季尾大檢閱 - 香港新世代

香港講波仔 於 18/04/2017 發表 收藏文章
眨下眼,本地波又去到季尾,除咗東方傑志兩隊繼續為聯賽冠軍打個你死我活之外,相信各支球隊亦係時候檢討過去呢一季得失,為下屆聯賽作好準備。而今次筆者想寫嘅,係香港一眾出色嘅本土小將。筆者會用一個十一人陣容去介紹眾本土小將,希望讀者們都可以好好支持佢哋,因為佢哋係我哋未來港足希望之所寄。

門將:謝家榮 (理文流浪) – 17歲
當大家最近睇過旅英歸來嘅林樂勤嘅亮麗表現,相信大家對於同佢一齊旅英嘅謝家榮同樣十分期待。可惜今季謝家榮今年未有於流浪一隊註冊,或者最快都要等到下季先有機會亮相港超聯啦。不過筆者有留意3月中U18嘅四角賽,謝家榮嘅表現都唔錯,把關基本功幾紮實下,相信謝家榮港超地標戰都不遠矣。

口講無憑,大家就睇下精華片段,睇下謝家榮嘅表現啦。

麻樹足球 - 謝家榮撲救精華
https://www.youtube.com/watch?v=FaBFgjv6S2M

後衛:徐宏傑 (標準灝天) – 20歲
上年於標準流浪開始嶄露頭角,被稱為「新李志豪」嘅徐宏傑今年成為標準灝天嘅後防不二之選,今季代表作係作客對傑志一夫當關,成功守和0:0獲得寶貴一分並獲選為當場最佳球員。今年佢都只係20歲,大把世界,只要繼續畀心機,假以時日一定可以有同前輩李志豪一樣高嘅成就。

後衛:梁諾恆 (南華) – 22歲
謝家強同陳偉豪受傷患困擾、保贊勇悍不再,再加上羅素季初轉赴馬來西亞發展,梁諾恆喺加盟南華頭一季就已經攞到唔少上陣機會,雖然今年南華眾後防大跌watt,成績不似預期,但梁諾恆卻少有受隊友「傳染」,更成功演繹得分後衛嘅角色,截至今日已經攻入4球,比起老牌前鋒陳肇麒嘅入球數目仲要多。3月西亞之旅梁諾恆已經入選港隊大軍名單,隨住大豪淡出,相信未來將會有更多機會畀細佬擔綱南華防線。

後衛:黃梓浩 (東方龍獅) – 23歲
上年喺夢想駿其確立左閘位置,上半季仲係喺理文流浪外借緊,季中省港盃攻入一球,吸引東方立即外借收回,仲要喺亞冠踢埋正選對陣中日韓勁旅,一躍成為香港正選左閘接班人嘅最佳人選。觀乎今季表現,王子助攻力唔錯,有活力,激活咗東方嘅左路,加強咗東方嘅左路側擊能力。喺現今缺乏正統左閘嘅香港隊之中,王子絕對有資格挑戰眾前輩,逐漸成為港隊正選左閘。

後衛:許宏鋒 (冠忠南區) – 23歲
由季前喺美國試腳踢到差啲可以喺美國落班,去到今季自己要求要喺左翼衛發展,攞埋南區左翼衛正選,許宏鋒可謂贏咗呢一鋪「轉位」嘅賭博。前幾年打前鋒,被盛讚衝刺力強,埋門把握力亦不俗嘅許宏鋒,移到去需要助攻助守嘅左翼衛,一樣能夠成功運用佢嘅長處,幫助南區爭取佳績。如果南區嚟緊一季都繼續五後防嘅一貫踢法嘅話,相信許宏鋒都會係正選左翼衛嘅不二之選。

中場:劉學銘 (冠忠南區) – 21歲
學銘有住接近米九嘅高大身材,加上擔任防中位置,有「香港耶耶托尼」嘅花名,而事實上今年表現亦都唔失禮,無論佢嘅中場拍檔係善於死球同遠射嘅陸志豪,定係喜愛上腳推進嘅迪基圖,學銘嘅發揮一樣無受影響,甚至喺呢三個中場選擇中,教頭鄭兆聰更傾向以學銘為中場重心配搭迪基圖或陸志豪,多於進取地以陸志豪搭檔迪基圖。憑藉學銘「得天獨厚」嘅身體質素同今季出色嘅表現,筆者可以預期佢將會繼續穩站球會嘅正選防中位置,甚至挑戰港隊常規大軍嘅位置。

中場:胡晉銘 (香港飛馬) – 19歲
喺今年飛馬組軍時,中路防守球員有麥保美、梁國威、張志勇,季中加碼簽入楊賜麟、李毅凱,點估到最後攞到正選嘅,竟然係只係第二季打職業賽、年僅19歲嘅胡晉銘。由季初打防中,去到季尾開始轉打左右二閘,仿似胡晉銘未來將成為香港其中一個「後防萬能插」。講到今季代表作,不得不提省港盃,胡晉銘雖然兩回合都只係後備上陣,但佢嘅路數同視野都係現時中生代嘅本地中場所缺少嘅。胡晉銘拍檔陳俊樂,會唔會係後黃金入籍一代港隊嘅防中組合呢?大家可以拭目以待。

中場:陳俊樂 (和富大埔) – 21歲
港隊未來隊長人選,甚至喺白鶴退出港隊後佢已經要準備接班,已經成為港隊常客。今年喺伊達回歸香港加盟和富大埔後,樂仔亦都放膽好多,助攻助守,埋門亦都多咗,睇嚟發展為一個全能中場都係樂仔其中一個目標。
麻樹足球 - 陳俊樂省港盃精華
https://www.youtube.com/watch?v=fsdmP4g_Jsc
中場:林樂勤 (香港飛馬) – 18歲
原本可能只係飛馬其中一項長遠投資,點知林樂勤竟然係一個即食嘅收購。處子戰對東方技驚四座,交出兩個助攻,登時令林樂勤聲價十倍。而事實上同謝家榮旅英嘅經驗,亦令佢比起其他同齡嘅球員更加成熟。季尾開始穩站正選,好似好好發展,但聽聞Jordan嚟緊可能選擇重返校園,到時要分心學業情況下能否保持有良好表現,就要睇佢自己造化啦。

波台黐線佬 - 林樂勤對東方龍獅精華 (版權來自東網電視)
https://www.facebook.com/hkgmoment/videos/1884344511812152/

中場:蕭俊銘 (香港飛馬) – 21歲
17歲先開始踢11人足球,但今年21歲嘅蕭銘憑藉打小型球時所訓練返嚟嘅純熟腳下功夫,漸漸適應港超嘅強度同踢法,甚至喺競爭激烈嘅飛馬右翼位上,蕭銘已經超過鍾偉強同黎洛賢,成為第二號右翼人選。最近一兩場甚至後備入替陳肇麒,擔任進攻中場,可見奇雲邦特都幾倚重佢。不過下屆奇雲邦特會唔會續任都仲係未知數,如果有新教頭嚟到,到時候蕭銘可能又要加倍努力,以贏得教練信任,爭取上場機會嘞。

前鋒:卓耀國 (R&F富力) – 22歲
R&F富力今季最佳「貢獻」唔係得失球,而係令卓耀國重拾勇態﹗喺疲弱嘅鋒線同缺乏中場供應下,「腰果」仍然能夠接近憑佢一己之力為富力攻入7球,華人球員之中僅次於李康廉,可見北上效力富力唔係放逐邊疆,而係令佢重生,收心養性踢好波。今年雖然只係22歲,但佢喺前線嘅勇悍表現,絕對稱得上可以挑戰港隊嘅席位。難怪早前出征西亞名單卓耀國榜上無名,會引嚟部份球迷為佢感到可惜。寄望阿國繼續進步,證明自己先係港隊未來嘅接班人。

SpadeAce91 HD - 卓耀國2016 - 2017精華
https://www.youtube.com/watch?v=_wsrMOOynBk
呢個十一人陣容全部都唔過23歲,但今年佢哋都能夠喺所屬球會獲得一定嘅上陣機會,而且有不俗嘅表現,比起中生代大佢哋幾年嘅師兄更有過之而無不及。喺本地球壇提倡本土嘅大氣候下,會唔會直接畀呢班新世代接班,反而仲會對香港足球以至港隊更有益呢?
各位香港新世代,繼續加油﹗

球員圖片來源:
http://sportsroad.hk/wp-content/uploads/2017/01/ranger_football-20170127-2.jpg
https://www.hkfa.com/var/images/player/1617/BC%20Glory%20Sky/TSUI%20Wan%20Kit.jpg
http://img.takungpao.com/2016/0902/20160902031609698.jpg
http://the-sun.on.cc/cnt/sport/20160326/photo/0326-00514-003b1.jpg
https://www.hkfa.com/var/images/player/20162017/Southern/HUI_Wang_Fung_1.jpg
https://www.hkfa.com/var/images/player/20162017/Southern/LAU_Hok_Ming_1.jpg
https://www.hkfa.com/var/images/player/1617/Pegasus/22_Wu%20Chun%20Ming.JPG
http://www.hkfa.com/upload/20162017/summeryouth/Tan_Chun_Lok.jpg
http://hk.on.cc/cnt/sport/20170210/photo/bkn-20170210210206729-0210_00882_001_01p.jpg?20170210211952
http://www.pegasusfc.com.hk/ufiles/IAN_3808.JPG
http://www.gzrffc.com.cn/Uploads/201609/57cd269aa85a2.jpg

球員精華來源:
https://www.youtube.com/watch?v=FaBFgjv6S2M
https://www.youtube.com/watch?v=fsdmP4g_Jsc
https://www.facebook.com/hkgmoment/videos/1884344511812152/
https://www.youtube.com/watch?v=_wsrMOOynBk
標籤: 本地波  港足新世代  

留言


請按此登錄後留言。未成為會員? 立即註冊
    快捷鍵:←
    快捷鍵:→