曼聯專區小評:傷就唔續約?唔係唔留伊巴呀?

曼聯專區 於 23/04/2017 發表 收藏文章
「曼聯太依賴伊巴謙」呢句說話已經未必太啱,因為摩連奴放佢喺後備造就「拆車」一役為人津津樂道,大家都知曼聯仲有個靴里拉、更有個拉舒福特。只不過,經過對安德列治一役之後,曼聯依家真係無得用伊巴,起碼休息9個月,英國《鏡報》報道仲傳聞話曼聯縮沙,唔同佢續約,如果無伊巴曼聯呢個陣又係唔係夠得呢?點講都好,隊中有星級前鋒當然一定要留,正如C朗晌皇馬角色,大家喺歐聯比賽一定可以睇得出,喺西甲上陣24場波入夠19球,而且啱啱喺歐聯戴帽返屋企。

加利仔剛剛講到呢位小師弟近年嘅改變:「C朗佢繼續的話,隨時可以打到40歲。佢依家轉變緊打法,為長期轉型打中鋒作準備,因為佢已經唔可能每場比賽都跑11、12公里,慢慢會變成7、8、9公里一場,不過佢仍然可以一場入2球。佢仲打緊曼聯時,即係2006-2008年,我會話係佢足球生涯最黃金嘅日子,因為就球隊而言,佢嘅貢獻係非常全面。去咗皇馬之後,佢雖然都付出自己嘅一切,不過已經唔可能90分鐘踩盡。我認為佢可以比美斯嘅足球生涯長,仲可以入好多波、造就更多成就。」

加利仔呢個評語,其實放於伊巴身上一樣啱用。唔靠速度,用前鋒觸覺入波,呢2點伊巴C朗都好相似;再加上2個身型都夠高:伊巴195CM高、C朗有185,不過勝在彈跳力都夠,佢哋都有一招頭槌攻門作為殺著。性格呢?一樣咁霸氣,一樣有領袖風範,而呢項亦正正係曼聯現時隊內非常缺乏,所以在情在理,專區都覺得應該留伊巴,雖然唔知伊巴好番之後攻力會點,之但係要有星級前鋒在陣,除非天價購入,同埋唔知會唔會成功,晌曼聯隊內鋒線仍未成熟之時,點解唔留多一年呢?

表明咗立場想留伊巴,不如諗諗留住伊巴對曼聯有幾大作用,可能更為踏實。無咗伊巴,曼聯速度真係快好多;而且依家有一個主要問題,大家有波就搵伊巴,令入球集中咗喺佢一個人身上面之餘,好多時有機會起腳都無做到。如果無咗伊巴,大家對入波嘅責任感就會大咗,咁就可以確保入球來源更多。係唔係無咗佢就係好?加利仔一句就突破盲點:「伊巴做唔做到福仔對車仔時嘅工作?絕對唔得。不過福仔又做唔做到伊巴聯賽盃時嘅工作?答案唔係唔得,係好難。所以伊巴絕對值得有其席位,而我更習慣身在一隊有4個前鋒嘅球隊當中。有伊巴,都應該要有小豆、要有福仔。唔好諗非他即我,前鋒都可以一同作戰。以舊帶新,我哋好需要有經驗嘅前鋒在陣,帶領球隊的改變。」齋經驗呢樣嘢,就感覺應該要留伊巴晌隊!

標籤: 曼聯專區小評  伊巴  

留言


請按此登錄後留言。未成為會員? 立即註冊
  • Paul Sun 於 23/04/2017 評論 NO. 1

    梗係唔留 比多啲機會華舒福好過啦

  • 閒雲野鶴 於 24/04/2017 評論 NO. 2

    個重點係你好難說服啲老闆出咁厚糧畀一個精神領袖 (都冇得落場,淨係養傷大半季有多)

  • tinchi3721 於 24/04/2017 評論 NO. 3

    淨係賣波衫都番黎啦 點解唔留?

  • lurk 於 24/04/2017 評論 NO. 4

    贊成留

快捷鍵:←
快捷鍵:→