〔鋪定後路〕尼馬離隊 巴塞三個潛在的收購對象 文字

小小巴迷於 25/07/2017 發表 收藏文章
近呢幾日,巴塞球星尼馬似乎同法甲巨頭巴黎聖日耳門愈走愈近,有傳巴黎會方出到2.22億歐元啟動尼馬同巴塞合約上嘅違約金條款,更加開出破世界紀錄嘅年薪4,000萬歐元去吸引尼馬加盟。作為巴迷,本身有球王美斯同埋蘇亞雷斯喺隊中,真係唔擔心尼馬會過法甲搵食,但噚日又傳出美斯IG刪除曬所有有尼馬在場嘅相,仲unfollow埋尼馬,就真係開始驚喇!(希望美斯IG係比黑客入侵啦!)

驚還驚,萬一尼馬真係跳槽,究竟巴塞可以搵邊個球員去頂替呢個巴西國家隊嘅靈魂人物呢?呢篇文章就想列舉幾個巴塞嘅潛在收購對象。

  1. 保羅戴巴拿(Paulo Dybala)

相信唔止係巴迷,我諗呢個名對於所有球迷嚟講都唔會陌生。呢名23歲,出生於阿根廷嘅球員,可以勝任前鋒、輔鋒、翼鋒,甚至係進攻中場嘅位置,佢喺意大利球隊巴勒莫效力嗰陣,已經被視為係美斯嘅接班人。戴巴拿上季為意甲班霸祖雲達斯喺各項賽事上陣47次,合共貢獻咗19個入球同7個助攻,作為一個進攻中場,效率真係非常出眾。各位球迷對佢最深刻嘅印象,一定係佢上季歐聯8強首回合對陣巴塞梅開二度嘅精彩表現,最難得係佢除咗入球之外,盤球、傳送、策動攻勢等等都好有大將之風。而戴巴拿亦只係年僅23歲,仲有極大嘅進步空間,再加上同美斯同鄉,相信巴塞會方如果失去左尼馬,就好大機會會向戴巴拿落手。

  1. 阿歷斯山齊士(Alexis Sanchez)


冇錯你冇睇錯,效力緊阿仙奴嘅山齊士都可能係巴塞會方考慮收購嘅球員。現年28歲嘅智利球星,上季開始已經傳出有意離隊他投,最大嘅原因係因為阿仙奴滿足唔到佢嘅野心,而呢支上季英超排第5嘅球隊,嚟緊呢季仲要冇歐聯踢,令到山齊士首次開腔表示想去一支有能力奪得歐聯錦標嘅球會。之後,我諗好多球迷都知發生咩事,就係佢一度非常接近德甲巨人拜仁慕尼黑,之後又傳出佢即將加盟巴黎聖日耳門嘅消息,不過早兩日雲爺爺就話巴黎買唔到山齊士先去接觸尼馬。換句話說,呢個上季為阿仙奴貢獻咗30個入球,13個助攻嘅重心球員真係會留隊?不過其實當年山齊士離開巴塞,係因為先後比大衛韋拿(David Villa)同埋尼馬霸咗個左翼鋒位,仲保證唔到佢嘅正選位置,搞到佢冇晒mood先選擇離隊。但事實上,佢同巴塞嘅球員關係其實唔錯,早前接受訪問仲透露美斯教咗佢好多嘢,加上今時唔同往日,如果尼馬離隊,巴塞隊中能夠勝任左翼鋒呢個位置嘅勉強就只有啱啱回家嘅迪路菲奧(G. Deulofeu)同丹尼斯蘇亞雷斯(Denis Suarez),所以如果山齊士回家,咁佢都9成會係正選,所以呢個回家系列都真係有可能會發生㗎。

  1. 菲臘比古天奴(Philippe Coutinho)


古天奴就唔洗多講喇!其實尼馬唔走,之前都傳古天奴加盟巴塞傳咗好耐。呢位效力緊利物浦嘅25歲巴西中場核心,上季雖然傷出咗一段時間,但仍然交出14個入球同7個助攻,效率相當唔錯。隨著恩尼斯達(A. Iniesta)年紀漸大,巴斯基斯(S. Busquets)近季表現不穩,巴塞中場嘅控制力已經大不如前,而古天奴一直就被傳係巴塞重組中場嘅目標,但因為利物浦方面唔肯放人,加上球員嘅意願都傾向留隊,所以古天奴轉會巴塞一直都係只聞樓梯響。不過如果尼馬真係轉會巴黎,相信巴塞對古天奴嘅興趣將會重燃。但就有個疑問,就係古天奴喺利物浦雖然都有踢過左翼鋒嘅位置,但表現就遠遠不及佢踢進攻中場嗰陣,所以如果係想買古天奴,應該係用作中場補強之用,未必可以解決到尼馬出走帶嚟嘅問題。而且當時有尼馬在陣嘅巴塞,都游說唔到古天奴加盟,如今尼馬不在隊中,只靠蘇亞雷斯,又可唔可以成功氹到佢過檔呢?呢個都仲係巴塞會方需要面對嘅難關。

講咗咁耐,其實本人最想見到嘅,都係尼馬留隊,來季繼續同M、S一齊上陣、一齊踢波、一齊嘻嘻哈哈咁咪幾好。因為即使係最好嘅球員,都需要一段時間去同其他球員建立默契,而MSN又咁有化學作用,其實真係好難搵一個人完全代替尼馬,而且你巴塞想買啫,但人地球會未必肯放㗎嘛,所以都係果句啦,希望尼馬留番喺巴塞啦!



標籤: forzabarca  

留言

會員
我要評論
請按此登錄後留言。未成為會員? 立即註冊
  • Edmond  Lee
    Edmond Lee 於 28/07/2017 評論 NO. 1

    唔希望MSN得三季合作

  • Ma Irwin
    Ma Irwin 於 28/07/2017 評論 NO. 2

    今季利唔會賣古天奴

  • Tony Ma
    Tony Ma 於 28/07/2017 評論 NO. 3

    希望古天奴記得謝拉特05定06年勉強留隊之後既結果

  • Wilson Chan
    Wilson Chan 於 28/07/2017 評論 NO. 4

    同尼馬合作係吸引古天奴嘅因素,尼馬走咗佢去做乜😂

  • Steven Sze
    Steven Sze 於 28/07/2017 評論 NO. 5

    古天奴多

  • Raver Lee
    Raver Lee 於 28/07/2017 評論 NO. 6

    戴巴拿好啲

  • Ng Chi To
    Ng Chi To 於 28/07/2017 評論 NO. 7

    尼馬一早話咗唔走啦……

  • Winson Lau
    Winson Lau 於 28/07/2017 評論 NO. 8

    買c朗(大誤~

  • Lai YinWong
    Lai YinWong 於 28/07/2017 評論 NO. 9

    離你xx

  • Ken Wong
    Ken Wong 於 28/07/2017 評論 NO. 10

    得返SM🙄🙄🙄

  • Fung Kam Man
    Fung Kam Man 於 28/07/2017 評論 NO. 11

    呢啲新聞日日轉....係落實左先再講啦

  • 蔡俊睎
    蔡俊睎 於 29/07/2017 評論 NO. 12

快捷鍵:←