【懶人包】港超10隊 轉會窗小結 文字

香港足球於 01/09/2017 發表 收藏文章
9月1號,除咗代表各位學生要開始翻學之外,亦代表各大聯賽嘅轉會窗完結,但其實港超聯嘅轉會窗並未完結,根據足總網頁,港超註冊窗會係9月25號完結,而且同其他聯賽唔同,港超嘅轉會亦往往較為『多姿多彩』,下文就會為大家就今次嘅夏季轉會窗,暫時做一個小結。

盧卡斯 (大埔 -> 傑志 )

盧卡斯加盟後 首場對東方表現甚佳

轉會窗最重磅嘅消息,相信唔少球迷都會同意係盧卡斯由大埔轉投傑志,取代離隊嘅羅勳奴。巴西人上季為大埔攻入17球,當中亦不乏「救命波」,就例如於菁英盃決賽為大埔扳平飛馬,協助球隊最終贏得錦標。傑志今季將要征戰亞冠分組賽,盧卡斯嘅加盟除咗為教練朱志光喺艾力士,辛祖以外,提供多一個前線選項外,佢體型同技術上嘅優勢,相信亦能為傑志帶黎更多入球。

傑志其他主要轉會:

保連奴 (深圳佳兆業-> 傑志)
李毅凱 (傑志-> 飛馬) (租借)
顏樂楓 溫俊 佐迪 (傑志-> 理文)(租借)

沙巴/ 古高(幸運薛達/ 紐卡素噴射機 -> 東方龍獅)

古高加盟後 首戰對傑志後備上陣,但機會唔多

上季亞軍東方聯賽「衰收尾」,今季銳意捲土重來,覓得兩位前澳職球員加盟,取代美路史拿域及基奧雲尼。攻中沙巴曾經效力西雪梨流浪者,協助球隊贏得亞冠盃冠軍,其後2年內先後效力5隊球隊,最終輾轉加盟東方。沙巴雖然有大賽經驗,但幾次與教練因關係不佳而離隊嘅紀錄,令佢嘅紀律始終難令人信服。

至於芬蘭前鋒古高,同沙巴一樣都曾經效力澳職球隊。古高嘅足球生涯始於芬蘭,20歲就代表球隊於歐霸盃外圍賽上陣,及後更成為芬超聯賽神射手,並為芬蘭國家隊上陣一場,最終今季以30歲之齡由 紐卡素噴射機轉投 東方。作為芬超聯賽神射手,古高資歷絕對毋容置疑,但近年受傷患困擾而令上陣機會寥寥可數,究竟會否代替洛迪古斯成為球隊主力前鋒,抑或成為上季基奧雲尼嘅翻版,只作球隊副選?

李志豪/ 張健峰/ 羅港威/ 陳肇鈞 (梅州客家/ 南華 -> 東方)


虎哥回流後首場對傑志 體力明顯不繼

東方上季失球數字遠超傑志,故買人上亦引入多名防守球員,除外援曹泰根外,仲簽入4位前南華兵,包括從中甲回流嘅虎哥 李志豪,上季由南華外借流浪嘅張健峰,令防線除鄭璟昊、黃梓浩外,有更多選擇。而新加盟嘅羅港威、陳肇鈞同為25歲,屬當打嘅年齡,但能否威脅徐德帥、麥基 / 迪高、白鶴 任球隊主力,亦屬未知之數。

東方其他主要轉會:

米曹 (離隊)
羅拔圖 (東方 -> R&F富力)
林學曦 (南華 -> 東方)

列文/ 加洛斯/ 馬天尼斯 (基寧咸/ 美利達/ 古祖洛 -> 南區)


南區上季排第三,今季增加班費下再添加新援,包括曾經效力傑志嘅巴基斯坦國家隊隊長 列文,西班牙翼鋒 加洛斯 同 防中 馬天尼斯以強化防線。

列文加盟勢強化南區防線

早前唔少球迷知道杜馬斯不獲續約後,都覺得不解同可惜,但知道列文加盟後,都理解ricky嘅選擇,因為單看資歷,列文已經「大勝」杜馬斯,作為上季英甲球隊護級功臣、巴基斯坦國腳、英超經驗、傑志主力…… 令唔少球迷都睇好佢嘅表現,但同時由於加拉度預計10月復出,列文加盟會否令尚未復出嘅加拉度,同上季嘅杜馬斯一樣,失去正選席位?

至於加洛斯,以位置黎講就係代替內田智也,但現時南區已經有5名翼鋒,而單看過往效力嘅球隊亦未能比到太大信心球迷,因此預料亦只能當作後備。

最後一名新援就係之前訪問過嘅馬天尼斯,出身華倫西亞青年軍,踢過西班牙u17。由於係第一次黎亞洲踢波,故能否適應香港悶熱天氣亦可能成問題。佢嘅加盟能否釋放拍檔劉學銘嘅創造力?值得大家期待 。

專訪: http://s.fanpiece.com/8zmKzoE

南區其他主要轉會:
車潤秋 (南華 -> 南區)
陳文輝 (南華 -> 南區)
迪基圖 (離隊)

伊高沙杜尼/ 迪亞高/ 艾華度/ 翟廷峯/ 梁冠聰/羅素 (沃爾特雷東達/ 香港飛馬/ 南華/ 自由身 -> 和富大埔


伊高沙杜尼將代替離隊嘅 同鄉 盧卡斯,但首戰對夢想就傷出,情況值得關注

第一單就講講新加盟大埔嘅巴西外援伊高沙杜尼,呢位24歲前鋒效力過巴甲球會法林明高5年,亦曾經被外借至日職球會鹿島鹿角。而佢父親艾仙度沙杜尼曾經同名宿薛高一齊效力過鹿島鹿角。而大埔教練李志堅就認為佢雖然唔係傳統9號仔,但有唔錯嘅入球同入楔能力。相信球迷亦會相當期待佢同迪亞高呢個新鋒線組合會為大埔帶來嘅影響。

而由飛馬過黎大埔嘅左翼迪亞高,上季為飛馬喺港超射入4球,佢前季亦協助飛馬連奪足總盃同菁英盃冠軍,但因為不唔符合飛馬新教練楊正光嘅戰術要求而被清洗。而大埔上季港超攻入29球,只係比標準灝天、富力和港會高。效力過4年南華、今年29歲嘅迪亞高能為大埔帶來豐富嘅經驗,有助改善大埔嘅攻力。

後防方面,同迪亞高一樣由飛馬過檔大埔嘅仲有中堅艾華度,佢為飛馬上陣過51場,攻入4球,係飛馬其中一位主力球員。佢加盟大埔之後,連同新加盟嘅後衛翟廷峯、梁冠聰、羅素、關華恩,以及前南華「門神」曾文輝,合組「高佬防線」,大大增強咗大埔嘅防守,有望令大埔在新一季港超的失球數字比起上季的21球更低。

大埔亦從飛馬引入 『巴西孖寶』迪亞高 同 艾華度

大埔其他主要轉會:
謝家強(南華 -> 大埔)
袁振昇 (晨曦 -> 大埔)
盧卡斯 (大埔 -> 傑志)
黃耀富 (大埔 -> 夢想)
伊達 (大埔 -> 富力)
阿倫列馬 (離隊)

艾華頓 / 杜馬斯(標準灝天 /自由身 -> 元朗)


艾華頓上季『carry』球隊,帶領標天脫離降班區

元朗今季雖然失去九巴大額贊助,改為由陽光巴士贊助,但亦非代表外援質素下跌,艾華頓就係好例子,上季作為標天護級功臣,個人射入14球,拍得住東方 洛迪古斯嘅17球,今季加盟元朗後,喺熱身賽已經嶄露頭角,對夢想FC 4分鐘內入2球,獲得教練曾昭達大讚其技術同速度。另外,元朗覓得首次離開家鄉球隊效力嘅巴西外援 拉斯達 代替加盟理文嘅盧斯安奴,但去到8月31號卻出現『羅生門』,元朗主動與球員解約並簽入南區棄將 杜馬斯,震驚唔少元朗球迷。究竟元朗今季失去九巴贊助後,仲有冇能力成為聯賽黑馬?抑或重回前季嘅低迷狀態?

元朗其他主要轉會:

葉頌朗(理文流浪 -> 元朗)
黎厚希(元朗 -> 夢想FC)
祖連奴(東昇 -> 元朗)

顏樂楓/ 史提芬彭利拿/ 孫民哲 (傑志/ 元朗/ 宋卡聯 -> 理文)


理文今季其中一個亮點,就係有『脫北者』孫民哲來投!

理文今季撇低流浪 自立門戶,班底同上季嘅理文流浪大致相近,大部分球員都得以過渡,包括利馬、許嘉樂、趙俊傑等主力,同時理文今季借將數量大減,主要借將來自傑志:溫俊、上季效力元朗嘅顏樂楓、同隊長佐迪。(傑志下半季需要征戰亞冠比賽,外借球員可能會被召回,球迷可以留意下 理文會否因此受影響?)至於外援方面,今季班費約1000萬嘅理文更引入兩名前元朗球員:史提芬彭利拿及盧斯安奴,並覓得「脫北者」孫民哲由泰國轉戰港超,呢位30歲嘅南韓籍中堅,出生於日本,但又曾經為朝鮮u23上陣4場。會長李文恩銳意打造球隊成為中游班,以現時班底黎睇,相信呢支「港超新軍」最終排聯賽中游絕對不足為奇。

理文其他主要轉會:
余沛康 (標準灝天 -> 理文)
域陀 (沙瑞拉馬卡恩斯RJ -> 理文)


梁諾恆/ 艾華/ 羅斯/ 伊高(南華/ 葉尼塞/ 施歷斯 -> 香港飛馬)


飛馬以近季狀態開始跌watt嘅艾華 代替迪亞高

上季飛馬經歷不如意嘅賽季後,今季陣容轉變頗大,先有楊正光回流接替離隊嘅 奇雲邦特,外援又有基斯贊、艾華度、迪亞高、沙華離隊。至於新球員則有 艾華、梁諾恆落山、前保加利亞U21中堅 羅斯、塞爾維亞前鋒 伊高加盟,因此以「改頭換面」形容亦不為過。近季飛馬主力流失問題嚴重,如羅港威、阿杜域、迪亞高,再加上「替代品」發揮未如預期、球員磨合等問題,令飛馬表現飄忽,長期處於聯賽中下遊位置。今季喺教練楊正光帶領下,究竟可否達成聯賽頭四、盃賽冠軍嘅目標?

飛馬其他主要轉會:

迪比 (艾米斯 -> 飛馬)
梁興傑 羅曉聰 (南華 -> 飛馬)
李毅凱 (傑志 -> 飛馬)(租借)

伊達/ 羅拔圖/ 基奧雲尼/ 麥高派路域(大埔/ 東方/ 南華 -> R&F富力)


富力今季覓得 上季大埔/ 東方主力 伊達 羅拔圖加盟,更引入身價3000萬嘅般連奴

富力上季以青年軍及部分香港球員嘅陣容,征戰港超,最終排尾3。今季陣容轉變唔細,除簽入兩名歸化兵、基奧雲尼同麥高派路域外,並由外籍教練 馬里科執起教鞭,野心非常大。由於富力規定每場只需要出3名香港球員,令球隊撇除兩名歸化兵後,最少只係需要出一名本土球員。另外,球隊今季將以燕子崗體育場作主場,變相令其餘9支港超球隊均要作客廣州!

卡錫/ 卓耀國/ 黎洛賢/ 劉卓軒(拉德尼基/ 富力/ 飛馬/ 南華/ -> 標準流浪)


壞孩子兵團究竟可唔可以重生呢?

理文今季自立門戶,變相令流浪回復前季嘅「標準流浪」,今季流浪以大部分標準灝天嘅球員作骨幹,並簽入前公民中場 卡錫,鞏固球隊防守。除咗外援,「垃垃」亦將三位「壞孩子」帶入流浪,分別為mk國、BB、肥軒,究竟呢支壞孩子兵團喺上季南華教練,狄恩執教下,有否能力改善個人紀律,並帶領球隊脫離降班區?

保羅/ 陳偉豪/ 陳湛羲/ 尹東憲/ 黃志聰/ 羅梓駿/ 鄭展龍/ 播磨浩謙(大埔/ 南華/ 標準灝天/ 東方/ 傑志 -> 夢想FC)

大豪由南華加盟夢想 首戰就帶領球隊 對住大埔搶得一分

上季港菁(標準灝天)嘅會籍,今季由夢想FC接手,引來多位西班牙外援,並保留上季教練兼球員,亞援尹東憲,同時從傑志、東方租借年輕球員,如羅梓駿、李嘉進作球隊骨幹,更覓得南華守將陳偉豪加盟,將經驗帶入球隊,但亦現時班底黎睇,如無意外夢想FC能成功挑戰列強機會不大,相信要同流浪為護級而戰。
標籤: 港超  傑志  東方  南區  大埔  元朗  飛馬  流浪  夢想  理文  

留言

會員
我要評論
請按此登錄後留言。未成為會員? 立即註冊
  • Cheung Lai
    Cheung Lai 於 02/09/2017 評論 NO. 1

    唔睇相 我仲以為列文係踢阿仙奴果個

快捷鍵:←