分離從來不易 鍾斯或「入城」小豬或解約

曼聯專區 於 23/08/2016 發表 收藏文章
有來臨,當然就有離別…依家曼聯陣中有幾多可以留低?其實清洗行動已經慢慢咁展開咗…首先講講個無咁唔開心嘅,係小將波夫域積遜將會離開我哋一年,因為佢已經外借咗去英冠嘅狼隊喇。上季殺出重圍、被提拔至一隊嘅佢,其實剛剛先續咗約,不過因為佢位置上同梳爾有啲重疊,家下梳爾返嚟又打得幾好,所以摩帥認為佢有需要去拎一隊上陣經驗,於是決定外借佢。

不過另一位小將泰萊布力基就真係離別喇。22歲嘅佢上季唔少時間都為球隊上陣,儲夠12次上陣機會架。雖然佢表現唔錯,不過都難逃一走命運,周一英冠球隊雷丁就宣佈佢嘅加盟,簽約3年。跟邊個大佬?就係大家都唔會陌生嘅光頭佬史譚囉!佢都大讚布力基:「佢好有潛質,甚至打過曼聯一隊,左閘同中堅都可以勝任,防守力、傳送都勁,而且助攻力又強,係我哋陣中好需要的球員。」

接下來嘅消息,可能大家都會有啲唔開心,就係菲爾鍾斯都有可能離隊喇…史篤城副領隊Mark Bowen就承應之後可能「有嘢發生」:「我記得大Sam提到佢時,講過佢好似名宿Duncan Edwards。作為一位小將佢做得好好,而且背負一個重大轉會,不過喺曼聯佢好似發展得唔太好。我唔知我哋有幾接近簽到佢,不過我好睇好佢。佢雖然打後衛多,不過佢細個啲時都打過中場,我唔知佢面對咩問題,不過連爵爺都讚佢,佢應該係可以成為好好嘅球員。大家等等吧,可能會有啲事在不久將來發生。」其實開季到依家都唔係幾見佢,就知摩連奴的藍圖入面佢佔嘅位置真係無咩…史篤城領隊曉士一直都對鍾斯虎視眈眈,如果佢真係買咗鍾斯,希望可以有更多一隊上陣機會啦……

至於小豬舒韋恩史迪加,摩連奴至今都未畀佢上過場,睇嚟呢位德國中場大將喺曼聯的未來都係凍過水…雖然佢一直都無表示自己有離開曼聯的心思,不過ESPN收到消息曼聯方面都唔係幾想留佢。就算真係無球會想要佢,都會諗個方法同佢解約咁話……



留言


請按此登錄後留言。未成為會員? 立即註冊
  • Chris0321 於 23/08/2016 評論 NO. 1

    老豬

  • Tsang Jimmy 於 23/08/2016 評論 NO. 2

    梳高爾搭鍾斯呢個曼聯後防組合無壞

快捷鍵:←
快捷鍵:→