大久保嘉人或轉投磐田 柿谷或投死敵會恩師

J League情報站 於 25/06/2018 發表 收藏文章

近日大家嘅焦點全部都放喺世界盃,原來唔少J1球隊都已經靜靜雞為下半季賽事起革命,亦有唔少轟動轉會好大機會日內落實。首先係大久保嘉人好可能會由川崎前鋒轉投磐田山葉,同中村俊輔合組經典鋒線。36歲嘅大久保雖然係J1史上首席入球王,但係畢竟年華老去,今季由FC東京重返川崎前鋒之後表現大不如前,聯賽只有4次正選,最近2場更連大名單都不入。同時磐田山葉由於多名中前場外援重創導致攻力大減,教練名波浩亦曾經讚過大久保嘅埋門能力係日本首屈一指,所以雙方一拍即合,日本傳媒預計大久保轉會消息將會好快公布。


至於大阪飛腳想要柿谷曜一朗已經係公開秘密,社長山內隆司今個月初都承認已經向同市死敵大阪櫻花提出收購,仲預計出到1億日元年薪吸引柿谷過檔,而且飛腳主帥古比正係當年喺櫻花帶柿谷出道,令柿谷出走機會大增。不過由於相關消息令柿谷畀球迷騷擾,所以近排都淡靜咗落嚟。飛腳未搵到柿谷過檔,同時就決定外借兩名U23隊主力,分別係矢島慎也同泉澤仁。矢島今季從浦和紅鑽過檔,原本想搵佢代替離隊嘅井手口陽介,但踢咗兩場之後因為表現不佳同巴西中場馬迪奧斯捷西斯加盟,就直頭被貶落U23隊踢J3,佢將會喺下半季外借去仙台維加泰。至於本來亦被視為未來中場核心嘅泉澤仁,今季聯賽加聯賽盃只踢過3場,同樣被貶落去踢J3,佢將會外借去東京綠茵。

此外,今季為柏雷素爾於亞冠分組賽上陣嘅中堅中谷進之介,早前已經落實轉投名古屋鯨魚,將會披上新東家20號球衣出戰下半季賽事,為名古屋護級努力,據報轉會費超過2億日元。

#大久保嘉人 #柿谷曜一朗 #矢島慎也 #泉澤仁 #中谷進之介 #Jリーグ

圖片:Getty Images
資料來源:J League情報站
https://www.facebook.com/jleagueinfo/

留言


請按此登錄後留言。未成為會員? 立即註冊
    快捷鍵:←
    快捷鍵:→