日本五台聯播世界盃 一場不漏全免費任睇

J League情報站於 14/06/2018 發表 收藏文章

世界盃今晚就開幕,揭幕戰唔關日本事所以都唔會特登講,不過就可以講吓日本直播世界盃嘅情況。有別於香港一台獨家全程直播,同時只有19場波放喺免費頻道嘅情況,日本今屆就由5大電視台分拆播波,即係64場波分開若干場次畀每個台獨家直播。身為大台嘅國營NHK電視台當然分得最多,有足足一半賽事可以直播,包括今晚揭幕戰同決賽,仲係放喺最主要果條總合台頻道播放,確保全日本都睇到。而且冇得直播果一半比賽,仲可以喺比賽後第二日喺BS1台足本重溫。


至於另外4台就每台各分到8場,フジテレビ同日本テレビ就只播分組賽,TBS就播4場分組賽、2場16強戰及2場8強戰,テレビ朝日就分到2場16強戰、1場4強戰及季軍戰。4個台都會將世界盃直播放喺免費主台播,而且每個台都分到啲重點比賽,例如日本テレビ就有阿根廷VS克羅地亞及日本VS塞內加爾,フジテレビ就有日本VS波蘭,TBS就有德國VS瑞典,テレビ朝日就有丹麥VS法國。至於日本及各強隊(比利時除外)嘅首戰,以及英格蘭VS比利時呢類大戰,就當然要留返畀大台播啦﹗


香港近年無論邊個電視台播世界盃,都總係鍾意搵一班平時可能好少留意足球嘅明星或MODEL出嚟搞吓氣氛,日本就唔多興呢套,仍然係比較強調專業同多角度了解比賽嘅,所以每個台嘅講波陣容都係傾向搵返專業球評家及前球員嚟坐陣。フジテレビ講波陣容相當強大,有前國腳鈴木隆行、宮本恒靖、山口素弘、名古屋鯨魚教練風間八宏及前橫濱水手及仙台維加泰教練清水秀彥,亦會有前西德國腳列巴斯基、遠藤保仁、稻本潤一、田中闘莉王及瑠偉做嘉賓;テレビ朝日就有鐵膽中山雅史同中田浩二;日本テレビ就有北澤豪、城彰二及都並敏史;TBS亦有鈴木啓太同福田正博,真係各式其式自助餐。

至於大台NHK陣容當然更加鼎盛,唔單止會派福西崇史、岡野雅行、岡田武史、藤田俊哉、石川直宏、市川大祐同小島伸幸去現場直擊,淨係第一個禮拜直播會出現嘅名將嘉賓,就有森岡隆三、遠藤保仁、川口能活、卷誠一郎、橋本英郎、名良橋晃,仲有三好康兒及板倉滉等新生代球員參與,而且最重要嘅係自從卸任J League大使之後鮮有露面嘅佐藤美希,亦會擔任每場比賽嘅主持。睇波咪就係咁先過癮囉。

#TBS #フジテレビ #テレビ朝日 #日本テレビ #NHK #2018FIFAワールドカップ

圖片:TBS Japan、フジテレビ、テレビ朝日Official site截圖、佐藤美希Official Twitter
資料來源:J League情報站
https://www.facebook.com/jleagueinfo
【世界盃 ng sick ball 街訪 — 第二集】

留言

會員
我要評論
請按此登錄後留言。未成為會員? 立即註冊
快捷鍵:←
快捷鍵:→