普巴的「前世今生」

曼聯專區 於 22/02/2018 發表 收藏文章
作為曼聯的天價球員,普巴的故事曼迷一定唔會陌生。由加入曼聯青年軍、然後經理人拉奧拿同爵爺出現不和,普巴無上陣機會自由身離隊加盟干地麾下的祖雲達斯,多返轉折之後,終於以嚇死的銀碼被購回曼聯。喺靴里拉受傷嘅情況下,周末對陣車路士的比賽當中普巴好有機會要對壘干地呢位助佢成長嘅恩師,絕對係百感交雜。究竟係干地更識用普巴,定係摩連奴用得更好?呢個問題亦似乎可以喺呢場大戰入面搵到答案。

一開始普巴喺祖記係打3中場,位置上偏左或右讓出中路予派路鎮守,佢自己就同維達爾打前半格,盡進攻之能事。喺場內,呢2位世界級中場的扶助之下,年輕的普巴慢慢發揮潛質,成為一個可以獨當一面嘅中場核心;喺場外,干地對普巴非常嚴格,畀好多規矩佢去遵守同跟從,畀一個合適嘅教育佢。佢總係想普巴做得更好,喺佢表現不合格嘅時候予以鞭撻。而普巴都對呢位伯樂好感激:「干地一直都逼我前進,而且無懼畀機會我,以行動證明佢心入面年紀唔係最重要,能力先係。」

所以,轉投曼聯之後普巴其實有好大嘅環境改變,雖然佢都仲有大阿哥伊巴,但係講中場的話佢搖身一變,由一個跟派路學習的小伙子,成為曼聯中場線的指揮官,呢個轉變不可謂不大。而初到曼聯時的表現麻麻,到一路漸入佳境,都睇得出呢個小伙子仲係適應緊,進步緊。只係順咗條路之後,偏偏又殺出一個山齊士,以風頭躉的姿態加盟,話對普巴無影響就呃人嘅,始終佢都仲係24歲,年少氣盛難免易受打擊。大家見佢喺紐卡素一役畀人換走之後嘅頹樣,就知佢有幾在意,幾擔心。

當然,要放眼嘅始終都係未來,你話普巴無能力咩?佢對西維爾一戰雖然係後備上陣,但係對手當半場交波嘅次數冠絕全隊,活躍範圍極廣,唯一可以挑剔嘅係佢只入過禁區觸球一次,可能同成隊波畀對手力壓不無關係。有佢嘅比賽,曼聯失分絕對唔多,假以時日再次主導中場的話,作為曼聯中場核心的地位無可置疑。

好多人都用阿仙奴名宿韋拉去同普巴比較,因為2人都係法國人,都係體力型嘅中場球員。而韋拉就咁形容普巴:「同我比,普巴係比較攻擊型,而我係比較防守型。佢比我推得更前,入更多波,而且腳法技術都比我好。」可能呢個就係佢同山齊士有啲重疊嘅原因。作為球迷,唔難睇得出山齊士在場上好似身處另一個世界咁,同曼聯球員默契同合作真係唔算出色,但如果有一日佢同普巴夾到、合作到、配合到,可以有咩化學作用仲係未知之數。又或者轉個角度講,偉大嘅中場總係可以同唔同球員好好合作,主宰球隊的攻守節奏。今次佢搞唔搞得掂山齊士,可能就係進化成曼聯最強中場的最大考驗。
標籤: 保羅普巴  

留言


請按此登錄後留言。未成為會員? 立即註冊
  • tinchi3721 於 22/02/2018 評論 NO. 1

    當簽山齊士番黎唔係打右翼就係失敗收購 攻勢全部係左路發起 右路空哂斬入禁區得一個比對面圍到實一實既盧卡古 點入?

  • Cz Zian1 於 23/02/2018 評論 NO. 2

    唔明点解sanchez唔可以打右翼

  • wombat 於 23/02/2018 評論 NO. 3

    夠唔明點解要全民皆守。季初頭六場明明打得好好, 跟住越縮越後, 前鋒啱守都係死罪。 進攻全無章法,打到成隊西布朗咁。
    咁打法就算攞冠軍攞歐聯曼迷都唔會收貨

快捷鍵:←
快捷鍵:→