新日本首戰加納　誓贏一場壯行色

5月30日（三）　日本VS加納　now618/633/テレビ朝日直播
進入備戰世界盃最後狀態嘅日本隊，今晚就喺新帥西野朗首次領軍之下，喺主場橫濱日產競技場迎戰非洲球隊加納，係聽日下晝3點公布最終23人名單之前最後一場熱身賽。日本隊練波超過一個禮拜，主要都係演練三中堅陣式，所以今場將會使用新陣式，日本媒體分析指西野朗嘅步署係喺攻守之間不斷喺4-3-2-1同5-3-2之間轉換。而且據近日練波觀察所得，打開左翼嘅原口元氣今場將會改任右翼衛，一來因為原定右閘酒井宏樹仍然有傷在身，二來係想增加右邊助攻力。


前場三老今次悉數回歸日本隊，而且據日前公布嘅球衣號碼喺睇，三老基本上會繼上屆之後再次一齊踢決賽周。不過由於岡崎慎司右腳傷剛好，尋晚先復操，香川真司就仍然有待提升狀態，所以今晚應該只有本田圭佑踢正選。日本隊最近一次對加納係5年前，果場波本田有1個入球1次助攻，協助日本以3：1擊敗加納，今晚會否再藉對手冇派最佳陣容嚟日本再下一城，就要今晚睇波至知喇。


另外植田直通、淺野拓磨、三竿健斗同井手口陽介獲配24-27號波衫，預計好可能被剔出決選名單，所以今晚必須要爭取機會發揮超水準演出，先可以令教練團回心轉意。

至於加納由於無緣參與今屆世界盃決賽周，所以3月冇約友賽，今仗係佢哋今年第一場波。佢哋今次只帶咗18個球員嚟，而且以往嘅主力基恩艾沙姆、艾耶兄弟、李斯特城中場艾馬堤等人全部冇入選，比較有經驗嘅球員只有馬體會中場柏堤、愛斯賓奴中場華卡素、拖連奴中場艾古亞，前鋒線主力艾捷龐5年前對日本都有波入，今晚將會係日本隊需要嚴防嘅對象。加納今晚輕裝上陣，而且最近8場比賽只贏1場，而另外7場贏唔到嘅比賽都有失波，所以日本正常發揮下應該可勝，今晚入球亦應該會多。

日本預計陣容（3-4-2-1）：1.川島永嗣（GK）；22.吉田麻也（RCB）、17.長谷部誠（CB）、20.槙野智章（LCB）；8.原口元氣（RM）、16.山口螢（CM）、18.大島僚太（CM）、5.長友佑都（LM）；4.本田圭佑（AM）、11.宇佐美貴史（AM）；15.大迫勇也（FW）後備：12.東口順昭（GK）、23.中村航輔（GK）；2.遠藤航（DF）、3.昌子源（DF）、7.柴崎岳（MF）、9.岡崎慎司（FW）、10.香川真司（MF）、13.武藤加紀（FW）、14.乾貴士（MF）、19.酒井宏樹（DF）、21.酒井高德（DF）、24.植田直通（DF）、25.淺野拓磨（FW）、26.三竿健斗（MF）、27.井手口陽介（MF）






#日本代表 #SAMURAIBLUE #キリンチャレンジカップ2018

圖片：スポニチ

資料來源：J League情報站
https://www.facebook.com/jleagueinfo/