曼聯專區小評:尷尬的不敗 不敗的尷尬

曼聯專區 於 07/04/2017 發表 收藏文章
無錯,曼聯又跌返落去第六。今季和波數字實在太多,其實數數手指,曼聯由十月開始就無喺聯賽輸過波,只不過以曼聯級數而言,唔贏其實可以當輸波嚟睇。20場不敗,當中10勝10負,意味住無咗20分。其實不敗對於球隊嚟講,應該可以帶嚟幾唔錯嘅成績,98/99球季曼聯一樣做到20場不敗,最終奪冠而回;04/05年球季同樣都係20場不敗,最終得第三。其實我哋點止咁少20場不敗,93/94年球季22場不敗、10/11球季24場不敗,最終都係以冠軍姿態完成球季。如今都係20場不敗,帶嚟嘅故事都幾唔同,究竟原因喺邊?

成也伊巴,敗也伊巴
無錯,又係佢。至今曼聯今季入43球,當中16球都係由伊巴攻入,即係有近4成嘅波係由佢攻入嘅。之後已經到入6球嘅馬達、4球嘅普巴。無錯,數字好熟口面,因為呢排馬達傷出、普巴又無咩波入,數字上真係變化唔大。不過靠伊巴,除咗驚佢氣力不繼之外,更重要係佢都係英超的「浪費王」之一,平均7.3腳攻門先有一腳入波,比起盧卡古3.5腳就入一球、哈利卡尼3.4腳就入一球,伊巴嘅效率其實認真麻麻。但係大家都唔可以太怪責佢,雖然佢又高又步大力雄,不過摩帥成日要佢打單前鋒,正如贊奴沙之前所講,1打3、1打4真係唔易,起到腳都已經算係咁,你仲可以要求伊巴點?而呢個論點,就推論到下一個曼聯和波多、唔識入波嘅原因。

中前場球員交貨不足
單靠前鋒入唔到波嘅,足球係打一隊架嘛。而要數曼聯中場最具威脅、最幫到伊巴手,天價普巴是其中之一、新寵米希達利恩都打得唔錯,但係2個人合共都只得7個聯賽入球。助攻?更少,加埋得4個。好喇,到靴里拉、馬達呢2位中場球員,馬達已經係曼聯次席神射手,不過都得6球;助攻得3球;靴里拉呢?助攻3球,入波就更加唔好旨意佢。馬迪爾、拉舒福特呢2位明日之星,都只係得3球進賬。睇埋其他球隊,曼城雖然前鋒都啞火,得阿古路有16球入波,不過佢哋有奇雲迪布尼11個助攻、大衛施華6個;車仔就更加有哥斯達、夏薩特數糊,柏度、法比加斯、馬迪助攻(除馬迪6助攻之外,另外2人各7次助攻)。我哋嘅助攻王?係朗尼,5球,仲要佢依家無得出場咁滯。簡單啲講,就係唔夠幫得手囉大家。而點解幫唔到手呢?呢個又引申去另一個原因喇。

信心不足
其實依家打曼聯係好大壓力嘅,你睇梳爾,咁細個就要面對好大壓力,畀摩連奴責備佢唔夠野心、唔夠努力之餘,如果你喺場上唔跟佢指示,令球隊失去贏波機會,你又聽畀人入更衣室照肺啦。其實曼聯陣中後生小將今季發揮麻麻,或多或少同呢個高壓式家長教育有關係。戰和拖肥之後摩連奴佢自己都識講:「我感覺到隊中唔少男仔都受到信心危機困擾…」梗係無信心啦,明明入到禁區都唔敢起腳,寧願交畀普巴、伊巴處理啦,因為真係驚驚架,點知摩連奴會唔會怪罪自己先?你估個個都好似雙巴咁,浪射到爆都唔收warning?

講咗咁耐,都係想講:波係打一隊人架!依家曼聯唔係人人有信心,有伊巴在場就好順理成章畀啲責任佢,當佢係救世主一樣。而後生一輩,又跌入一個唔敢發揮自己、怕錯怕影響球隊嘅陰影之下。要知道曼聯全盛時期,真係人人都識入波、人人都有幾球在手,前鋒固然係殺手,中場就有更多後上刺客,唯有做到呢點,先可以真正令曼聯中興成功!
(迷之聲:所以呢,筆者都信一個基沙文幫唔到件事架!)

標籤: 曼聯專區小評  

留言


請按此登錄後留言。未成為會員? 立即註冊
    快捷鍵:←
    快捷鍵:→