普巴、爆炸頭受傷唔緊要!中場仲有人!

曼聯專區 於 01/11/2017 發表 收藏文章
普巴同費蘭尼一傷,曼聯中場的威脅性立即減弱唔少,要有一位球員可以做到box to box或者係搶截工作,睇嚟真係有難度…不過剛剛戰賓菲加的比賽,就有一位中場球員整場比賽直接挑戰對方球員17次,重奪控球權9次,隊中只有達美安一個攔截數比佢多。佢嘅傳送都好準繩,達86%之餘,仲為後防4將提供好多支援。只係得20歲嘅佢,身體抗性同侵略性絕對唔低,佢就係剛剛續新約至2021年無耐嘅麥湯米尼(McTominay)。

作為另一青訓產品,02年已經加入曼聯青年軍,麥湯米尼處子戰係5月時後備上陣對阿仙奴,一直都有人睇好。好似史高斯就讚佢呢仗打得唔錯:「麥湯米尼做得好好。佢好有信心,交波亦有質素,喺場上每一個動作都好合宜。如果一隊有咩問題,佢絕對可以作為後備頂上。今日佢嘅表現值得佢自豪。」前曼聯預備組教頭華倫載斯(Warren Joyce)對佢亦有幾好評價:「佢已經上得大場面。麥湯米尼係一個好典型嘅box to box侵略性中場,係一個好好嘅球員,而且球技腳法優秀,有好強的控球能力。」

作為一個新仔,點樣可以令佢咁有大賽風範,咁有信心呢?佢認為同拉舒福特、連格特不無關係,佢哋嘅成功成為一眾青訓球員嘅榜樣,令大家都感覺到要成為一隊球員嘅美夢其實一啲都唔遠:「連格特仲細個時好細粒,好多人都唔睇好佢,但你睇而家?佢做到了。至於福仔,我哋一齊打過U16,但每場比賽我哋通常都打唔足45分鐘。我哋都係打10號位,但方式唔同,佢打時會推前少少,我就會墜後去中場。但明顯佢係球迷最愛的類型,大家都希望見到極速上位嘅球員。現時曼聯係青訓最好嘅地方,我哋成日奪冠,每個人都希望進步更多,贏得更多。」其實麥湯米尼15年時都唔係幾高,得5呎6吋即1米67左右,但而依已經增高至6呎4,足有1米93!有睇開專區文章嘅你都應該有印象,摩連奴的「新曼聯」最需要大隻高佬,除咗伊巴、馬迪、費蘭尼之外又多個米9大漢,睇嚟麥湯米尼嘅身型亦係佢得到機會嘅原因之一。

如果佢真係成為另一個曼聯新星,有一樣嘢絕對唔駛懷疑,就係忠誠心:「我5歲已經加入曼聯的足球學校,一切由此開始。我由細到大都幻想自己為曼聯上陣歐聯,今次真係夢想成真。咁多年來我都係以青訓身份睇一隊嘅歐聯比賽,每一晚都好開心、好滿足。我好開心領隊畀機會我上陣,非常期待我同曼聯可以繼續一齊上路。」經過今仗出色表現,唔難估計摩連奴會將佢放入一隊,成為普巴同費蘭尼嘅後備人選!

留言


請按此登錄後留言。未成為會員? 立即註冊
  • 輝輝輝 於 01/11/2017 評論 NO. 1

    對弱隊出多啲新人,成隊波都有多啲新元素好事吖

快捷鍵:←
快捷鍵:→