敗陣回顧: 2010年9月22日 曼城1:2西布朗 文字

要數到上次曼城輸俾西布朗真係數到去2010年9月呢場聯賽盃賽事, 當日曼城領先1球情況下慘被西布朗反吸, 最後敗北出局, 當日有份上陣o既一班球員今日有人已升至領隊, 有人響英超打滾, 亦有人做緊監躉.


門將: 基雲
呢位愛爾蘭傳奇係當日一號門將, 被攻入2球都顯然有D無奈 .. 面對後防線o既失誤, 你真係唔好彩, 當季及後因傷而再未能進佔曼城正選, 輾轉效力過阿士東維拉, 米杜士堡, 現已退居後備, 效力史篤城

後衛: 保耶達
出身曼城青訓o既比利時國腳, 失o既第1球其實都有D關佢事, 不過此子效力曼城數年未有太突出表現, 兩次外借後都無助提升整體實力, 現效力些路迪.

後衛: 韋度
出身曼城青訓o既英格蘭小國腳, 呢場係佢第1次亦係唯一一次以一隊身份上陣, 職業生涯主要響低級聯賽打滾, 現效力第5級聯賽球隊: Guiseley FC

後衛: 根寧咸
出身曼城青訓o既愛爾蘭國腳, 呢場係佢第1次以一隊身份上陣, 不過最為人記得o既怕且係佢讓出22號俾基歷治, 職業生涯同樣大多係英冠搵食, 今季未有班落.

後衛: 賓美爾
同樣都係出身曼城青訓o既英格蘭小國腳, 呢場都係佢第1次亦係唯一一次以一隊身份上陣, 之後都係被外借, 不過響般尼就俾佢踢出一片天, 而家佢係該隊必然正選.

中場: 伊巴謙
呢位伊巴謙就來自挪威, 而唔係瑞典而佢亦無伊巴謙莫域咁叻, 出道個陣雖被譽為韋拉接班人, 不過係摺埋個摺, 效力曼城7 季期間, 扣返青年軍日子, 基本上都係外借, 而家效力家鄉球隊: Vålerenga

中場: 韋拉
韋拉業生涯最後一站在曼城,亦為曼城在2010/11球季贏下足總盃出過力,在隊中擔任老大哥,春風化雨指導過不少年輕球員,退役後擔任過曼城EDS領隊,現升職為紐約城領隊,有傳他日將成為哥帥接班人。

中場: 阿當莊臣
阿當莊臣曾經係英格蘭希望之一, 不過響曼城日子過得相當平淡, 轉會新特蘭, 略有起色, 不過可惜係色字頭上一把刀, 因為涉及與未成年少女發生性關係, 而家坐緊監.

前鋒: 古達迪
曾經被譽為伊巴謙莫域接班人o既佢, 呢場都係佢第1次亦係唯一一次以一隊身份上陣, 響外借飛燕諾有高光表現, 但好可惜傷患令重重咁打擊左佢前途, 休息過一段長時間後, 復出外借都係不被重用, 今季響切爾達終算捱出頭.

前鋒: 祖奧
當日為曼城射入打開紀錄o既一球半窩利, 令人嘖嘖稱奇~ 不過祖奧響曼城表現只係相當一般, 踢左一季就被外借, 雖然係前巴西國腳, 不過球員生涯都唔算好平坦, 上年效力過江蘇蘇寧 而家返左巴甲: 哥連泰斯

前鋒: 辛達告魯斯
呢位巴拉圭國腳當日就唔係佢第一場賽事, 因為前領隊: 曉士關係加盟, 響文仙尼年代都無乜運行, 輾轉效力布力般, 畢迪斯, 馬拉加 . 而家響家鄉球會 Club Olimpia 搵食.
標籤: 曼城  西布朗  

留言

會員
我要評論
請按此登錄後留言。未成為會員? 立即註冊
  • Ricko Gurg
    Ricko Gurg 於 16/05/2017 評論 NO. 1

    入球show添ar?!

  • Jeff Fong
    Jeff Fong 於 16/05/2017 評論 NO. 2

    為阿記舖路?

  • Jeff Fong
    Jeff Fong 於 16/05/2017 評論 NO. 3

    3点先打呀~雖然我都差d比佢呃左

  • Ka Cheong Law
    Ka Cheong Law 於 17/05/2017 評論 NO. 4

    嚇死以為雲爺爺連時空都控制埋

快捷鍵:←
快捷鍵:→