摩連奴辣慶PlayStation？ 精選

昨晚歐聯開波，曼聯以3球輕取巴素利，雖然有普巴傷出可能要缺陣一個月，但係眾將表現幾悅目，除咗盧卡古、福仔「新黑雙煞」繼續有波入、繼續進步之外，仲有個楊格打出水準上哂身，有助攻、有入楔、有扭波，誓要打爭氣波！

雖然己隊表現出色，但摩連奴就認為有啲瑕疵噃：「主場拎3分好重要，入2球之前我哋表現仲好穩定，仲好有信心。不過入咗第二球之後情況唔同咗，球隊行軍慢咗，而且唔再用腦踢波，無作出正確嘅判斷同決定。我哋將自己放咗入困境，只係對手入唔到波反而我哋攻入第3球。我只可以話當時球隊做嘅決定好差，決定打好華麗、好PlayStation嘅足球，開始輕率、唔認真，最重要係無咗隊型，我好唔鐘意。」
佢語氣真係唔輕，仲話球員無咗尊重：「呢種比賽方式係賭博，你唔可以咁唔尊重對手。我哋失位、失去隊型，仲好易就失控球權，球員變得太過輕鬆、打法太花巧了。」

無錯，喺英國，水係一定要抽嘅。之前連史篤城警察都抽一抽水，話對阿仙奴時奧斯爾係「失蹤人口」，要花時間去「搵返佢」，就知英國人幾鍾意玩幽默！所以，PlayStation 英國官方Twitter 自自然然要抽抽水，出個靚抽post：「摩帥對唔住，PlayStation踢波無得泊大巴，因為我哋嘅出現就係為咗娛樂大家！」暗寸摩連奴足球哲學夠哂悶咁話噃！只不過作為球迷，當然係贏波、娛樂都重要啦！如果真係玩出禍，點止摩帥不滿？都係小心啲好！