出人頭地:卡斯柏舒米高

我城藍月曼漫談 於 12/05/2017 發表 收藏文章
那些年曼城放棄過的青訓真係有好多個, 之前講過: 賓美爾, 祖爾巴頓, 阿當基頓, 等等, 而能夠留喺英超又拎過英超冠軍獎牌嘅少次又少, 來緊禮拜六面對李斯特城, 唔駛問阿貴都知我地講嘅會係 "卡斯柏舒米高" 呢位前城員, 不過佢嘅成名之路又唔係大家想像中咁平坦.


02/03 球季卡斯柏跟隨老父一齊加盟曼城, 江湖地位超然嘅老父自不然成為曼城嘅冧把溫, 而卡斯柏就展開咗佢響曼城學徒生涯, 身為名將之後, 基本功都有一定是常識吧, 當時隊友之一祖赫特亦曾經提過卡斯柏曾經教過佢星形撲救嘅要訣,但成功就唔係靠父幹, 經過06/07球季好幾次外借, 亦響表演賽擔正, 一度坐上曼城正選龍門席位, 當時係07/08球季初, 最令人印象難忘係當季有場0-1不敵阿仙奴有過出色表現, 但好景不常, 當大部分人以為佢可以一直擔正時, 正選這些機會再唔屬於卡斯柏, 為曼城上陣過8 次後,  正選席位落響當時由梳士巴利城轉會無耐嘅小國腳: 祖赫特 手上, 傷癒復出嘅瑞典國腳: 伊薩臣亦只係後備; 卡斯柏就繼續被外借, 08/09球季卡斯柏無奈且無癮地響曼城繼續佢副選門將生涯, 都有盃賽上陣紀錄, 但隨住基雲加盟, 加上一系列盃賽出局, 佢就再無機會披上曼城波衫上陣, 只有外借求上陣,季尾佢以一百萬鎊轉投英乙諾士郡, 同前領隊: 艾歷臣合作, 唔太愉快地結束咗佢響曼城生涯.


輾轉間卡斯柏於英乙: 諾士郡, 英冠: 列斯聯打滾過,有過高光嘅表現,亦有過低潮嘅時候,本來以為可以響列斯聯長期留隊,但只有短短一季,因失球數字急升而被放棄,再同艾歷臣掌印嘅李斯特城相聚。


2011年7月卡斯柏正式響英冠李斯特城展開佢嘅旅程,暫時亦係佢上陣最多,效力時間最長嘅球會,身為名將之後,各方難免將佢同老豆成就相題並論,由佢加盟李城開始,表現基本上都被眾隊教練及領隊一致好評,響競爭激烈嘅英冠,佢亦力保多場清白之身,個人把關技術亦見成熟,獲國家隊徵召,並且成為李城升班功臣,官至副隊長,其實不時傳出大球會有意收購,似乎佢都係鐘情於李城,首屆升班嘅半季,因為骨折而錯失大展身手機會,真正令佢發光發熱係上季李城上下為球隊創造嘅奇蹟,更巧合嘅係父子兩人於廿多年後嘅同一日奪冠,成為一時佳話。



臨近季尾,縱使屢傳佢可能回巢加盟曼城,亦有指重返成長地曼聯,不過我諗大家最希望係七月可以再睹佢嘅風彩。

留言


請按此登錄後留言。未成為會員? 立即註冊
  • Hola Konichiwa 於 12/05/2017 評論 NO. 1

    佢好貼地 踢過英乙 知道蟻民的生活

快捷鍵:←
快捷鍵:→