬一輸咗,就唔係單單輸個冠軍、輸個歐聯資格,而好可能輸埋錢、輸埋光環、輸多幾年時間先可以中興曼聯......

先係錢。如果再失歐聯資格,第一個同曼聯開刀嘅就係三間牌,因為贊助條款入面列明,連續2年無歐聯就會啓動「懲罰機制」,減少2100萬鎊的贊助費用。依家一年贊助7000萬鎊嚟計,即係減1/3年贊助費,真係幾大鑊。另一個重要「錢因」就係歐聯吸金力大過歐霸2、3倍,歐霸一年可以為曼聯帶來1500萬到2000萬收入左右;反之歐聯可以為球隊帶來4000萬到5000萬鎊收入,真係拍馬都無得追。所以萬一今晚輸波收場,隨時唔見4、5000萬鎊,講緊億億聲港元,對球會收入有影響之餘,對下季買人、保持球隊質素嚟講都係一件大事。

另一方面,就係人腳。大家最近都聽唔少,鋼門迪基亞離開曼聯的消息甚囂塵上,太多太多原因畀佢走,畀佢返西班牙。下年係所謂「世界盃」年,各地球星都好希望可以打出身價,穩固自己國家隊嘅位置。當然留在曼聯的話迪基亞一定有好多表現機會,絕不亞於皇馬;然而作為狂牛球員,返到家鄉的頂級球隊表現自己,對比身在異地踢波更易得到其他人注意。就連費格遜都講過,當年皇馬出到8000萬鎊去買C朗,曼聯係無咩拒絕籌碼嘅。所以曼聯無埋歐聯資格的話,就連少少機會同牙力去留迪基亞都無埋,大條道理畀佢走。可能大家都會有少少悲觀,認為歐聯都未必留得住佢,呢個情況之下曼聯要搵返個好龍門替佢,有歐聯的話底牌都雄厚啲,吸引力都大啲。所以,下年門將邊個打,今晚場賽事影響好大。

另一個人腳問題,就係基沙文。早兩日有記者問佢留在馬體會嘅成數,佢就話:「十分的話,我去曼聯的機率是六;留在馬體會的機會是七。」無錯,只差一點點,而呢個一點點好可能就係歐霸上決定一切。馬體會對基沙文嚟講唔係差,不過唔夠好;佢要一隊可以拎到獎盃、奪到冠嘅球隊。對住皇馬、巴塞,馬體會唔係無機會,但係會好辛苦好難打;但喺英超嚟講,Big 6其實隊隊有機會,實力無差咁遠;加上曼聯的財力、經驗、摩連奴的領導,要在英超奪冠比起馬體會要擊敗巴塞皇馬來得容易。如果曼聯真係肯動用8700萬鎊去啓動佢嘅買斷條款,意味基沙文不單止將成為曼聯的攻擊核心、成為球隊的重要一員,更意味著曼聯有比馬體會更大嘅野心、更強嘅錦標渴望。而要買到基沙文嘅錢同埋曼聯野心嘅具現化,都同歐聯入場券緊緊相扣。無咗呢張入場券,基沙文入魔機會就只會有6/10;只有成為歐霸霸主、殺入歐聯,先會超越呢個數,變成7/10、8/10。

當然仲有好多好多原因,令曼聯好需要今晚嘅勝利。雖然贏好輸好,我哋對佢嘅支持都絕不改變,不過既然贏咗就有機會踏上中興大直路,今晚又點可以唔集氣先?


標籤: 曼聯專區小評  

留言


請按此登錄後留言。未成為會員? 立即註冊
  • Paul Sun 於 24/05/2017 評論 NO. 1

    鏝贏唔到阿積士返鄉下耕田啦

  • Paul Sun 於 24/05/2017 評論 NO. 2

    唔係打錯 係獌真係鏝過鏝

  • kinfung 於 24/05/2017 評論 NO. 3

    基沙文想拎冠軍就去車仔巴塞拜仁曼城啦,去獌聯頂多爭歐霸

  • ALANBB 於 24/05/2017 評論 NO. 4

    我通常買邊隊輸邊隊,所以今晚鐵了心支持阿積士大炒曼聯

  • @michael@ 於 25/05/2017 評論 NO. 5

    win2:0

快捷鍵:←
快捷鍵:→