10年人事幾翻新 .. 曼城對屈福特 2007年 人腳今日去向

我城藍月曼漫談 於 16/09/2017 發表 收藏文章
上次屈福特響曼城身上爭到1分已經係2007年4月嘅事,當年同今日兩隊都人面全非,我地又睇下當年曼城人腳今日去向


龍門:伊薩臣,當年嘅曼城1號龍門,亦係瑞典國簽隊冧把溫,上年剛退出國家隊,現效力家鄉球會:Djurgårdens IF

後防:

迪斯甸,當年嘅曼城必然正選中堅,最後效力嘅係般尼茅夫,舊年完約至今一直未有班落。


鄧尼,當年曼城隊長,下個星期滿38歲嘅佢,響2015年正式宣布退役,現於法國定居,不時出席曼城名宿活動同講波。最令人印象深刻的一定非烏龍球莫屬。

安奴夏,曼城青訓產品,以當年來講亦係屬於較多上陣機會嘅小將,2012年轉投昆士柏流浪至今,總算站穩正選。


孫繼海,即將年屆四十嘅前中國國腳,舊年正式退役,現定居北京,主力發展網媒生意。
波爾,出身愛華頓嘅前英格蘭國腳,2012年退役後一直未離開過球圈,現為球員經紀,亦有參與傳媒工作。


祖爾巴頓,同樣由曼城青訓出身嘅佢,球員生涯基本上都離唔開攪事 .. 上季就被踢爆參與賭波,被足總罰停賽18個月。


夏文,前德國國腳退役後,曾出任 MK Dons 及史托港領隊,現為利物浦球會大使之一。

卑時利,今年已年屆35歲嘅美國國腳,當年係荷甲PSV借將,司職左中場,現效力侯斯頓戴拿模。


米高莊遜,同屬曼城青訓嘅佢,相對慘情好多,本來前途唔錯,慘變人球,2012年無聲無色咁掛靴,現為地產經紀。


華素爾,前英格蘭國腳,當日係曼城入球功臣,近年活躍於社交網站,於年初出過一本自傳,舊年初已宣布退役,間中踢下衛生波過下波癮。
標籤: 07'曼城  屈福特  

留言


請按此登錄後留言。未成為會員? 立即註冊
    快捷鍵:←
    快捷鍵:→