那些年我們有過的國腳:G.費蘭迪斯 (瑞士)

我城藍月曼漫談 於 13/02/2018 發表 收藏文章
每次提起巴素爾嘅支瑞士球隊,又真係好易每人聯想個篇 “作為一個魚拉突”,其實入得十六強,都有一定實力嘅,暫時未搵到有關曾經效力過兩隊嘅球員,其實十年前,曼城曾經引入過一位瑞士國腳效力兩季。


G費蘭迪斯,1986年出生,司職防守中場,現役瑞士國腳,2005年正式於家鄉球會FC Sion展開職業生涯,效力曼城嘅日子係2007至2009,亦係佢第一次離開家鄉出去浸咸水,不過一浸就十幾年,2012/13球季曾經外借返母會一季,今季就響德甲搵食。

G費蘭迪斯嘅曼城之旅,其實並唔算好完滿,佢受當時領隊:艾歷臣垂青:以瑞士U21國家隊隊長身分加盟,呢位前英軍領隊更以歐洲最佳青年球員形容佢,所以響艾歷臣掌帥期間,除咗首兩個月因事未有上陣,07/08球季基本上都可以見到佢上陣,且有入球,始終防中係難每人留低好深印象,當然佢表現唔算特別搶眼,不過可惜嘅係好景不常,08/09球季佢先後因傷而無得上陣,響曉士領軍期間,已唔再係正選,當時尚算年輕嘅佢,為國家隊同自己前途,只有揀離開,出走法甲搵食。

費蘭迪斯響國家隊就屬於邊緣國腳,有兩年時間因傷令佢無入選,近呢幾年佢都有入選,不過就以後備身份為主。

先後響法甲,意甲,德甲,英超踢過波搵食嘅佢,其實11/12球季同艾歷臣有過一次重聚,當年艾歷臣係李斯特城領隊,曾經搵過一班前曼城球員入主,佢亦係其中一個以聖伊天借將身分加盟,不過就只有一季,及後就借咗去烏甸尼斯,十幾年嘅球員生涯佢都係兜兜轉轉,究竟係個人問題定際遇真係不得而知。

留言


請按此登錄後留言。未成為會員? 立即註冊
    快捷鍵:←
    快捷鍵:→