來季巴塞正選右閘之爭

小小巴迷 於 23/07/2017 發表 收藏文章
巴塞日前就踢完第一場國際冠軍球會盃嘅賽事。雖然對手係上季歐聯八強淘汰咗巴塞嘅祖記,不過呢個盃賽始終係季前熱身性質,加上巴塞新帥華維迪上任無耐,呢場賽事可以話只係熱下身同比新教頭睇下球員嘅能力,所以巴塞方面喺上、下半場都作出咗幾大嘅輪換。呢場賽事巴塞最終以2:1力克祖記,而成場賽事嘅焦點亦都理所當然咁落咗喺梅開二度嘅尼馬身上。(我諗巴黎嘅主席睇完呢場波之後就更加想買尼馬返去喇!)

不過呢篇文章想講嘅就唔係呢期轉會窗嘅紅人尼馬,而係巴塞嘅兩個右閘球員──維度爾(Vidal)同埋新加盟嘅施美度(Semedo)。

巴塞嘅西班牙右閘維度爾,係前季由前領隊安歷基帶返巴塞嘅球員,本來諗住佢可以同丹尼爾艾維斯較一日之長短,甚至乎做佢嘅接班人。不過加盟咗唔夠一季,就傳出同領隊不和嘅消息,而安歷基更加寧願用萬能key羅拔圖(Roberto)客串右閘,都唔比維度爾落場。唔知係咪雪到硬曬啦,維度爾喺今年一月就經歷咗一次重傷,令佢缺席咗足足成季嘅賽事。而自從丹尼爾艾維斯離隊之後,羅拔圖打右閘嘅表現真係可圈可點,而其實維度爾受傷前嘅表現亦都非常好,所以好多巴迷對維度爾呢個正宗右閘都充滿期望。

講返對祖記場波,久傷初癒嘅維度爾被列入巴塞嘅正選11人名單入面,不過就只係踢咗45分鐘,入替佢嘅正正就係下文都會提到嘅施美度。睇番維度爾嘅數據,22次傳球,20次成功,傳球成功率高達9成。向來進攻意欲都強嘅佢,亦有一次中目標嘅射門。防守數據方面,呢名27歲右閘嘅對抗成功率有大約4成,而且亦都作出咗1次成功嘅攔截同埋干擾對方傳球。但值得一提嘅係維達爾嘅空中對抗成功率係無記錄嘅,呢一點都反映咗佢嘅弱點。

跟住就講下巴塞用左3000萬歐元加500萬歐元浮動獎金簽入嘅施美度,呢個上季效力賓菲加嘅葡萄牙右閘,相信唔少巴迷都已經睇過佢嘅個人精華,無論進攻定防守,片中嘅施美度都游刃有餘,而佢亦都憑住出色嘅表現拎咗葡超最佳進步獎。作為今季巴塞目前轉會費最高嘅球員,巴迷對施美度嘅處子戰可以話係引頸以待。


睇睇佢嘅數據先,施美度喺下半場作出咗31次傳球,27次成功,傳球成功率都有8成7。新加盟嘅佢似乎都唔敢壓得太前,所以進攻數據方面比較少。防守數據方面,佢嘅對抗成功率就比維度爾低,只有3成3,但亦都作出左一次解圍同埋干擾對方傳球。不過身高達1米8嘅佢,喺空中對抗入面就有絕對嘅優勢,更加錄得100%嘅對抗成功率。

單從呢場波嘅數據嚟比較兩者,又似乎真係好難分高下,嚟緊呢季相信如果維達爾無病無痛,施美度又繼續成長同融入球隊,睇怕領隊華維迪係揀選正選右閘嘅問題上都幾頭癢,不過對巴迷嚟講,呢個情況就梗係值得開心啦!巴迷們一齊繼續期待佢地嚟緊呢季嘅表現啦!
標籤: forzabarca  

留言


請按此登錄後留言。未成為會員? 立即註冊
    快捷鍵:←
    快捷鍵:→