Groundhopping: 萊比錫的兩大球隊 - Chemie Leipzig & Lok Leipzig 文字

德國東北南部高級聯賽 (NOFV-Oberliga Süd/第五級別聯賽) 第二十三週
BSC Chemie Leipzig - FC Carl Zeiss Jena II
Alfred-Kunze-Sportpark
賽果:1:1 (0:1)
入場人數:1,612 (無作客球迷)

亞洲之旅還未完結時,我地係香港突然決定復活節要去柏林,而萊比錫正在去柏林既路上,咁岩發現呢個比賽週好難得地兩隊萊比錫既球會都有主場賽事,所以萊比錫變成我地今次 Roadtrip 既必到之地!

萊比錫有兩大球隊,一隊係 1. FC Lokomotive Leipzig,球迷普通都稱呼佢地為 Lok Leipzig,中文為火車頭萊比錫;另一隊就係 BSG Chemie Leipzig,呢隊波既中文譯名我都唔太清楚,但直譯既話就係化學萊比錫(Google 見到又有稱車米萊比錫)。

BSG 係德文 Betriebssportgemeinschaft,意思係指由一間公司成立既體育會,要注意唔係講緊大公司dum 一舊錢去投資一間球會,而係由一間公司既工人組織出黎既球會。你會發現好多東德(甚至東歐)既球會,好多都會以 Dynamo, Chemie, Energie, Lokomotive 之類等工業名稱命名。當時既體育會都代表一大班人群,細既可以係一間公司,大既可以係一個社區甚至整個城市。來自東德既球會都有咁多死忠熱血球迷,都係因為不同歷史因素影響。

正式黎講,歷史上係有兩隊 BSG Chemie Leipzig,一隊成立於 1950 年,另一隊成立於 1997 年。當德國統一後,政府係 1990 年將當時既 Chemie 同 Lok 合併組成 FC Sachsen Leipzig。其後 Sachsen Leipzig 因為資金問題破產及解散。(當時紅牛就係睇中萊比錫無「大」球會所以已經希望收購 Sachsen Leipzig,但因為球迷強烈反對球隊商業化所以佢地最後先要收購萊比錫市郊既一支小球隊)七年後, BSG Chemie Leipzig 重新成立,由最低組別聯賽重新開始。(唔似人地買起球隊既比賽權空降聯賽囉)

Chemie 既死敵當然係 Lok 啦,可惜因為兩支暫時係不同聯賽出戰,所以少有機會對戰。而呢兩隊波亦都有共同敵人,係邊隊波我就唔多講啦,基本上佢地當果隊波係透明,留返比啲 plastic fans 啦。過左咁多年佢地終於升到上第五級別,而且今年極會機會成為冠軍升上地區聯賽!亦即係話來年兩隊萊比錫既球會會係同一個聯賽參賽!到時會有更多好戲睇啦!!

星期四一早我地係市中心食飽左之後,就開車到萊比錫市中心以北既地區 Leutzsch。平時我地對第五級別既比賽都唔會有咩期待,但 Chemie 出名有好多球迷入場打氣。講緊既係入場人數可能得 1000 人,但場入面有800 人都會出聲唱歌打氣果種打氣!仲有,唔好唔記得,佢地係第五級別咋,有一千人入場仲想點?


到左 Chemie 主場後,我地無由主看台入口入場,因為怕撞到 Chemie 既 Ultras,佢地都會經過主看台去佢地龍門後既看台。我地怕佢地唔中意見到 groundhoppers ,所以就經過作客區去到球場既另一面入場。好慶幸㨂左另一個門口入場,因為呢區有間酒吧,入面有暖氣可以避寒!係酒吧入面仲可以清楚望到主看台~等到開波時我地當然出返去睇下 Chemie 既 ultras Diablos 點樣打氣啦!

賽前佢地掛起左好多大橫額,最大果條寫住 Chemie Leipzig - für immer mit dir,意思係永遠陪伴 Chemie Leipzig! 圍欄上仲有一條寫住 Gruppo anti Lok,遠睇無咩特別,近睇你會發現呢條橫額係由佢地從 Lok 球迷偷返黎既頸巾編織而成!


呢支球隊係以球迷為中心,球迷既支持對隊波好重要。所以球會酒吧內都有好多以球迷打氣做背景既相集。龍門後面雖然唔係滿座,但係其中一區聚集左大約 400 人一齊打氣。佢地唱足全場,仲有好多節奏我地都未聽過。賽前佢地話已經兩年未係主場輸過波,點知上半場客隊 Jena 就領先一球!

雖然當日客隊已經 Jena 二隊,但都想提下佢地球隊既背景。呢隊波全名係 FC Carl Zeiss Jena,Carl Zeiss 就係著名德國光學產品公司 Carl Zeiss AG 既創辦人,有戴眼鏡或者對相機鏡頭有研究既你可能見過 Zeiss 或者聽過蔡司呢個名。Jena 都係一隊由公司職員組成既一隊球隊,當年獲公司支持同贊助所以成立左一隊公司足球隊。球隊現時係地區聯賽出賽,當日因為只係二隊所以未有球迷到場支持。


中間仲要睇住舊黑雲飄過黎落超大雨,越黎越凍。好在半場休息時我地可以入酒吧食野暖下胃,下半場開始後 Chemie 開始多返啲攻勢,最後終於成功追和。我地隔離有幾個球迷超激動咁慶祝,其中兩個人企唔穩碌埋落地,搞到損手爛腳。我地都想真正來自萊比錫既球會可以有好成績出返啖氣,所以當 Chemie 入波後我地都慶祝埋一份!佢地下年一定要升到班呀!!!!

原本我地打算早五至十分鐘離場趕去睇下一場波,點知 Chemie 一路 chur 住黎攻搞到唔捨得走!最後只係和波收場。唔講真係差啲唔記得呢場波係 Oberliga,球員質素係同頂級聯賽無得比架啦,個個都係後生仔,但係球場氣氛黎講真係好熱血!!!仲要星期四五點半開波都有千六人入場!!

下頁會講 Lok Leipzig :-)
< 1 2 >
標籤: Groundhopping  

留言

會員
我要評論
請按此登錄後留言。未成為會員? 立即註冊
快捷鍵:←
快捷鍵:→