如果用卡邦尼醬汁黎炒貴刁, 我既反應得一個 - 九唔搭八!
咁小組推進用落水晶宮度呢? 咪又係九唔搭八囉!
現任水晶宮領隊, 前荷蘭名宿法蘭.迪保亞, 曾經以助教身份協助荷蘭打進2008世界盃決賽! 其後於2010年以看守領隊身份教母會阿積士竟然成功奪得荷甲冠軍, 結果球會俾佢坐正後, 仲一連拎足四連霸, 令阿積士再次於荷蘭足球壇玩晒咁濟, 不過2014球季開始, PSV開始發力, 結果2季都失落荷甲冠軍後, 選擇於2016年5月12日辭職!
其實唔教荷蘭國內聯賽, 法蘭迪保亞都唔洗挑戰自己得咁大, 走去教國米, 唔知係咪想將阿積士果套戰術體系帶入意大利, 可惜好衰唔衰, 領軍14場成績係5勝2和7敗, 結果國米降至意甲第12位, 於2016年11月1日被國米炒魷魚, 在任時間只係85日。
2016/17球季, 水晶宮成功護級, 於6月時宣佈法蘭.迪保亞將執教, 其實水晶宮請人前都望下份resume啦, 迪保亞唔係唔好, 不過走左出荷蘭體系就唔太掂, 而且仲要去教以長傳急攻, 快上快落為主既英超球隊! 或者水晶宮老闆希望水晶宮可以用蔗渣料, 踢出燒鵝味啦, 可惜呢位廚師煮開西餐, 玩下細膩野, 叫佢拎住隻大鑊炒貴刁.............
結果英超開季4戰全敗, 首戰主場面對升班馬哈爾斯菲被炒3蛋, 算! 忍下你, 第二場作客利物浦再輸, 不過輸1球, 都算, 話晒利記今季爭標隊黎! 以為聯賽盃贏一贏葉士域治晉級可以完結低潮啦! 回到英超主場再輸一場............0:2輸俾史雲斯, 黎到昨晚, 水晶宮作客般尼..........再輸一場, 今次係0:1, 暫時英超成績, 4戰4敗, 0 入球, 7失球, 排名19位, 只俾踢少一場既韋斯咸好DD................
https://www.youtube.com/watch?v=jqVy6DObB00
其實以水晶宮人腳, 軒尼斯呢個門將唔算頂級, 但都幾穩陣, 後防有舒立普, 科素文沙, 丹恩, 祖爾和特同雲安賀治, 成條防線好差咩? 又唔算! 中場又有卡巴耶派牌, 進攻有唐辛, 賓捷安, 沙夏同埋賓迪基, 咁都入唔到1球? 緊係啦, 你叫呢班踢開防反, 直接既球員去同你玩控球同埋玩細膩...................
望下上季季尾邊個幫水晶宮護級? 12月份開始由中小型班防反大師艾拿戴斯做領隊, 結果水晶宮於下半季成績有大大改善, 期間更將車路士, 利物浦同阿仙奴三支勁旅掃低, 最後第37周聯賽以4-0大勝護級主要對手侯城後, 咪護到級囉! 艾拿戴斯既教波戰術最重要就係簡單, 直接同快速反擊, 同法蘭.迪保亞既理念真係..............可惜艾拿戴斯季後辭職....................
https://www.youtube.com/watch?v=WMKrTKVbdAQ
再係咁落去...........黎緊水晶宮賽程, 如果星期六呢場都拎唔到分, 應該水晶宮開季頭7場英超都會拎唔到分.....創個新紀錄, 場聯賽盃, 你報到仇咪豪俾你囉!
9月16日: 主場 V 修咸頓 ( 英超 )
9月20日: 作客 V 哈爾斯菲 ( 聯賽盃 )
9月23日: 作客 V 曼城 ( 英超 )
9月30日: 作客 V 曼聯 ( 英超 )
* 不過法蘭.迪保亞呢個西廚由呢一秒開始, 隨時都會噗下豉椒炒魷............
K波
鐘意睇我K波講野, 都讚好我個FACEBOOK專頁, 謝謝支持!
K波說故事 - https://www.facebook.com/KBALLSTORY
請按此登錄後留言。未成為會員? 立即註冊